Read New Revised Asante Twi Bible Hiob 27 Bible Online

Hiob 27 - New Revised Asante Twi Bible bible

Hiob 27

¹Na Hiob kɔɔ so maa n’abebusɛm so sɛ:

²Sɛ Onyankopɔn a wayi me bem korɔ ne Otumfoɔ a ɔhyɛ me kra awerɛhoɔ no te aseɛ yi, —

³na m’ahome nyinaa da so wɔ me mu, na Nyankopɔn ahome da so wɔ me hwene mu yi,

⁴ ampa ara, m’ano renka amumuyɛsɛm, na me tɛkyerɛma renka nnaadaasɛm!

⁵Ɛmpare me sɛ mɛbu mo bem; meremma wɔnyi me mudie mfiri me ho de bɛkɔ akɔsi sɛ mɛgyaa mu.

⁶ Mɛkura me tenenee mu denden, na merennyaa mu; m’akoma remmu me fɔ, me nna biara ho.

⁷Me tamfo nyɛ sɛ ɔbɔnefoɔ, na deɛ ɔma ne ho so tia me no nyɛ sɛ omumuyɛfoɔ.

⁸ Na ɛdeɛn ne ɔbɔnefoɔ anidasoɔ berɛ a wɔtwa ne nkwa soɔ, berɛ a Onyankopɔn twe ne kra korɔ no?

⁹Onyankopɔn bɛte ne sufrɛ berɛ a ahohiahia bɛba ne soɔ no anaa?

¹⁰Anaasɛ n’ani bɛgye Otumfoɔ ho, ɔbɛfrɛ Onyankopɔn berɛ nyinaa mu anaa?

¹¹Mɛkyerɛ mo Nyankopɔn nsa ho asɛm, deɛ ɛwɔ Otumfoɔ hɔ no, merensi so.

¹²Hwɛ, mo deɛ, mo nyinaa moahunu, na adɛn na moda so di ahuhusɛm yi?

¹³Yei ne onipa ɔbɔnefoɔ kyɛfa a ɔnya no Onyankopɔn hɔ, ne nhyɛsofoɔ agyapadeɛ a wɔnya no Otumfoɔ nsam:

¹⁴ Sɛ ne mma dɔɔso a, wɔdɔɔso ma afena, na wɔn a wɔfiri ne mu no aduane remmee wɔn.

¹⁵Ne nnipa a wɔbɛka no, owuyadeɛ mu na wɔbɛsie wɔn, na n’akunafoɔ rensu.

¹⁶Sɛ ɔboa dwetɛ ano sɛ mfuturo, na ɔsiesie ntadeɛ sɛ dɔteɛ a,

¹⁷ ɔsiesie deɛ, nanso ɔteneneeni na ɔbɛhyɛ, na dwetɛ no, deɛ ɔdi bem na ɔbɛkyɛ mu.

¹⁸Ɔsi ne dan sɛ abubummabaa, na ɛte sɛ sese a ɔwɛmfoɔ yɛ.

¹⁹Ɔrekɔda, na ɔyɛ ɔdefoɔ, nso ɔrenna so nyɛ saa bio; ɔbɛbue n’ani na ɔnni hɔ bio.

²⁰Ahuyideɛ fa no sɛ nsuo, anadwo na ahum wia no korɔ.

²¹Apueeɛ mframa soa no kɔ, na ɛhwim no firi ne tenabea.

²²Na ɔto gu ne so, na ɔnni ne ho adɔna, dwane ara na ɔrepɛ adwane afiri ne nsam.

²³Wɔbɛbobɔ nsam agu ne so, na wɔabɔ ne so hwerɛma de no afiri ne tenabea akɔ.