Read New Revised Asante Twi Bible Nnwom 102 Bible Online

Nnwom 102 - New Revised Asante Twi Bible bible

Nnwom 102

¹Mmɔborɔni a ne home te no a ɔyi n’abooboo gu AWURADE anim no mpaebɔ. Ao, AWURADE, tie me mpaebɔ, na ma me sufrɛ nnuru w’anim.

²Nyi w’anim nhunta me, da a me ho hia me no, brɛ w’aso ase ma me, da a mesu mefrɛ no, yɛ ntɛm gye me so.

³Na me nna hi sɛ wisie, na me nnompe adɔ sɛ mmukyia.

⁴M’akoma abo na akusa sɛ ɛfan, na m’ani apa m’aduanedie so.

⁵ M’apinisie nne nti me nnompe afemfam me wedeɛm.

⁶Mete sɛ ɛserɛ so nantwinoma, mayɛ sɛ amamfo so patuo.

⁷Mesiri pɛ, mete sɛ apatuprɛ a ɔno nko si ɛdan atifi.

⁸Da mu nyinaa m’atamfoɔ bɔ me ahohora, wɔn a wɔbɔ me so dam de me yɛ ntanka.

⁹ Na madi nso sɛ aduane, na mede esu mafra m’anonneɛ mu.

¹⁰Ɛnam w’abufuo ne w’anibereɛ so nti, na womaa me soɔ, na woato me atwene.

¹¹ Me nna te sɛ sunsum a ɛretwam, na me deɛ, mekusa sɛ ɛfan.

¹²Na wo, AWURADE deɛ, wowɔ hɔ daa, na wo nkaeɛ kɔduru awoɔ ntoatoasoɔ nyinaa so.

¹³ Wobɛsɔre abɛhunu Sion mmɔbɔ, na ɛberɛ a ɛsɛ sɛ wodom no ni, na ɛberɛ no adu.

¹⁴Na wo nkoa wɔ n’aboɔ ho akoma, na wɔn yam hyehye wɔn, ne mfuturo ho.

¹⁵Na amanaman bɛsuro AWURADE din, na asase so ahemfo nyinaa asuro w’animuonyam,

¹⁶sɛ AWURADE akyekyere Sion, wayi ne ho adi n’animuonyam mu,

¹⁷wadane n’ani akyerɛ onnibie mpaebɔ, na wampo wɔn mpaebɔ.

¹⁸Wɔbɛtwerɛ yei ama nkyirimma, na ɔman a wɔbɛbɔ wɔn no bɛyi AWURADE ayɛ,

¹⁹sɛ wafiri ne soro kronkron hɔ abrɛ n’ani ase ahwɛ fam, AWURADE firi soro na ahwɛ asase,

²⁰ sɛ ɔbɛtie apokyerɛfoɔ apinisie, na wasane owuo mma,

²¹na wɔabɔ AWURADE din Sion, na wɔaka n’ayeyie Yerusalem,

²² da a aman bɛbom aboaboa wɔn ho ano ne ahennie, sɛ wɔbɛsom AWURADE.

²³Wago me tumi mu ɔkwan mu, watwa me nna so.

²⁴ Meka sɛ: Me Nyankopɔn, mmu me nna mu mfa me, wo mfeɛ kyɛre kɔduru awoɔ ntoatoasoɔ nyinaa so.

²⁵ Tete nteredee na wohyɛɛ asase aseɛ, na ɔsoro ne wo nsa ano adwuma.

²⁶ Ɛno deɛ, ɛbɛsɛe, na wo deɛ, wotim hɔ daa. Wɔn nyinaa bɛsu sɛ atadeɛ, wobɛsakyera wɔn sɛ atadeɛ, na wɔasakyera.

²⁷ Na wone wo ara, na wo mfeɛ rensa da.

²⁸ Wo nkoa mma bɛtena ase, na wɔn asefoɔ atim w’anim.