Read New Revised Asante Twi Bible Hiob 41 Bible Online

Hiob 41 - New Revised Asante Twi Bible bible

Hiob 41

¹ Wobɛtumi atwe dɛnkyɛmmirampɔn darewa ano, na wode homa akyekyere ne tɛkyerɛma anaa?

²Wode kaa bɛhyɛ ne hwenem, na wode nkɔtɔkorɔ ahwire n’afono mu?

³Ɔbɛkoto asrɛ wo pii, anaa ɔbɛyɛ n’ano brɛbrɛ akyerɛ wo?

⁴Ɔne wo bɛpam apam sɛ fa no yɛ akoa daa?

⁵Wo ne no bɛgoro sɛ anomaa, na woasa no ahoma ama wo mmabaa anaa?

⁶Apofofoɔ asafo bɛsi no koso, na wɔakyɛ ne mu adwadifoɔ mu?

⁷Wode mpea bɛhyɛ ne wedeɛ mu ma, na wode mpataa mpɛmɛ awowɔ ne tirim?

⁸Fa wo nsa ka no hwɛ, na deɛ wobɛhunu no, woremmɛn no bio!

⁹Hwɛ onipa anidasoɔ yɛ ohunu. Ɛnyɛ ne hwɛ mpo na ɛma obi hwe aseɛ?

¹⁰Obi rensi ne bo sɛ ɔbɛhwanyan no, na hwan ne deɛ ɔbɛtumi agyina n’anim?

¹¹Hwan na wadi kan ama me biribie, na menhyɛ no ananmu? Deɛ ɛwɔ ɔsoro nyinaa aseɛ, me na ɛwɔ me.

¹²Merennyae ne honam adeɛ, ne ne mmaninyɛ ne n’aboaban fɛ a ɛyɛ no ho asɛnka.

¹³Hwan na ɔbɛyi ne ho abon? Ne se kyerɛpɛn mmienu no, hwan na ɔbɛkɔ anim?

¹⁴N’anim apono nso, hwan na ɔbɛhini? Ne se ho yɛ hu.

¹⁵N’akyɛm akyerɛpɛn yɛ fɛ, wɔatotom sɛ adeɛ a wɔasɔ ano.

¹⁶Ɛpempam so pɛpɛɛpɛ a mframa nnya mu kwan;

¹⁷ɛfemfam ho, ɛdi nsosɔmu na emu nni ateyɛ.

¹⁸Ne nwansi ma hann hyerɛn, na n’ani te sɛ adekyeeɛ anisuatɛtɛ.

¹⁹Agyatɛnee firi n’anomu, ogya nturituriiɛ fifiri mu.

²⁰Wisie firi ne hwene mu tokuro mu, sɛ ɛsɛn a emu rehuro ne nkyɛkyerɛ a ɛrehyeɛ mu.

²¹N’ahome sɔ nsramma, na ogyaframa firi n’anomu.

²²Ne kɔn mu na ahoɔden wɔ, na akomatuo sa wɔ n’anim.

²³Ne honam a ɛsensɛne hɔ femfam ho pintinn, wɔguu no ne ho, na ɛntwe.

²⁴N’akoma yɛ den sɛ ɔboɔ, ɛyɛ den sɛ oyuyammoɔ.

²⁵Sɛ ɔma ne ho so a, atumfoɔ ho popo, na ehu ma wɔn ani so yɛ wɔn krakra.

²⁶Wɔde nkrantɛ ka no a, ɛnka, pea ne pɛmɛ a wɔtoɔ ne dadeɛ akodeɛ mpo;

²⁷ɔbu dadeɛ sɛ ntɛtɛ, ne kɔbere mfrafraeɛ sɛ duawuiɛ;

²⁸agyan nka no ngu, ntɔmmoɔ mu aboɔ yɛ no sɛ nkyɛnkyɛmma;

²⁹ɔbu aporibaa sɛ nkyɛnkyɛmma, na ɔsere pea a wɔtoɔ huuyɛ.

³⁰N’ase yɛ abono hwetahweta, ɔbua atɛkyɛ so sɛ poreɛ adeɛ.

³¹Ɔma ebunu mu huru sɛ ɛsɛn mu, ɔyɛ po sɛ sradeɛ;

³²Ɔma ɔkwan hyerɛn di n’akyi, ma wɔbu ebunu a ɛhuro no sɛ ɛdwono.

³³Ne nsɛsoɔ nni asase so; wɔyɛɛ no sɛ n’akoma nntu;

³⁴ɔhwɛ adeɛ a ɛkorɔn nyinaa; ɔne ahokyerɛ mma nyinaa hene.