Read New Revised Asante Twi Bible Eksodɔs 28 Bible Online

Eksodɔs 28 - New Revised Asante Twi Bible bible

Eksodɔs 28

¹ Afei, ma wo nua Aaron ne ne mmabanin mfiri Israelfoɔ mu mmra wo nkyɛn, na wɔnyɛ me asɔfoɔ: Aaron ne ne mma Nadab, Abihu, Eleasa ne Itamar.

²Na pam kronkronyɛ ntadeɛ ma wo nua Aaron, animuonyam ne fɛ so.

³ Na ka kyerɛ wɔn a wɔwɔ nyansa akoma a mede nyansa honhom mahyɛ wɔn mu amaama no nyinaa na wɔmpam Aaron ntadeɛ no, na wɔmfa nyɛ no kronkron na ɔnni me sɔfoɔ.

⁴ Na ntadeɛ a wɔmpam nie: Adaaboɔ ne asɔfotadeɛ ne batakari ne atadeɛ yuu a wɔanwono no damedame ne abotire ne abɔsoɔ; na wɔmpam kronkronyɛ ntadeɛ mma wo nua Aaron ne ne mmabanin, na wɔnhyɛ nni me sɔfoɔ.

⁵Na wɔmfa sika ne bibire ne asaawa a ɛbere dum ne koogyan ne asaawa fitaa nyɛ.

⁶Na wɔmfa ntomanwono mu anyansadwuma so mfa sika ne bibire ne asaawa a ɛbere dum ne koogyan ne asaawa fitaa a wɔafira nyɛ asɔfotadeɛ no.

⁷Ɛnnya mmatire mmienu a ɛtoa ano ano, na wɔmfa ntoa.

⁸Na asɔfotadeɛ fɛfɛ no nkyekyeremu mfiri mu ara, sɛdeɛ ne yɛbea no teɛ, sika ne bibire ne asaawa a ɛbere dum ne koogyan ne asaawa fitaa a wɔafira.

⁹Na fa apopobibireboɔ mmienu, na kurukyire Israel mma no din wɔ so.

¹⁰Wɔn din no nsia nkɔ ɔboɔ baako so, na wɔn din nsia a aka no nso nkɔ ɔboɔ baako so, sɛdeɛ wɔn awoɔ ntoatoasoɔ teɛ.

¹¹Abodwumfoɔ adwuma, nsɔanodeɛ nkurukyireeɛ na fa kurukyire aboɔ mmienu no soɔ, sɛdeɛ Israel mma no din teɛ; na fa sika mfefaano twa ho hyia.

¹²Na fa aboɔ mmienu sisi asɔfotadeɛ no mmatiri so, na ɛnyɛ nkaeɛ aboɔ mma Israelfoɔ no, na Aaron nsoa wɔn din ne mmatiri mmienu so nkɔ AWURADE anim mfa nyɛ nkaeɛ.

¹³Na yɛ sika mfefaano

¹⁴ne sika ntweaban mmienu; wɔ no mmɛsa yɛ no sɛ nhoma, na fa ntweaban a wɔawɔ no mmɛsa no hyehyɛ mfefaano no so.

¹⁵Na yɛ atemmuo adaaboɔ, ntomanwono mu anyansadwuma, yɛ no sɛdeɛ asɔfotadeɛ no yɛbea teɛ: Sika, bibire ne asaawa a ɛbere dum ne koogyan ne asaawa fitaa a wɔafira na fa yɛ.

¹⁶Ɛnyɛ ahinanan, na wɔmmuka nto so; ne tentene nyɛ saama, na ne trɛ nyɛ saama.

¹⁷Na fa aboɔ sisi mu, aboɔ kyerɛpɛn nnan. Kyerɛpɛn a ɛdi kan nyɛ bogyanamboɔ, akrateboɔ ne ahahammonoboɔ;

¹⁸na kyerɛpɛn a ɛtɔ so mmienu no nyɛ nsramaboɔ, hoaboɔ ne bɔwerɛboɔ;

¹⁹na kyerɛpɛn a ɛtɔ so mmiɛnsa no nyɛ akutuhonoboɔ, mfrafraeɛboɔ ne beredumboɔ;

²⁰na kyerɛpɛn a ɛtɔ so nnan no nyɛ sikabereɛboɔ, apopobibireboɔ ne ahwehwɛboɔ; ne nsisimu no, sika mfefaano ntwa ho nhyia.

²¹Na aboɔ no ano nyɛ sɛ Israel mma no din ano teɛ, dummienu, sɛ wɔn din no teɛ; ɛnyɛ nsɔanodeɛ nkurukyireeɛ, sɛdeɛ din no teɛ mmaako mmaako, sɛ mmusuakuo dummienu no teɛ.

²²Na fa sika amapa yɛ adaaboɔ no so ntweaban a wɔawɔ no mmɛsa sɛ nhoma.

²³Na yɛ adaaboɔ no so sika nkaa mmienu, na fa nkaa mmienu no hyehyɛ adaaboɔ no ntwea mmienu so.

²⁴Na fa sika mmɛsa mmienu no toatoa adaaboɔ no ntwea so nkaa no mu.

²⁵Na mmɛsa mmienu no ano mmienu a aka no, fa toatoa mfefaano mmienu no mu, na fa hyehyɛ asɔfotadeɛ no mmatiri mmienu no so anim fam.

²⁶Na yɛ sika nkaa mmienu fa hyehyɛ adaaboɔ no ntwea mmienu no so, ano a ɛwɔ emu fam kyerɛ asɔfotadeɛ no.

²⁷Na yɛ sika nkaa mmienu bio fa hyehyɛ asɔfotadeɛ no afaafa mmienu no so anim fam wɔ aseɛ a ɛbɛn ne ntoaeɛ no, asɔfotadeɛ no nkyekyeremu no so.

²⁸Na wɔmfa bibire nhoma nkyekyere adaaboɔ no nkaa no nsosɔ asɔfotadeɛ no nkaa no mu, na ɛmfam asɔfotadeɛ no nkyekyeremu no atifi, na adaaboɔ no ansane amfiri asɔfotadeɛ no so.

²⁹Na Aaron nsoa Israel mma din atemmuo adaaboɔ no mu n’akoma so, mfa nkɔ kronkronbea hɔ, na ɛnyɛ AWURADE anim nkaeɛ daa.

³⁰ Na fa Urim ne Tumim[7] no hyɛ atemmuo adaaboɔ no mu, na sɛ Aaron rekɔ AWURADE anim a, ɛnna ne koko so, na Aaron nsoa Israelfoɔ no atemmuo n’akoma so, AWURADE anim daa.

³¹ Na fa birisi nko ara yɛ asɔfotadeɛ no ase batakari.

³²Na tokuro nna mfimfini wɔ n’atifi, na wɔmfa ntomaban a wɔanwono mmare tokuro no ano nhyia te sɛ adaaboɔ mu tokuro, na ansuane.

³³Na mmuano no so no, wɔmfa bibire ne asaawa a ɛbere dum ne koogyan nyɛ atoaa aba nsɛsoɔ ntwa ho nhyia, na sika nnɔnnɔmma nsensɛne ntam ntam nhyia.

³⁴Sika adɔmma ne atoaa aba, ntwa batakari no mmuano ho nhyia.

³⁵ Na Aaron nhyɛ nsom, na sɛ ɔhyɛne kronkronbea hɔ AWURADE anim na ɔfiri adi a, wɔate ne nnyegyeeɛ, na wanwu.

³⁶ Na boro sika amapa traatraa, na kurukyire so sɛ nsɔanodeɛ nkurukyireeɛ sɛ: Kronkron ma AWURADE.

³⁷Na fa fam bibire homa so, na ntena abotire no so; abotire no anim na ɛmfam.

³⁸Na ɛmfam Aaron moma so, na Aaron nsoa mmusuo biara a aba akronkronneɛ a Israelfoɔ yɛ no kronkron, wɔn ayɛyɛdeɛ kronkron nyinaa mu no; na ntena ne moma so daa, na AWURADE ani asɔ wɔn.

³⁹ Na nwono nwera damedame atadeɛ yuu no, na yɛ nwera abotitene, na yɛ ntomanwono mu adwini abɔsoɔ.

⁴⁰Na Aaron mma no nso, yɛ ntadeɛ ne aboomu ma wɔn, na yɛ abotire bi ma wɔn, na wɔn anim nyɛ nyam na wɔn ho nyɛ fɛ.

⁴¹ Na fa hyehyɛ wo nua Aaron ne ne mma a wɔka ne ho no, na sra wɔn ngo, na hyɛ wɔn asɔfoɔ na dwira wɔn, na wɔnni me sɔfoɔ.

⁴²Na yɛ nwera twakoto ma wɔn, na ɛnkata wɔn adagya so mfiri asene nkɔsi nsrɛkyire.

⁴³Na Aaron ne ne mma no, sɛ wɔreba ahyiaeɛ ntomadan no mu anaasɛ wɔrebɛn afɔrebukyia no abɛsom kronkronbea hɔ a, wɔnhyehyɛ, na wɔammɔ mmusuo na wɔanwu; ɛnyɛ daa atorɔmudeɛ mma no ne n’asefoɔ a wɔbɛdi n’akyire no.