Read New Revised Asante Twi Bible Hiob 35 Bible Online

Hiob 35 - New Revised Asante Twi Bible bible

Hiob 35

¹Na Elihu kɔɔ so ara kaa sɛ:

² Wobu no sɛ ɛtene, anaa woka sɛ: Me tenenee sene Nyankopɔn deɛ,

³ sɛ woka sɛ: Ɛbɛyɛ me mfasoɔ bɛn? Na mfasoɔ bɛn na mɛnya asene sɛ anka meyɛɛ bɔne?

⁴Me deɛ, mede nsɛm bɛbua wo ne wo mfɛfoɔ a wɔka wo ho no.

⁵Hwɛ ɔsoro, na hunu, na hwɛ mununkum a ɛkorɔn sene woɔ no.

⁶ Sɛ woyɛ bɔne a, ɛdeɛn na wode yɛ no, na sɛ wo mmarato dɔɔso a, ɛdeɛn na woyɛ no?

⁷ Sɛ wotene a, ɛdeɛn na wode ma no, anaasɛ wo nsam ɛdeɛn na ɔgyeɛ?

⁸Onipa a ɔte sɛ woɔ na w’abɔnefosɛm pira no, na onipa ba bi na wo tenenee bɛma no anya mfasoɔ.

⁹Nhyɛsoɔ bebrebe nti na ɛma wɔteam, wɔsu frɛ ɔboafoɔ, nnipa akɛseɛ nsa ase.

¹⁰ Nanso obi nka sɛ: Ɛhe na Onyankopɔn, me yɛfoɔ no wɔ? Deɛ ɔma nnwom anadwo,

¹¹deɛ ɔkyerɛ yɛn nimdeɛ sene asase so mmoa, na ɔkyerɛ yɛn nyansa sene ɔsoro nnomaa no.

¹²Ɛhɔ na wɔteam, na ɔmmua, abɔnefoɔ ahantan nti.

¹³ Ampa ara Onyankopɔn rentie ahuhusɛm, na Otumfoɔ remmu.

¹⁴ Na nkantom sɛ wose: Wonhu no deɛ nanso asɛm no da n’anim, na wotwɛn no ara!

¹⁵ Na afei ɛnam sɛ ɔmmɛtwee aso, n’abufuo mu, na ɔnni amumuyɛ akyiri pii nti,

¹⁶Hiob bue n’ano kwa, na nimdeɛ a ɔnnie mu, ɔma nsɛm dɔɔso.