Read New Revised Asante Twi Bible Hiob 10 Bible Online

Hiob 10 - New Revised Asante Twi Bible bible

Hiob 10

¹Me nkwa yɛ me kra nwunu, mɛgyaa m’apinisie mu wɔ me mu, mɛkasa m’awerɛhoɔ mu.

²Mɛse Onyankopɔn sɛ: Mmu me fɔ, ma menhunu adekodeɛ a enti wo ne me ham yi.

³Ɛyɛ ma wo sɛ wohyɛ obi soɔ anaa, sɛ wopo wo nsa ano adwuma na wopene abɔnefoɔ agyina soɔ?

⁴ Wowɔ honam aniwa anaasɛ wohunu adeɛ sɛ ɔdasani hu no?

⁵Wo nna te sɛ ɔdasani nna anaa wo mfeɛ te sɛ onipa nna anaa?

⁶Sɛ wohwehwɛ me mfomsoɔ akyiri kwan na wodi me bɔne akyire?

⁷Nanso wonim sɛ menyɛ ɔbɔnefoɔ, na obi nni hɔ a ɔbɛgye wo nsam.

⁸ Wo nsa na ɛnwonoo me na ɛyɛɛ me, me nipa mu nyinaa prɛko, ɛnna woamene me yi.

⁹ Kae sɛ wonwonoo me sɛ anwommoɔ, na wobɛma madane mfuturo bio anaa?

¹⁰Anaa woanhwie me angu sɛ nufosuo na womaa mepii sɛ nufosuo a akyenkyen ɛtoa?

¹¹Wode wedeɛ ne nam na ɛhyɛɛ me, na wode nnompe ne ntini wurawuraa me mu.

¹²Nkwa ne adɔeɛ na wode ayɛ me, na wo hwɛ nso wɛn me honhom.

¹³Na yeinom na wode siee w’akomam; na mahunu sɛ yei na wowɔ tia me.

¹⁴Sɛ meyɛ bɔne a, wobɛhwɛ me, na woremmu me bem me mfomsoɔ ho.

¹⁵Sɛ medi abɔnefosɛm a, mennue, na sɛ metene nso a, meremma me tiri so; ɛfiri sɛ ahohora ahyɛ me ma, na mehwɛ m’amanehunu.

¹⁶ Na sɛ mema me ho so a, wobɛti me sɛ gyata na woasane ne me adi anwanwasɛm.

¹⁷Na wode w’adansefoɔ afoforɔ ara abɛgyina m’anim, na woama w’abufuo adɔɔso me so, na ɛdɔm a ɛto dɔm agu me so.

¹⁸ Adɛn nti na woyii me firii yafunu mu? Anka menya megyaa mu na ani biara anhu me ɛ!

¹⁹Sɛ menya meyɛɛ sɛ adeɛ a ɛnni hɔ ɛ! Mefirii yafunu mu no, ɛnna anka wɔkɔgyaa me ɛda mu ɛ!

²⁰Me nna nyɛ kakraa bi? Ma no nnyaa me, ɔnyi n’ani mfiri me so, na me ho nsane me kakra,

²¹ ansa na makɔ deɛ merensane memma, na makɔ sum ne sunsum asase so,

²²esum kabii a ɛte sɛ ɔdasuom tumm asase, sunsum ne sakasaka asase a hann te sɛ ɔdasuom tumm no.