Read New Revised Asante Twi Bible Hiob 4 Bible Online

Hiob 4 - New Revised Asante Twi Bible bible

Hiob 4

¹Ɛnna Temanni Elifas bua see sɛ:

²Sɛ obi pɛ sɛ ɔka asɛm yi ho bi kyerɛ wo a, ɛbɛyɛ wo ahomete anaa? Nanso mpo twa ara na ɛtwa sɛ ɔka?

³Hwɛ, wo na woatenetene nnipa bebree, na nsa a agoɔ no, woahyɛ no den;

⁴wo nsɛm ama deɛ ɔrebɛhwe ase agyina, na nankoroma a ahodwo no, wɔahyɛ no den.

⁵Na afei ɛtoo woɔ yi, woagyigya, ɛkaa woɔ yi, woabɔ nnyinnyen.

⁶Ɛnyɛ wo Nyamesuro ne deɛ wode wo ho to soɔ, na w’akwan a ɛtene ne w’anidasoɔ anaa?

⁷Kae ɛ, hwan na ɔnyɛɛ bɔne biara na wɔasɛe no pɛn, anaa ɛhe na wɔatwa ateneneefoɔ atwene pɛn?

⁸ Manya nhunui sɛ wɔn a wɔfɛntɛm amumuyɛ na wɔgu mmusuo no, ɛno ara na wɔtwa.

⁹Nyankopɔn home sɛe wɔn, na wɔhye, n’abufuo mframa ano.

¹⁰Wote sɛ gyata mmobɔmu ne ɔsebɔ nne a ɛgyae, na gyataburuwa sebɔmmɔfoɔ tutu no.

¹¹Ɛno na hanam bɛbɔ ɛserɛ-mu-sɛe ama no awu, na gyatabereɛ mma abɔ pete.

¹²Na me deɛ, asɛm bi wiawiaa ne ho baa me nkyɛn, na m’aso tee ɛho asomusɛm bi.

¹³Ɔdadwene a ɛfiri anadwo adehunu mu mu, berɛ a nnahɔɔ atɔ nnipa soɔ no,

¹⁴ ehu ne ahopopoɔ kaa me, na ɛmaa me nnompe nyinaa wosoe.

¹⁵Na honhom bi twaa mu faa m’ani so, me ho nwi nyinaa sɔre gyinagyinae,

¹⁶ɛgyinae, nanso manhunu ne su, suban bi gyinagyina m’ani so, metee nne bɔkɔɔ bi sɛ:

¹⁷Ɔdasani tene sene Onyankopɔn, anaa onipa ho te sene ne yɛfoɔ?

¹⁸ Hwɛ, ne nkoa mpo, ɔmfa ne ho nto wɔn so, na n’abɔfoɔ no, ɔbu wɔn sɛ wɔtɔ mu;

¹⁹ na nkantom wɔn a wɔte dɔteɛ adan mu, na wɔn nnyinasoɔ wɔ mfuturo mu, na wɔfurofuro wɔn sɛ abubummabaa.

²⁰Ɛfiri anɔpa kɔsi anwummerɛ na wɔaposa wɔn; wɔyera korakora a obi nnwene ho.

²¹Sɛ wɔtete wɔn ho ntomadan homa a, ɛnyɛ wuo na wɔwuo a wɔanhunu nyansa biara?