Read New Revised Asante Twi Bible Eksodɔs 31 Bible Online

Eksodɔs 31 - New Revised Asante Twi Bible bible

Eksodɔs 31

¹ Na AWURADE ka kyerɛɛ Mose sɛ,

²Hwɛ, mabɔ Hur ba Uri ba Besalel a ɔfiri Yuda abusuakuo mu din mafrɛ no,

³ na mede Nyankopɔn honhom mahyɛ no ma, nyansa ne nhunumu ne nimdeɛ ne adwinnie ahodoɔ nyinaa mu,

⁴sɛ ɔmfa nnwene ho ne tirim na ɔnni sika ne dwetɛ ne kɔbere mfrafraeɛ,

⁵ne aboɔ a wɔsene sisi adeɛ mu ne nnuasene mu adwini, na ɔnni adwinhodoɔ nyinaa.

⁶Na me ara, hwɛ, mafa Ahisamak ba Oholiab a ɔfiri Dan abusuakuo mu maka ne ho; na nnipa a wɔwɔ nyansa akoma nyinaa, mede nyansa mahyɛ wɔn akoma mu na wɔayɛ deɛ mahyɛ woɔ yi nyinaa;

⁷ ahyiaeɛ ntomadan no ne Adanseɛ adaka no ne mpata adwa no a ɛsi soɔ no ne ntomadan no ho ade nyinaa;

⁸ne ɛpono no ne ɛho nnoɔma ne kaneadua a ɛho teɛ no ne ɛho nnoɔma nyinaa ne aduhwamhyeɛ bukyia no;

⁹ne ɔhyeɛ afɔrebukyia no ne ɛho nnoɔma nyinaa ne kuduo ne ne ntaaseɛ no

¹⁰ne mmasoɔ ntadeɛ ne Ɔsɔfoɔ Aaron ntadeɛ kronkron no ne ne mma ntadeɛ a wɔde bɛdi asɔfoɔ no;

¹¹ne sra ngo no ne kronkronbea aduhwam a wɔhyeɛ no. Wɔnyɛ no sɛdeɛ mahyɛ woɔ nyinaa.

¹² Na AWURADE ka kyerɛɛ Mose sɛ:

¹³ Na wo nso ka kyerɛ Israelfoɔ no sɛ: Me home da no ara na monnie; na ɛyɛ me ne mo ntam nsɛnkyerɛnneɛ, mo awoɔ ntoatoasoɔ nyinaa mu, na moahunu sɛ me AWURADE na meyɛ mo kronkron.

¹⁴ Enti monni homeda no, na ɛyɛ kronkron ma mo; obiara a ɔbɛgu ho fi no, kum na wɔbɛku no; na obiara a ɔyɛ mu adwuma no, wɔbɛtwa saa kra no afiri ne man mu atwene.

¹⁵Nnansia na wɔmfa nyɛ adwuma, na da a ɛtɔ so nson no yɛ ɔhome mu homeda a ɛyɛ kronkron ma AWURADE; obiara a ɔyɛ adwuma homeda no, kum na wɔbɛku no.

¹⁶Enti Israelfoɔ no nhwɛ homeda no na wɔnni, wɔn awoɔ ntoatoasoɔ nyinaa mu, sɛ daa apam.

¹⁷ Me ne Israel ntam nsɛnkyerɛnneɛ ne no de kɔsi daa; na nnansia na AWURADE de yɛɛ ɔsoro ne asase, na da a ɛtɔ so nson no ɔhomee na ɔdwodwoo ne ho.

¹⁸ Na ɔne Mose wiee kasa Sinai bepɔ soɔ no, ɔmaa no adanseɛ apono mmienu, aboɔpono a wɔde Nyankopɔn nsateaa atwerɛ soɔ.