Read New Revised Asante Twi Bible Hiob 9 Bible Online

Hiob 9 - New Revised Asante Twi Bible bible

Hiob 9

¹Na Hiob gyee so sɛ:

² Ampa ara, menim sɛ ɛte saa, na ɔdasani bɛtene wɔ Nyankopɔn anim sɛn?

³ Sɛ ɔpɛ sɛ ɔne no yiyi ano a, ɔntumi mmua no apem mu baako mpo.

⁴Akoma mu nyansafoɔ ne tumi mu hoɔdenfoɔ no, hwan na wasene ne kɔn wɔ ne soɔ na asi no yie?

⁵Ɔtutu mmepɔ mpatuo mu, ɔbutu no n’abufuo mu.

⁶Ɔwoso asase firi n’atenaeɛ, na ne nnyinasoɔ popo.

⁷Ɔhyɛ owia, na ɛmpue; na ɔsosɔ nsoromma ano.

⁸ Ɔno nko na ɔtrɛ ɔsoro mu, na ɔtiatia po asorɔkyeɛ so;

⁹ ɔyɛ Nsorommason, Nwenwenente ne Akokɔbaatan-ne-ne-mma ne anafoɔ fam mpiakyire.

¹⁰ Ɔyɛ ade akɛseɛ a ɛnni nhwehwɛmu ne anwanwadeɛ a wɔntumi nkan.

¹¹Hwɛ, ɔnam me ho, nso menhu no, ɔsene, nso menhu no.

¹²Hwɛ, ɔhwim kɔ, hwan na ɔbɛsane no? Hwan na ɔbɛbisa no sɛ: Ɛdeɛn na woreyɛ yi?

¹³ Onyankopɔn rensianka n’abufuo, Rahab aboafoɔ brɛ wɔn ho ase wɔ n’ase.

¹⁴Na nkantom sɛ me na mɛbua no, anaasɛ mɛhwehwɛ me nsɛm mu, na me ne no ayiyie.

¹⁵Ɔno na sɛ metene mpo a, meremmua no, mɛkoto no sɛ me temmufoɔ.

¹⁶Sɛ mefrɛ na ɔgye me so a, merennye menni sɛ wayɛ aso ama me nne.

¹⁷Ɔno a ɔde ahum posa me, na ɔma m’akuro dɔɔso kwa no,

¹⁸ɔmmma mennya ahomegyeɛ, na ɔde awerɛhoɔ hyɛ me ma tɔ.

¹⁹ Sɛ wɔdi no ɔhoɔdenfoɔ tumi so a, anka: Ɔnnie! Na sɛ atemmuo nso a, anka: Hwan na ɔbɛsane no?

²⁰Sɛ metene mpo a, anka m’ano bɛbu me fɔ, na medi mu mpo a, ɔbɛma makyea.

²¹Me deɛ, medi mu deɛ, nanso memmu me ho; me nkwa afono me.

²² Ne nyinaa yɛ bafua; enti na mese: Deɛ ɔdi mu ne ɔbɔnefoɔ nyinaa na ɔsɛe wɔn.

²³Sɛ atoyerɛnkyɛm kum obi mpofirim a, ɔseresere wɔn a wɔdi bem amaneɛ.

²⁴Wɔde asase ahyɛ ɔbɔnefoɔ nsa, ɔkata n’atemmufoɔ ani. Sɛ ɛnyɛ ɔno a, na ɛyɛ hwan a?

²⁵Na me nna ho yɛ hare sene mmirikatuni; ɛdwane kɔ, ɛnhunu adepa biara.

²⁶Ɛsene kɔ sɛ demmire nkyɛkyerɛ hyɛn, sɛ ɔkɔdeɛ a ɔsi aduane soɔ.

²⁷Sɛ mese: Me werɛ bɛfiri m’apinisie, mɛgyae mosooyɛ na mate m’anim a,

²⁸me yea nyinaa yɛ me hu, ɛfiri sɛ mehunu sɛ woremmu me bem.

²⁹Na sɛ wɔbɛbu me fɔ a, adɛn nti na memmrɛ nguo?

³⁰Sɛ medware sukyerɛmma nsuo na mede dɔw mehohoro me nsa a,

³¹ɛno nso wode me bɛto amena mu, na me ho ayɛ me ntadeɛ mpo nwunu.

³²Na ɔnyɛ onipa sɛ me, na mabua no, na yɛn baanu ahyiam abɔ nkuro.

³³Nso ntamgyinafoɔ bi nni yɛn ntam a ɔde ne nsa bɛto yɛn baanu soɔ.

³⁴Ma no nyi n’abaa mfiri me so, na ne ho hu ankuta me.

³⁵Ɛnna anka mɛkasa a merensuro no, nanso mentumi nyɛ saa wɔ me ara m’afam.