Read New Revised Asante Twi Bible Hiob 32 Bible Online

Hiob 32 - New Revised Asante Twi Bible bible

Hiob 32

¹Ɛnna mmarima baasa yi gyaee Hiob bua, ɛfiri sɛ ɔyɛ n’ani so teneneeni.

² Na Busini Elihu a ɔyɛ Barakel ba a ɔfiri Ram abusua mu bo fui. Hiob na ne bo fuu no, ɛfiri sɛ ɔbu ne ho teneneeni sene Onyankopɔn.

³ Na ne bo fuu ne mfɛfoɔ baasa no nso, sɛ wɔnnya mmuaeɛ bi bio, nanso wɔbuu Hiob fɔ.

⁴Na Elihu twɛn maa Hiob kasae ansa, ɛfiri sɛ wɔsene no panin.

⁵Na Elihu hunuu sɛ mmuaeɛ biara nni mmarima baasa no anomu bio no, ne bo fui.

⁶Na Busini Elihu a ɔyɛ Barakel ba buaa sɛ: Me deɛ, meyɛ abɔfra, na mo deɛ moyɛ nkɔkoraa, enti na metɔɔ me bo aseɛ, na mesuroo sɛ mɛka deɛ menim makyerɛ mo.

⁷ Mekaa sɛ: Wɔmma onyinkyerɛ nkasa, aane, na mfeɛ dodoɔ nkyerɛ nyansa.

⁸Ampa, honhom a ɛwɔ ɔdasani mu ne Otumfoɔ ahome na ɛma no nhunumu.

⁹Ɛnyɛ wɔn a wɔanyini pii na wɔnim nyansa, na ɛnyɛ mpanin na wɔhunu atemmuo mu.

¹⁰Enti na mese: Montie me; me nso mɛkyerɛ deɛ menim.

¹¹Hwɛ, matwɛn ama mo akasa awie, mayɛ aso mama mo nhunumusɛm, sɛ mobɛhwehwɛ anya nsɛm.

¹²Na mewɛn m’aso sɛ meretie mo, na hwɛ, obiara nni mo mu a n’asɛm tɔɔ Hiob aso mu, na ɔtumi buaa ne nsɛm no.

¹³Na monnka sɛ: Yɛahunu nyansa; Onyankopɔn na ɔnha no, na ɛnyɛ onipa.

¹⁴Ɛfiri sɛ ɛnyɛ me na ɔkaa ne nsɛm no kyerɛɛ me, na me nso, meremfa mo nsɛm no memmua no.

¹⁵Wɔn abam abu, wɔremmua bio, na wɔn anomu nsɛm nso asa.

¹⁶Na sɛ wɔnkasa bio, na wɔgyina hɔ, na wɔmmua bio nti, mentwɛn anaa?

¹⁷Me nso mɛbua me fam deɛ, me nso, mɛkyerɛ deɛ menim.

¹⁸Na nsɛm ahyɛ me ma, na honhom a ɛwɔ me mu no hyɛ me.

¹⁹Hwɛ, me yam te sɛ nsa a wɔntuu ano, sɛ nsa kotokuo foforɔ a ɛrepɛ apaeɛ.

²⁰Mɛkasa, na manya ahomeyɛ; mɛbue m’ano, na mabua.

²¹Ɛmpare me sɛ mɛhwɛ obi anim, na madɛfɛdɛfɛ m’ano mama onipa,

²²na mennim m’ano adɛfɛdɛfɛ, anka ebia ɛbɛka ketewaa sɛɛ, na me yɛfoɔ afa me akɔ.