Read New Revised Asante Twi Bible Hiob 13 Bible Online

Hiob 13 - New Revised Asante Twi Bible bible

Hiob 13

¹Hwɛ, m’ani ahunu ne nyinaa, m’aso nso ate, na ate aseɛ;

² deɛ monim no, me nso menim. Mentɔ mu wɔ mo mu.

³Me deɛ, mepɛ sɛ anka me ne Otumfoɔ no mmom bɛkasa, na mehwehwɛ sɛ me ne Onyankopɔn bɛyiyi nsɛm ano.

⁴Na mo deɛ, moyɛ atorofoɔ mapa, ayaresafoɔ ahuhufoɔ ne mo nyinaa.

⁵ Sɛ momua mo ano mmom koraa a, anka ɛyɛ mo nyansa.

⁶Montie me nkurobɔ, na monyɛ aso mma m’anoyie.

⁷Mobɛka deɛ ɛntene ama Onyankopɔn, na mode nnaadaa aka ama no anaa?

⁸Mobɛgye ne ti, anaasɛ mobɛham ama Onyankopɔn?

⁹Ɔhwehwɛ mo mu a, ɛbɛsi yie, anaasɛ mobɛdaadaa no sɛdeɛ wɔdaadaa ɔdasani?

¹⁰Sɛ mohwɛ nnipa anim kokoa mu a, ɔbɛka mo anim ampa.

¹¹Ne kɛseyɛ rentu mo akoma, na ne ho hu mma mo so?

¹²Mo kasammebuo yɛ nso mmebusɛm, mo anoyie yɛ dɔteɛ anoyie.

¹³Mommua mo ano mfiri me so, na me ara menkasa, na deɛ ɛbɛba me soɔ mmra.

¹⁴Adɛn nti na memfa me honam mentua me se ano, na memfa me kra mento me nsam?

¹⁵Sɛ ɔreku me mpo a, mehwɛ ɔno ara; mede me nsɛm bɛto n’anim.

¹⁶Yei ara nso na ɛbɛyɛ me nkwagyeɛ, ɛfiri sɛ ɔbɔnefoɔ remma n’anim.

¹⁷Montie, montie deɛ mewɔ meka, na m’asɛm nkyerɛaseɛ nhyɛne mo aso mu.

¹⁸Hwɛ, masiesie m’asɛm mato hɔ, menim sɛ me na mɛdi bem.

¹⁹Hwan ne deɛ ɔne me bɛham? Ɛnneɛ anka mɛyɛ komm na magyaa mu.

²⁰Ao! AWURADE, sɛ woreyɛ adeɛ mmienu yi pɛ ama me a, ɛno na meremfa me ho menhunta mfiri w’anim:

²¹ Yi wo nsa firi me so kɔ akyirikyiri, na mma wo ho hu nnkuta me;

²²ɛno na frɛ me, na me nso mɛgye so, anaasɛ mɛkasa, na woabua me.

²³Me bɔne ne me mfomsoɔ yɛ ahe ara? Ma menhunu me mmarato ne me bɔne.

²⁴ Adɛn nti na wode w’ani hunta, na wobu me wo tamfo?

²⁵Wobɛyi ahahan a mframa de rekorɔ ahi, na wobɛti nkraadua a adwan?

²⁶ Na wotwerɛɛ me ho nsɛm yaya, na woma medi me mmeranteberɛ mu bɔne so adeɛ.

²⁷Wode me nan hyehyɛ ɛpa mu, na wowɛn m’akwan nyinaa, wotwa m’anammɔn ho hyeɛ.

²⁸Na onipa deɛ, ɔporɔ sɛ dufɔkyeɛ, sɛ ntoma a nweweboaa redie.