Read New Revised Asante Twi Bible Nnwom 115 Bible Online

Nnwom 115 - New Revised Asante Twi Bible bible

Nnwom 115

¹Ɛnyɛ yɛn, AWURADE, ɛnyɛ yɛn, na wo din mmom na animuonyam nka, w’adɔeɛ nti, wo nokorɛ nti.

² Adɛn na amanaman nka sɛ: Ɛhe ara na wɔn Nyankopɔn wɔ?

³Na yɛn Nyankopɔn wɔ ɔsoro, deɛ ɔpɛ nyinaa na ɔyɛ.

⁴ Wɔn ahoni yɛ dwetɛ ne sika, nnipa nsa ano adwuma.

⁵Wɔwɔ ano, na wɔnkasa, wɔwɔ ani, na wɔnhunu adeɛ,

⁶wɔwɔ aso, na wɔnte asɛm, wɔwɔ hwene, na wɔnte hwa.

⁷Wɔn nsa, wɔmfa nka adeɛ, wɔn nan, wɔmfa nnante, na wɔmfa wɔn menewa nkasa.

⁸Wɔn a wɔyɛ wɔn te sɛ wɔn ara, obiara a ɔde ne ho to wɔn soɔ no.

⁹ Israel, fa wo ho to AWURADE so. Wo mmoa ne wo kyɛm ne no.

¹⁰ Aaron fie, momfa mo ho nto AWURADE so. Mo mmoa ne mo kyɛm ne no.

¹¹ Mo a mosuro AWURADE, momfa mo ho nto AWURADE so. Mo mmoa ne mo kyɛm ne no.

¹²AWURADE akae yɛn, ɔbɛhyira yɛn, ɔbɛhyira Israel fie, ɔbɛhyira Aaron fie,

¹³ɔbɛhyira wɔn a wɔsuro AWURADE, nketewa ne akɛseɛ nyinaa.

¹⁴AWURADE bɛma mo adɔɔso, mo ne mo mma.

¹⁵Moyɛ nnipa a wɔahyira wɔn ama AWURADE, ɔsoro ne asase yɛfoɔ no.

¹⁶Ɔsoro yɛ AWURADE soro, na asase deɛ, ɔde ama nnipa mma.

¹⁷ Ɛnyɛ awufoɔ na ɛbɛyi AWURADE ayɛ, na ɛnyɛ wɔn a wɔsiane kɔ kommyɛ mu biara.

¹⁸Na yɛn deɛ, yɛbɛhyira AWURADE afiri nnɛ akɔsi daa. Monyi AWURADE ayɛ!