Read New Revised Asante Twi Bible Eksodɔs 39 Bible Online

Eksodɔs 39 - New Revised Asante Twi Bible bible

Eksodɔs 39

¹ Na bibire ne asaawa a ɛbere dum ne koogyan no, wɔde yɛɛ ɔsom ntadeɛ a wɔde bɛsom kronkronbea hɔ, na wɔyɛɛ Aaron ntade kronkron no, sɛdeɛ AWURADE hyɛɛ Mose no.

²Na ɔde sika ne bibire ne asaawa a ɛbere dum ne koogyan ne asaawa fitaa a wɔafira nwonoo asɔfotadeɛ no.

³Na wɔboroo sika tratra twitwaa no nteanteaa sɛ wɔde rebɛsa bibire ne asaawa a ɛbere dum ne koogyan ne asaawa fitaa no mu adi no adwini.

⁴Wɔyɛɛ ɛho mmatire a wɔde toa. Na wɔkaa ano mmienu no toae;

⁵na asɔfotadeɛ no nkyekyeremu a ɛwɔ soɔ no, ɛfiri emu ara te sɛ n’adwini no ara, sika ne bibire ne asaawa a ɛbere dum ne koogyan ne asaawa fitaa a wɔafira, sɛdeɛ AWURADE hyɛɛ Mose no.

⁶Na wɔyɛɛ apopobibire aboɔ a ɛsisi sika nnwinneɛ mu a wɔakurukyire soɔ nsɔanodeɛ nkurukyireeɛ, sɛdeɛ Israel mma din teɛ.

⁷Na ɔde fam asɔfotadeɛ no mmatiri so sɛ ɛnyɛ Israelfoɔ no nkaeɛ aboɔ, sɛdeɛ AWURADE hyɛɛ Mose no.

⁸Na ɔde adwinni nwonoo adaaboɔ no sɛdeɛ asɔfotadeɛ no adwini no teɛ, sika, bibire ne asaawa a ɛbere dum ne koogyan ne asaawa fitaa a wɔafira.

⁹Ɛyɛ ahinanan, wɔbuka adaaboɔ no to so, ne tentene yɛ saama na ne tɛtrɛtɛ yɛ saama, na wɔbuka to so.

¹⁰Na wɔde aboɔ kyerɛpɛn nnan sisii mu. Kyerɛpɛn a ɛdi kan no yɛ bogyanamboɔ, akrateboɔ ne ahahammonoboɔ;

¹¹na kyerɛpɛn a ɛtɔ so mmienu yɛ nsramaboɔ, hoaboɔ ne bɔwerɛboɔ;

¹²na kyerɛpɛn a ɛtɔ so mmiɛnsa yɛ akutuhonoboɔ, mfrafraeɛboɔ ne beredumboɔ;

¹³na kyerɛpɛn a ɛtɔ so nnan yɛ sikabereɛboɔ, apopobibireboɔ ne ahwehwɛboɔ; ne nsisimu no wɔyɛɛ ho sika nnwinneɛ hyiae.

¹⁴Na aboɔ no duru Israel mma no din ano, dummienu, sɛdeɛ wɔn din teɛ; ɛyɛ nsɔanodeɛ kurukyireeɛ, sɛdeɛ din no teɛ mmaako mmaako, sɛdeɛ mmusuakuo dummienu no teɛ.

¹⁵Na wɔde sika amapa yɛɛ adaaboɔ no so ntweaban a wɔawɔ no mmɛsa sɛ nhoma no.

¹⁶Na wɔyɛɛ sika nnwinneɛ mmienu ne sika nkaa mmienu, na wɔde nkaa mmienu no hyehyɛɛ adaaboɔ no ntwea mmienu so.

¹⁷Na wɔde sika mmɛsa mmienu no koakoaa nkaa mmienu a ɛwowɔ adaaboɔ no ntwea soɔ no mu.

¹⁸Na wɔde mmɛsa mmienu no ano mmienu a aka no koakoaa nnwinneɛ mmienu no mu, na wɔde hyehyɛɛ asɔfotadeɛ no mmatiri no so, anim fam.

¹⁹Na wɔyɛɛ sika nkaa mmienu de hyehyɛɛ adaaboɔ no ntwea mmienu no so, wɔ ano a ɛwɔ emu fam kyerɛ asɔfotadeɛ no.

²⁰Na wɔyɛɛ sika nkaa mmienu bio de hyehyɛɛ asɔfotadeɛ no afaafa mmienu no so anim fam wɔ aseɛ a ɛbɛn ne ntoaeɛ, asɔfotadeɛ no nkyekyeremu no so.

²¹Na wɔde bibire nhoma kyekyeree adaaboɔ nkaa no de sosɔɔ asɔfotadeɛ no nkaa no mu sɛ ɛmfam asɔfotadeɛ no nkyekyeremu no atifi, na adaaboɔ no antwetwe amfiri asɔfotadeɛ no so, sɛdeɛ AWURADE hyɛɛ Mose no.

²² Na ɔyɛɛ asɔfotadeɛ no ase batakari no, wɔde birisi na ɛnwonoo ne nyinaa.

²³Na batakari no tokuro da ne mfimfini te sɛ adaaboɔ mu tokuro, wɔde ntomaban abare tokuro no ano ahyia, na ansuane.

²⁴Na wɔde bibire ne asaawa a ɛbere dum ne koogyan a wɔafira yɛɛ atoaa aba nsɛsoɔ wɔ batakari no mmuano so.

²⁵Na wɔyɛɛ sika amapa nnɔnnɔmma, na wɔde nnɔnnɔmma no sensɛnee atoaa aba no ntam ntam, batakari no mmuano no so de twaa ho hyiae, atoaa aba no ntam ntam;

²⁶adɔmma ne atoaa aba, adɔmma ne atoaa aba didi so ara batakari no mmuano so hyia, na wɔde asom, sɛdeɛ AWURADE hyɛɛ Mose no.

²⁷ Na wɔde nwera fɛfɛ a wɔanwono yɛɛ ntadeɛ yuu no maa Aaron ne ne mma,

²⁸na nwera abotitene ne nwera ahokeka abotire ne nwera twakoto a wɔde asaawa fitaa a wɔafira ayɛ,

²⁹ne adenwono aboomu a wɔde asaawa fitaa a wɔafira ne bibire ne asaawa a ɛbere dum ne koogyan yɛeɛ sɛdeɛ AWURADE hyɛɛ Mose no.

³⁰ Na wɔboroo sika amapa tratraa de yɛɛ abɔanimu kronkron no, na wɔtwerɛɛ so atwerɛ sɛ nsɔanodeɛ so nkurukyireeɛ sɛ: Kronkron ma AWURADE.

³¹Na wɔde bibire homa kyekyeree fam abotitene no so, sɛdeɛ AWURADE hyɛɛ Mose no.

³²Na wɔyɛɛ ahyiaeɛ ntomadan no ho adwuma nyinaa wiee, na Israelfoɔ yɛɛ sɛdeɛ AWURADE hyɛɛ Mose no nyinaa.

³³Na wɔde tenabea no brɛɛ Mose: Ntomadan no ne ɛho nnoɔma nyinaa, ne nkɔtɔkorɔ, ne nsisiho ntaaboɔ, ne mmeamu ne ne nsisimu adum ne ne nnyinasoɔ;

³⁴ne adwennini nwoma a wɔahyɛ no kɔkɔɔ nkatasoɔ ne sukraman nwoma nkatasoɔ ne ntwamutam no;

³⁵adanseɛ adaka ne ne mpoma ne mpata adwa no;

³⁶ɛpono no ne ɛho nnoɔma nyinaa ne kyerɛ paanoo no;

³⁷kaneadua kronkron no, ne ne nkanea a wɔasiesie sisi soɔ ne ɛho nnoɔma nyinaa ne kanea no ngo;

³⁸ne sika afɔrebukyia ne sra ngo ne ɔhyeɛ aduhwam ne ntomadan no ano nkataano no;

³⁹kɔbere mfrafraeɛ afɔrebukyia no ne ɛho kɔbere mfrafraeɛ ntentan no, ne mpoma ne ɛho nnoɔma nyinaa; nkuduo no ne ne ntaaseɛ;

⁴⁰adihɔ no ntwamutam, n’adum ne ne nnyinasoɔ ne adihɔ no aboboano nkataano, ne ntampehoma ne ne mpɛɛwa, ne ahyiaeɛ ntomadan no tenabea no som ho nnoɔma nyinaa;

⁴¹ɔsom ntadeɛ a wɔde som kronkronbea hɔ ne Ɔsɔfoɔ Aaron ntade kronkron ne ne mma ntadeɛ a wɔde bɛdi asɔfoɔ no.

⁴²Sɛdeɛ AWURADE hyɛɛ Mose no nyinaa, saa ara na Israelfoɔ yɛɛ adwuma no nyinaa.

⁴³Na Mose hwɛɛ adwuma no nyinaa, na hwɛ, wɔayɛ no sɛdeɛ AWURADE hyɛeɛ no, saa ara pɛ na wɔyɛeɛ. Na Mose hyiraa wɔn.