Read New Revised Asante Twi Bible Nnwom 105 Bible Online

Nnwom 105 - New Revised Asante Twi Bible bible

Nnwom 105

¹ Monna AWURADE ase, mommɔ ne din, momma wɔnhunu ne nneyɛɛ, aman mu.

²Monto dwom mma no, monto ayeyie dwom mma no, monnwene n’anwanwadeɛ nyinaa ho nka.

³Momfa ne din kronkron nhyehyɛ mo ho, wɔn a wɔhwehwɛ AWURADE no akoma ntɔ wɔn yam.

⁴Mompɛ AWURADE ne ne tumi akyiri kwan, monhwehwɛ n’anim daa.

⁵Monkae n’anwanwadeɛ a wayɛ, n’ahodwirideɛ ne n’anom atemmusɛm no,

⁶mo, n’akoa Abraham asefoɔ, Yakob a ɔyii no no mma.

⁷Ɔno ne AWURADE yɛn Nyankopɔn, n’atemmuo wɔ asase nyinaa so.

⁸Ɔkae n’apam no de kɔsi daa, asɛm a ɔhyɛ maa awoɔ ntoatoasoɔ apem no,

⁹apam a ɔne Abraham pameeɛ no ne ne ntam a ɔkaa Isak no,

¹⁰na ɔde sii hɔ maa Yakob sɛ ahyɛdeɛ, na ɔde maa Israel sɛ daa apam no,

¹¹ sɛ: Wo na mede Kanaan asase bɛma wo sɛ mo apɛgyadeɛ a wɔkyɛ no homa soɔ.

¹²Ɛberɛ a nnipa no ano nnɔɔso, wɔyɛ kakraa bi ne ahɔhoɔ wɔ hɔ

¹³na wɔnenam firi ɔman mu kɔ ɔman mu, wɔfiri ahennie bi mu kɔ ɔman foforɔ bi mu no,

¹⁴ wamma obiara kwan sɛ ɔnhom wɔn so, na wɔn nti ɔkaa ahemfo anim sɛ:

¹⁵Monnka me nnipa a wɔasra wɔn no, na monnyɛ m’adiyifoɔ bɔne bi.

¹⁶ Na ɔmaa ɛkɔm baa asase no so, ɔbubuu aduane poma nyinaa mu;

¹⁷ Ɔsomaa onipa bi dii wɔn anim, wɔtɔn Yosef maa no kɔyɛɛ akoa.

¹⁸Wɔde mpokyerɛ miaa ne nan, de no too dadeɛ nkɔnsɔnkɔnsɔn mu

¹⁹kɔsii berɛ a n’asɛm baa mu, AWURADE asɛm sɔɔ no hwɛe.

²⁰ ɔhene soma maa wɔkɔtuu no, deɛ ɔdi aman soɔ no maa wɔkɔsanee no.

²¹Ɔde no sii ne fie so panin, ne deɛ ɔwɔ nyinaa sodifoɔ,

²²sɛ ɔnkyerɛ n’asafohene deɛ ɔpɛ, na ɔnkyerɛ ne mpanimfoɔ nyansa.

²³ Ɛnna Israel baa Misraim, na Yakob bɛsoɛɛ Ham asase so sɛ hɔhoɔ.

²⁴ Na ɔmaa ne man ase kyenee bebree, na ɔmaa wɔyɛɛ den sene wɔn ahohiahiafoɔ.

²⁵Ɔdanee wɔn akoma sɛ wɔntane ne man, na wɔmfa aniteɛ nhyɛ ne nkoa so.

²⁶Ɔsomaa n’akoa Mose ne Aaron a ɔyii no no.

²⁷ Wɔyii ne nsɛnkyerɛnneɛ sii wɔn mu, ne anwanwadeɛ, Ham asase so.

²⁸Ɔsomaa esum maa no duruu sum, nanso wɔannwene ne nsɛm ho.

²⁹Ɔdanee wɔn nsuo mogya, na ɔde kum wɔn mpataa.

³⁰Wɔn asase dɔɔ mponkyerɛne manyamanya maa wɔbaa wɔn ahemfo mpia mu.

³¹Ɔkasae, na anwansena borebore bae, ntontom baa wɔn asase nyinaa so.

³²Ɔde asukɔtweaa yɛɛ wɔn osutorɔ maa ogyaframa baa wɔn asase so.

³³Na ɔbobɔɔ wɔn bobe ne wɔn borɔdɔma, na ɔbubuu wɔn asase so nnua.

³⁴Ɔkasae, na ntutummɛ bae ne mmɛbɛ a wɔn dodoɔ nni ano,

³⁵na wɔbɛdii wɔn asase so ahahan nyinaa, na wɔdii wɔn mfuo so aduane.

³⁶Na ɔbobɔɔ wɔn asase so mmakan nyinaa, wɔn ahoɔden nyinaa mu mma a ɛdi kan.

³⁷ Na ɔde wɔn ne dwetɛ ne sika firi kɔe, na onipa a ɔyɛ mmerɛ biara nni ne mmusuakuo mu.

³⁸Wɔn adifire yɛɛ Misraimfoɔ anigyeɛ, na wɔn ho hu tɔɔ wɔn so.

³⁹ Ɔtrɛɛ mununkum mu yɛɛ nkatasoɔ, ne ogya, sɛ ɛnyɛ hann anadwo.

⁴⁰ Wɔbisae, na ɔde mmoko bae, na ɔde ɔsoro aduane maa wɔmee.

⁴¹ Ɔbuee ɔbotan maa nsuo tuee, ɛtenee anwea pradada so sɛ asubɔnten.

⁴²Na ɔkaee n’asɛm kronkron no, ɔkaee n’akoa Abraham,

⁴³na ɔyii ne man maa wɔde abotɔyam firii adi, ɔmaa wɔn a ɔyii wɔn no de ahurisie kɔe.

⁴⁴Na ɔde amanaman nsase maa wɔn, na wɔdii nkurɔfoɔ adwuma so adeɛ,

⁴⁵sɛ wɔnhwɛ n’ahyɛdeɛ nyɛ, na wɔnni ne mmara so. Monyi AWURADE ayɛ!