Read New Revised Asante Twi Bible Eksodɔs 38 Bible Online

Eksodɔs 38 - New Revised Asante Twi Bible bible

Eksodɔs 38

¹ Na ɔde okuo yɛɛ ɔhyeɛ afɔrebukyia no, ne tentene yɛ basafa mmienu ne fa, ne tɛtrɛtɛ yɛ basafa mmienu ne fa, ɛyɛ ahinanan, na ne sorokorɔ yɛ basafa baako ne fa.

²Na ɔyɛɛ ne mmɛn, ne mfatorɔ nnan no so, emu ara na na ne mmɛn no tuatua, na ɔde kɔbere mfrafraeɛ duraa ho.

³Na ɔyɛɛ afɔrebukyia no ho nnoɔma nyinaa: Nsenaa ne sesa adeɛ ne nkoraa, adinam ne nsramma kukuwa no; ɛho nnoɔma nyinaa, ɔde kɔbere mfrafraeɛ na ɛyɛeɛ.

⁴Na ɔnwonoo afɔrebukyia no ho kɔbere mfrafraeɛ ntentan a wɔanwono no sɛ atena, ne bamma no ase firi fam kɔduru mfimfini.

⁵Na ɔguu nkaa nnan tuatuaa kɔbere mfrafraeɛ ntentan no ntwea nnan no so, sɛ ɛnyɛ mpoma no hyehyɛbea.

⁶Na ɔde okuo senee mpoma, na ɔde kɔbere mfrafraeɛ duraduraa ho.

⁷Na ɔde mpoma no wurawuraa nkaa no mu afɔrebukyia no nkyɛn nkyɛn na wɔde asoa. Ɔde ntaaboɔ na ɛyɛeɛ, na emu da kwan.

⁸ Na ɔde kɔbere mfrafraeɛ yɛɛ kuduo no, na ne ntaaseɛ nso yɛ kɔbere mfrafraeɛ a ɔnya firii mmaa a wɔba bɛsom, ahyiaeɛ ntomadan no ano, no kɔbere mfrafraeɛ nhwehwɛ mu.

⁹ Na ɔyɛɛ adihɔ no: Anafoɔ fam a ɛkyerɛ adihɔ ntwamutam a wɔde asaawa fitaa a wɔafira anwono, basafa aduonum,

¹⁰ne n’adum aduonu ne ne kɔbere mfrafraeɛ nnyinasoɔ aduonu, adum no mprɛngo ne ne mmeaeɛ yɛ dwetɛ;

¹¹ne atifi fam ntwamutam no, basafa aduonum, n’adum aduonu ne ne kɔbere mfrafraeɛ nnyinasoɔ aduonu, adum no nnadewa ne ne mmeaeɛ yɛ dwetɛ;

¹²ne atɔeɛ fam ntwamutam no basafa aduonu nnum, n’adum du ne ne nnyinasoɔ du, adum no nkɔtɔkorɔ ne ne mmeamu yɛ dwetɛ;

¹³ne anim fam a ɛkyerɛ apueeɛ deɛ, basafa aduonu nnum,

¹⁴ɔfa ha ntwamutam basafa nson ne fa, n’adum mmiɛnsa ne ne nnyinasoɔ mmiɛnsa;

¹⁵na ɔfa baako no deɛ nso adihɔ no aboboano ɔfa ha ne ha ntwamutam basafa nson ne fa, n’adum mmiɛnsa ne ne nnyinasoɔ mmiɛnsa.

¹⁶Adihɔ no ntwamutam a ɛtwa ho hyia nyinaa, asaawa fitaa a wɔafira na wɔde yɛeɛ,

¹⁷na adum no yɛ kɔbere mfrafraeɛ, adum no mprɛngo ne ne mmeamu yɛ dwetɛ, ne tiri nnuraho yɛ dwetɛ; adihɔ no adum nyinaa, dwetɛ mmeaeɛ na ɛbeabea ho;

¹⁸na adihɔ no aboboano nkataano no yɛ adenwono adwuma a wɔde bibire ne asaawa a ɛbere dum ne koogyan ne asaawa fitaa a wɔafira na ayɛ, na ne tentene yɛ basafa du, na ne sorokorɔ wɔ ne trɛ mu yɛ basafa mmienu ne fa, te sɛ adihɔ no ho ntwamutam no;

¹⁹na n’adum nnan, ne ne kɔbere mfrafraeɛ nnyinasoɔ nnan, ne nnadewa yɛ dwetɛ, na ne tiri nnuraho ne ne mmeamu yɛ dwetɛ.

²⁰Na tenabea no ne adihɔ no ho mpɛɛwa a ɛtwa ho hyia no nyinaa yɛ kɔbere mfrafraeɛ.

²¹ Yei ne tenabea no, adanseɛ tenabea no ho nnoɔma anobuo, sɛdeɛ wɔnam Mose anomu asɛm so maa Ɔsɔfoɔ Aaron ba Itamar buu ano maa Lewifoɔ som no.

²² Na Hur ba Uri ba Besalel a ɔfiri Yuda abusuakuo mu no yɛɛ deɛ AWURADE hyɛɛ Mose no nyinaa;

²³na deɛ ɔka ne ho ne Ahisamak ba Oholiab a ɔfiri Dan abusuakuo mu a ɔyɛ sika ne dua dwumfoɔ ne ɔnwomfoɔ a ɔde bibire ne asaawa a ɛbere dum ne koogyan ne asaawa fitaa mu adwini no.

²⁴ Sika a wɔde yɛɛ adwuma no nyinaa, kronkronbea no ho nnwuma nyinaa, ɛtoɔ sika no, ano si dwetikɛseɛ aduonu nkron ne nnwetɛbena ahanson aduasa, sɛdeɛ kronkronbea dwetɛbena no teɛ.

²⁵Na asafo no mu nnipa a wɔkan wɔn no dwetɛ ano si dwetikɛseɛ ɔha ne nnwetɛbena apem ahanson aduɔson nnum, sɛdeɛ kronkronbea dwetɛbena no teɛ.

²⁶Wɔn a wɔkan wɔn fraa dodoɔ no mu a wɔadi mfirinhyia aduonu anaa deɛ ɛboro saa a wɔyɛ mpem ahansia ne mpensa ne ahanum aduonum no mu biara yii beka baako (a ɛyɛ dwetɛbena fa sɛdeɛ kronkronbea dwetɛbena no teɛ).

²⁷Na wɔde dwetɛ dwetikɛseɛ ɔha no guu kronkronbea no nnyinasoɔ ne ntwamutam no nnyinasoɔ no, nnyinasoɔ ɔha no yɛ dwetikɛseɛ ɔha, dwetikɛseɛ baako yɛ nnyinasoɔ baako.

²⁸Na nnwetɛbena apem ahanson aduɔson nnum no, ɔde yɛɛ adum no mprɛngo, na ɔde bi duraduraa etire tire, na ɔde bi beabeaa ho.

²⁹Na ɛtoɔ kɔbere mfrafraeɛ no ano si dwetikɛseɛ aduɔson ne nnwetɛbena mpem mmienu ahanan.

³⁰Na ɛno na ɔde yɛɛ ahyiaeɛ ntomadan no ano nnyinasoɔ ne kɔbere mfrafraeɛ afɔrebukyia ne ɛho kɔbere mfrafraeɛ ntentan ne afɔrebukyia no ho nnoɔma nyinaa,

³¹ne adihɔ no nnyinasoɔ a ɛtwa ho hyia, ne adihɔ no aboboano nnyinasoɔ, ne tenabea no ho mpɛɛwa nyinaa, ne adihɔ no mpɛɛwa a ɛtwa ho hyia nyinaa.