Read New Revised Asante Twi Bible Nnwom 10 Bible Online

Nnwom 10 - New Revised Asante Twi Bible bible

Nnwom 10

¹ AWURADE, adɛn nti na wogyina akyirikyiri, na wode wo ho hunta ahokyere berɛ mu?

²Ɔbɔnefoɔ ahantan nti ɛmma mmɔborɔni ho hyehye no, wɔde wɔn atirimpɔ a wɔabɔ no kye wɔn.

³Na ɔbɔnefoɔ hoahoa ne ho ade a ne kra kɔn dɔ ho, na omimfoɔ ka abususɛm yi AWURADE ahi.

⁴Ɔbɔnefoɔ dwa n’anomu ka sɛ: Hwee mfa ne ho. Onyankopɔn bi nni baabi! n’adwene nyinaa ne no.

⁵ N’akwan yere hɔ pintinn daa nyinaa. W’atemmudeɛ asɔre n’ani so kɔ akyirikyiri, ɔmfa n’ahohiahiafoɔ nyinaa nyɛ ahuro.

⁶ Ɔse no n’akomam sɛ: Merenhinhim da, daa nyinaa merenhyia amaneɛ biara.

⁷ Nnome, nkontomposɛm ne amimdie ahyɛ n’anomu ma, na ɔhaw ne mmusuo hyɛ ne tɛkyerɛma ase.

⁸Ɔtetɛ nsumaeɛ mu, ɔdi deɛ ɔnyɛɛ hwee no awu kokoam, ɔwɔ awiɛmfoɔ ho ani.

⁹ Ɔtɛ kokoam sɛ gyata wɔ ne bɔn mu, ɔtɛ sɛ ne nsa bɛka mmɔborɔni ne nsa ka mmɔborɔni no twe no ba n’afidie mu.

¹⁰Ɔkoto, ɔdɛɛdɛɛ, na awiɛmfoɔ akɔka ne nsa.

¹¹ Ɔse no n’akomam sɛ: Nyankopɔn werɛ afi, ɔde n’ani ahunta ɔrenhunu ara da.

¹²Ao, AWURADE sɔre, ɛ! Ao, Onyankopɔn, ma wo nsa so. Mma wo werɛ mmfiri amanehunufoɔ.

¹³Adɛn nti na ɔbɔnefoɔ yi Onyankopɔn ahi ka no n’akomam sɛ: Worentwe m’aso?

¹⁴ Wohunu, ɛfiri sɛ wo na wohwɛ ɔhaw ne awerɛhoɔ, sɛ wode bɛsie wo nsam. Wo nsa na ɔbrɛfoɔ de hyɛ, awisiaa boafoɔ ne wo ara.

¹⁵ Bubu abɔnefoɔ basa, na di obusuyɛfoɔ bɔne akyi kɔsi sɛ worenhunu bio.

¹⁶ AWURADE ne hene daa daa, amanaman ayera afiri n’asase so.

¹⁷AWURADE, wobɛtie deɛ ahobrɛasefoɔ pɛ, woahyɛ wɔn akoma den, woama w’aso aba so

¹⁸sɛ wobɛdi awisiaa ne deɛ wɔhyɛ no soɔ no asɛm, na ɔdasani a ɔfiri asase mu no anhunahuna bio.