Read New Revised Asante Twi Bible Hiob 6 Bible Online

Hiob 6 - New Revised Asante Twi Bible bible

Hiob 6

¹Na Hiob gyee so sɛ:

²O, sɛ anka wɔrekari m’awerɛhoɔ, na wɔde me yea nso agu nsania mu susu ɛ!

³Ɛno deɛ anka ɛbɛsene mpoano anwea duru, enti na me nsɛm ayɛ hatuhatu yi,

⁴ na Otumfoɔ agyan tuatua me mu, me honhom renom emu borɔ, Nyankopɔn ahuyideɛ atwa me ho mpasua.

⁵Ɔtorɔmo nya ɛserɛ mono a, ɔteateam? Anaa ɔnantwie su n’aduane ho?

⁶Wɔdi aduane hunu a nkyene nni mu? Ɛdɛ bi wɔ kosua mu fufuo mu?

⁷Adeɛ a me kra ampɛ sɛ ɛbɛka me no, ɛno ara na ayɛ me aduane a ɛyɛ me nwunu.

⁸O, sɛ anka merenya m’abisadeɛ, na Onyankopɔn ama me m’anigyinadeɛ no ɛ!

⁹Sɛ Onyankopɔn pene na ɔpɛkyɛ me, na ɔgya ne nsa kwan na ɛtwa me ɛ!

¹⁰Anka ɛbɛyɛ me awerɛkyekyerɛ ara na madi ahurisie, ɛyea a ɛnni adɔna me soɔ no mu, ɛfiri sɛ mensane Ɔkronkronni no nsɛm no!

¹¹M’ahoɔden ne deɛn, sɛ mede bɛtɔ me bo aseɛ, na m’awieeɛ ne deɛn, sɛ me kra bɛkyɛre ho?

¹²M’ahoɔden yɛ aboɔ ahoɔden, me honam yɛ kɔbere mfrafraeɛ?

¹³Ɛnyɛ mmoa bi na ɛnni me mu, na wɔatu ahoɔden afiri me ho?

¹⁴Deɛ ne home te no no, ɛsɛ no ne yɔnko nsam adɔeɛ; anyɛ saa a, ɔgyaa Otumfoɔ no suro.

¹⁵ Me nuanom twa nkontompo sɛ asusɔsuwa, sɛ subonhwa a emu nsuwansuwa resene korɔ.

¹⁶Nsukyeneeɛ nti ani fono, sukyerɛmma hyɛne mu hunta.

¹⁷Sɛ hyehyeɛ ka no a, ɛtwitwa, ahuhuro mu ɛyera firi n’afa.

¹⁸N’akwantemfoɔ no kwan kontonkonton, ɛdane huruhuro kɔ soro na ɛyera.

¹⁹ Tema akwantemfoɔ asafo no hwɛe, Seba anantefoɔ ani daa so,

²⁰wɔn ani wuu sɛ wɔde wɔn ani too soɔ, wɔkɔduruu ho, na wɔn anim guu ase.

²¹Na afei saa ara na mo nso moteɛ, moahunu m’amanehunu yi, moannya tema biara amma me.

²²Maka sɛ mommrɛ me biribi, na me nti momfa mo adeɛ bi nkyɛ,

²³na monyi me ɔhohiahiafoɔ nsam, na monnye me mfiri nhyɛsofoɔ nsam anaa?

²⁴Monkyerɛkyerɛ me, na mɛyɛ komm, na deɛ mafom wɔ mu no, momma menhunu.

²⁵Sɛdeɛ atɛntenenee si yɛ den fa! Na mo atɛnyie yi deɛ, animka bɛn na ɛwɔ mu?

²⁶Nsɛm ho animka na modwene? Ɔwerɛhoni deɛ, ne nsɛm yɛ mframa.

²⁷Awisiaa so mpo moretwe ntonto, na mo yɔnko tiri nso moredi ano.

²⁸Na afei mompɛ ani pa nhwɛ me, na merenni torɔ mo anim ha.

²⁹Mompɛ mu bio ɛ, na mommmu ntɛnkyea; na monsane mpɛ mu, na m’asɛm wom ara.

³⁰Deɛ ɛntene bi wɔ me tɛkyerɛma so, anaasɛ me dodom nhunu abusudeɛ?