Read New Revised Asante Twi Bible Hiob 3 Bible Online

Hiob 3 - New Revised Asante Twi Bible bible

Hiob 3

¹Yei akyiri no, Hiob buee n’ano na ɔdomee n’awoda.

²Na Hiob kaa sɛ:

³ Ma ɛda a wɔwoo me mu no nyera, ne anadwo a ɛse: Wɔanyinsɛn ɔbabanin no.

⁴Ɛda no nnuru sum, mma Onyankopɔn mmfiri soro mmmisa akyiri kwan, na hann biara nnhyerɛn so.

⁵Esum ne sunsum nnye no, mununkum ntena so, deɛ ɛma adekyeeɛ duru sum nyi no hu.

⁶Anadwo no, esum kabii nkuta no, wɔmmma no nnnya anigyeɛ biara afe nna no mu, wɔmmma no mmma abosome dodoɔ no mu.

⁷Hwɛ, anadwo no nyɛ kwawee, ahurisie dwom biara mma mu.

⁸Ma wɔn a wɔdome da no mmɔ no dua, wɔn a wɔtumi hwanyan dɛnkyɛmmirampɔn mpo no.

⁹N’ahemadakye nsoromma bɛduru sum, ɛbɛtwɛn hann, na ebi remma, na ɛrenhunu adekyeeɛ anisuatɛtɛ.

¹⁰Ɛfiri sɛ anto m’awoɔ apono mu, na anyi ɔhaw anhunta m’ani.

¹¹Adɛn nti na manwu yafunu mu, na mannyaa mu, awoeɛ?

¹²Adɛn nti na anankoroma sɔɔ me, na adɛn nti na metoo nufoɔ menumiiɛ?

¹³Anka sɛsɛɛ meda hɔ mayɛ komm, anka mada, ɛno deɛ anka manya ahomegyeɛ,

¹⁴me ne ahemfo ne asase so afotufoɔ a wɔkyekyeree amamfo faeɛ no,

¹⁵anaasɛ me ne mmapɔmma a wɔwɔ sika, wɔn a wɔde dwetɛ hyehyɛɛ wɔn afie amaama no.

¹⁶Anaasɛ menni hɔ sɛ ɛpɔn ba a wɔakora no, anaa nkɔkoaa a wɔanhunu hann da.

¹⁷Ɛhɔ na abɔnefoɔ nha obiara bio, na abrɛfoɔ gye wɔn ahome.

¹⁸Ɛhɔ ara na nneduafoɔ te dwoodwoo, wɔnte apiafoɔ nne.

¹⁹Ɛhɔ na onipa ketewa ne onipa kɛseɛ wɔ, na akoa afiri ne wura nsa.

²⁰Adɛn nti na ɔma mmɔborɔni hann, na ɔde nkwa ma wɔn a wɔn kra werɛ ahoɔ,

²¹ wɔn a wɔtwɛn owuo, na ɛmma, na wɔbɔre hwehwɛ no sene akoradeɛ,

²²wɔn a wɔn ani gye mmorosoɔ, na wɔn ho sɛpɛ wɔn sɛ anka wɔbɛnya damena,

²³ ne ɔbarima a wɔde ne kwan ahunta, na Onyankopɔn de ban atwa ne ho ahyia?

²⁴Na m’apinisie abɛsi m’aduane ananmu, na mesu gu sɛ nsuo.

²⁵Na deɛ mesuro no, ɛno ara na ɛto me, na deɛ m’akoma tutu ho no, ɛba me so.

²⁶Mennya ahodwoɔ ne kommyɛ ne ɔhome, na ahodwan ara na ɛba.