Read New Revised Asante Twi Bible Hiob 20 Bible Online

Hiob 20 - New Revised Asante Twi Bible bible

Hiob 20

¹ Ɛnna Naamani Sofar buaa sɛ:

²Me ho pere me nti, m’adwene yɛ me sɛ memmua.

³Mate atenetene a asopa me, nanso honhom firi me nhunumu mu bua me.

⁴Wonnim yei a ɛfiri tete, ɛfirii sɛ wɔde nnipa sii asase soɔ no,

⁵sɛ abɔnefoɔ ahurisidie nkyɛ, na nyaatwomfoɔ anigyeɛ yɛ berɛ tiaa bi?

⁶ Sɛ ne kɛseyɛ korɔn kɔpem ɔsoro, na ne tiri kɔka mununkum a,

⁷ ɔbɛyera koraa sɛ ne sɛbeɛ; wɔn a wɔhu no no bɛbisa sɛ: Ɔwɔ he?

⁸ Ɔbɛtu akɔ sɛ daeɛ, na wɔrenhu no, na wɔbɛpamo no akɔ sɛ anadwo adehunu.

⁹ Aniwa a ahu no renhu no bio, na ne tenabea renhu no bio.

¹⁰ Ne mma bɛpata mmɔborɔfoɔ, na ne nsa adane n’ahodeɛ ama.

¹¹Ne mmeranteberɛ mu ahoɔden hyɛɛ ne nnompe mama, na afei ɛne no abɛda dɔteɛ mu.

¹²Sɛ adebɔne yɛɛ n’anomu fremfrem, na ɔde siee ne tɛkyerɛma ase,

¹³na ɔdii adɔna na wannyaa mu, na ɔmaa no kaa ne dodom a,

¹⁴afei deɛ n’aduane asakyera ne nsono mu, nhuritia borɔ wɔ ne yam.

¹⁵Wamene adedodoɔ, na ɔbɛfe bio, Onyankopɔn bɛtu afiri ne yam.

¹⁶Ɔbɛfefe ahuritia borɔ, na ɔprammire tɛkyerɛma bɛku no.

¹⁷N’ani rennye nsuwansuwa ho, ɛwoɔ ne nufosuo ani sradeɛ asuasu nsubɔntene ho.

¹⁸ Ɔbɛdane deɛ wabrɛ ho ama, na ɔremmene, n’adeɛ a wanya no, ɔrenni ho ahurisie, sɛdeɛ ne dodoɔ teɛ no.

¹⁹Ɛfiri sɛ wapɛkyɛ mmɔborɔfoɔ apo wɔn, na wafa efie a ɛnyɛ ɔno na ɔsiiɛ.

²⁰Ɛnam sɛ ne yafunu ammee da nti, ɔrenkora deɛ n’ani gye ho no biara.

²¹Wannidi annya bi da, enti n’ahonyadeɛ rentena hɔ.

²²N’adedodoɔ mayɛ mu ne ho bɛhiahia no, amanehunufoɔ nyinaa nsa bɛba ne so.

²³Ɔbɛma n’abufuhyeɛ aba ne so ama no de ahyɛ n’afuru ma, na ɔbɛma no atɔ agu ne so de ayɛ n’aduane.

²⁴Ɔdwane firi dadeɛ akodeɛ ano a, kɔbere mfrafraeɛ agyan bɛwɔ no ahwire ne mu;

²⁵ ɔtu firi ne honam mu na agyan no firi ne bɔnwoma mu a, owuo ho hu bɛtɔ ne so.

²⁶ Wɔde sum nyinaa asie n’akoradeɛ, ogya a obi mfite mu bɛhye no, ɛbɛhye deɛ aka ne ntomadan mu.

²⁷Ɔsoro bɛyi n’amumuyɛ adi, na asase bɛsɔre atia no.

²⁸Wɔbɛsoa ne fie ahonyadeɛ akɔ, wɔbɛtwe akɔ, n’abufuo da no.

²⁹Yei ne onipa ɔbɔnefoɔ kyɛfa a ɛfiri Nyankopɔn nkyɛn, ne n’agyapadeɛ a Onyankopɔn ahyɛ ama no no.