Read New Revised Asante Twi Bible Hiob 7 Bible Online

Hiob 7 - New Revised Asante Twi Bible bible

Hiob 7

¹ Ɛnyɛ akodie na ɛwɔ hɔ ma ɔdasani asase soɔ na ne nna te sɛ ɔpaani nna?

²Sɛ akoa pere onwunu ho ne sɛ ɔpaani hwɛ n’apaadeɛ kwan no,

³saa ara na wɔama madi abosome hunu, na wɔabu ɔhaw anadwo ama me.

⁴Sɛ mekɔda a, meka sɛ: Da bɛn na mɛsɔreɛ na anadwo atwam akorɔ? Ɔdafatwa fono me kɔsi ahemadakye.

⁵Me honam fira mmoaa ne dɔteɛ abon, me wedeɛ ayɛ twann, na ɛrefiri nsuo.

⁶ Me nna yɛ hare sene ɔnwomfoɔ akurokurowa, na ɛrehi, na anidasoɔ biara nni hɔ.

⁷Kae sɛ me nkwa yɛ mframa, m’ani rensane nhunu papa.

⁸Deɛ ɔhu me anisoɔ renhu me bio, w’ani tua me, nso na menni hɔ.

⁹Sɛdeɛ mununkum sa na ɛkorɔ no, saa ara na deɛ ɔsiane kɔ Asamando no remforo mma bio.

¹⁰ Ɔrensane mma ne fie bio, na ne tenabea renhu no bio.

¹¹Enti me nso meremmua m’ano, mɛkasa me honhom ahohiahia mu, mɛsi apini m’awerɛhoɔ mu.

¹²Meyɛ ɛpo anaa asuo mu bɔpɔn, na ɛma wode awɛmfoɔ sisi me ho yi?

¹³Sɛ mese: Me mpa bɛkyekyere me werɛ, na me daberɛ bɛdwodwo m’apinisie no a,

¹⁴ɛnneɛ wode daeɛso hyɛ me yea, na anisoadehunu mu na woma mebɔ binim.

¹⁵Na ɛma me kra yi menebɔ ne owuo mmom sene me nnompe yi.

¹⁶ Afono me, merentena ase daa. Gyaa me, na me nna yɛ huruhuro.

¹⁷ Ɔdasani ne hwan a wobu no ɔkɛseɛ, na wodwene ne ho?

¹⁸Na wohwɛ no daa anɔpa, na wotaa sɔ no hwɛ ara?

¹⁹Worenyi w’ani mfiri me so de rekɔsi da bɛn? Wonnya me kwan na memmene me ntasuo mpo?

²⁰Mayɛ bɔne a, ɛdeɛn na mayɛ woɔ, nnipa hwɛfoɔ, adɛn na wode me ayɛ w’adeɛ a wo ne no anya na madane adesoa ama me ho yi?

²¹Na adɛn na womfa me mmarato nkyɛ, na womma me mfomsoɔ nsene nkorɔ? Na afei mɛda mfuturo mu, na wobɛhwehwɛ me, nso na menni hɔ bio.