Read New Revised Asante Twi Bible Eksodɔs 36 Bible Online

Eksodɔs 36 - New Revised Asante Twi Bible bible

Eksodɔs 36

¹Na Besalel ne Oholiab ne wɔn a AWURADE ama wɔn nimdeɛ ne nhunumu sɛ wɔnhunu adeɛ no yɛ nyinaa na wɔbɛyɛ kronkronbea ɔsom no ho adwuma sɛdeɛ AWURADE ahyɛ no.

²Na Mose frɛɛ Besalel, Oholiab ne animdefoɔ a AWURADE de nyansa ahyɛ wɔn akoma mu nyinaa, wɔn a wɔn akoma kanyan wɔn sɛ wɔmmra adwuma no ho mmɛyɛ nyinaa.

³Na wɔgyee mmasoɔ afɔrebɔdeɛ a Israelfoɔ de baa sɛ wɔmfa nyɛ kronkronbea som ho adwuma no nyinaa Mose anim sɛ wɔde bɛyɛ. Na wɔkɔɔ so ara de ayamyi ayɛyɛdeɛ brɛɛ no daa anɔpa.

⁴Na adwumfoɔ a wɔyɛ kronkronbea no ho adwuma nyinaa firi wɔn nnwuma a wɔreyɛ no ho ba

⁵bɛka kyerɛɛ Mose sɛ: Ɔman no ama deɛ wɔde ba no adɔɔso sene deɛ ɛbɛso adwuma a AWURADE hyɛɛ sɛ wɔnyɛ no.

⁶Na Mose hyɛ maa wɔpaee no nsraban no mu sɛ: Ɔbarima oo, ɔbaa oo, obiara mmfa biribi mmmɛyɛ kronkronbea no ho mmasoɔ afɔrebɔdeɛ bio.

⁷Ɛnna ɔman no de gyaee ba. Ɛfiri sɛ na deɛ wɔanya no dɔɔso ma adwuma no nyinaa sɛ wɔde bɛyɛ ama ebi aka.

⁸ Na wɔn a wɔyɛ adwuma no animdefoɔ nyinaa yɛɛ tenabea no; wɔde asaawa fitaa a wɔafira ne bibire ne asaawa a ɛbere dum ne koogyan yɛɛ ntoma du, kerubim a ɛyɛ ntomanwono mu adwini na wɔde yɛeɛ.

⁹Ntoma biara tentene yɛ basafa dunan, na ntoma biara tɛtrɛtɛ yɛ basafa mmienu; ntoma no nyinaa nsusuiɛ yɛ bafua.

¹⁰Na ɔde ntoma no nnum toatoaa so maa baako toaa baako so, na ɔde ntoma no nnum nso toatoaa so maa baako toaa baako so.

¹¹Na ɔde bibire bobɔɔ ntoma baako mmuano so nkantankoraa wɔ ano wɔ ntoaeɛ no mmuano so wɔ ntoaeɛ a ɛtɔ so mmienu no so;

¹²nkantankoraa aduonum na ɔbobɔɔ no ntoma baako ano, na nkantankoraa aduonum nso na ɔbobɔɔ no ntoma a ɛwɔ ntoaeɛ a ɛtɔ so mmienu no soɔ no ano; nkantankoraa no dii mmɔanim.

¹³Na ɔyɛɛ sika nkɔtɔkorɔ aduonum, na ɔde nkɔtɔkorɔ no koakoaa ntoma no, na tenabea no yɛɛ fua.

¹⁴Na ɔyɛɛ mmirekyie nwi ntoma de yɛɛ ntomadan wɔ tenabea no so; ntoma dubaako na ɔyɛeɛ.

¹⁵Ntoma baako tentene yɛ basafa dunum, na ntoma baako tɛtrɛtɛ yɛ basafa mmienu; ntoma dubaako no nsusuiɛm yɛ pɛ.

¹⁶Na ɔde ntoma no nnum toatoaa so yɛɛ no bafua, na ɔde nsia nso toatoaa so yɛɛ no bafua.

¹⁷Na ɔbobɔɔ nkantankoraa aduonum, ntoma a ɛdi akyire no mmuano so, wɔ ntoaeɛ no so, na ɔbobɔɔ nkantankoraa aduonum nso wɔ ntoaeɛ a ɛtɔ so mmienu no ntoma no mmuano so.

¹⁸Na ɔyɛɛ kɔbere mfrafraeɛ nkɔtɔkorɔ aduonum de koakoaa ntomadan no na ayɛ bafua.

¹⁹Na ɔde adwennini nwoma a wɔahyɛ no kɔkɔɔ yɛɛ ntomadan no nkatasoɔ, na ɔde sukraman nwoma yɛɛ ɛno so nkatasoɔ.

²⁰ Na ɔde okuo yɛɛ tenabea no ntaaboɔ a ɛsisi hɔ no.

²¹Taaboɔ baako tentene yɛ basafa nnum, na taaboɔ baako tɛtrɛtɛ bɛyɛ anammɔn mmienu ne fa.

²²Ɛnan mmienu tuatua taaboɔ baako ase, na biribi sosɔ ɛnan baako ne baako mu. Saa na ɔyɛɛ tenabea ntaaboɔ no nyinaa ho.

²³Na ɔyɛɛ tenabea ntaaboɔ no: Ntaaboɔ aduonu di anafoɔ fam a ɛkyerɛ nifa.

²⁴Na ɔyɛɛ ntaaboɔ aduonu no ase dwetɛ nnyinasoɔ aduanan; nnyinasoɔ mmienu hyehyɛ taaboɔ koro ase ma ne nan mmienu no, na nnyinasoɔ mmienu hyehyɛ taaboɔ koro nso ase ma ne nan mmienu no.

²⁵Na tenabea no nkyɛn baako a ɛdi atifi fam no, ɔde ntaaboɔ aduonu kɔsisii hɔ,

²⁶ne ne dwetɛ nnyinasoɔ aduanan, taaboɔ koro ase nnyinasoɔ mmienu, na koro nso ase nnyinasoɔ mmienu.

²⁷Na tenabea no akyiri fam a ɛkyerɛ atɔeɛ no, ɔde ntaaboɔ nsia kɔsisii hɔ.

²⁸Na ɔde ntaaboɔ mmienu kɔsisii tenabea no akyiri ntwea no so,

²⁹na ɛpam ho firi fam de rekorɔ, nanso ɛyɛ mu kɔduru ne hini so, deɛ kaa a ɛdi kan no tua hɔ: Saa na ɔyɛɛ ne mmienu nyinaa ntwea mmienu no soɔ.

³⁰Na ntaaboɔ nwɔtwe ne ne dwetɛ nnyinasoɔ dunsia na ɛwɔ hɔ, taaboɔ biara ase nnyinasoɔ mmienu.

³¹ Na ɔde okuo yɛɛ mmeamu, tenabea no nkyɛn baako ntaaboɔ no deɛ enum,

³²ne tenabea no nkyɛn baako no nso ntaaboɔ no mmeamu enum no ne tenabea no akyi, atɔeɛ fam ntaaboɔ no deɛ, mmeamu nnum.

³³Na ɔde mfimfini mmeamu no beaa ntaaboɔ no mfimfini de twaa mu firi tire kɔduruu tire.

³⁴Na ɔde sika duraduraa ntaaboɔ no ho, na ɔde sika yɛɛ ɛho nkaa no sɛ ɛnyɛ mmeamu no hyehyɛbea, na ɔde sika duraduraa mmeamu no ho.

³⁵ Na ɔde bibire ne asaawa a ɛbere dum ne koogyan ne asaawa fitaa a wɔafira yɛɛ ntwamutam; ɔyɛɛ no ntomanwono mu adwini a kerubim wɔ mu.

³⁶Na ɔyɛɛ ɛho okuo adum nnan, na ɔde sika duraduraa ho; ne mprɛngo yɛ sika. Na ɔde dwetɛ nnyinasoɔ nnan guu aseɛ.

³⁷Na ɔde bibire ne asaawa a ɛbere dum ne koogyan ne asaawa fitaa a wɔafira nwonoo nkyeremu de yɛɛ ntomadan no ano nkataano.

³⁸Na ɔyɛɛ ɛho adum nnum ne mprɛngo, na ɔde sika duraduraa n’atifi ne ne mmeamu ho, na ne nnyinasoɔ nnum yɛ kɔbere mfrafraeɛ.