Read New Revised Asante Twi Bible Nnwom 118 Bible Online

Nnwom 118 - New Revised Asante Twi Bible bible

Nnwom 118

¹ Monna AWURADE ase, na ɔyɛ, na n’adɔeɛ wɔ hɔ daa.

² Ma Israel nka ɛ: Aane, n’adɔeɛ wɔ hɔ daa.

³Ma Aaron fiefoɔ nka ɛ: Aane, n’adɔeɛ wɔ hɔ daa.

⁴Ma wɔn a wɔsuro AWURADE nka ɛ: Aane, n’adɔeɛ wɔ hɔ daa.

⁵Mefiri ahohia mu mefrɛɛ AWURADE, na AWURADE gyee me so, deɛ ɛhɔ trɛ.

⁶ AWURADE wɔ m’afa, mensuro, ɛdeɛn na onipa bɛtumi ayɛ me?

⁷ AWURADE wɔ m’afa sɛ me boafoɔ, na me nso mɛhunu deɛ mepɛ m’atamfoɔ soɔ.

⁸Ɛyɛ sɛ wɔtwere AWURADE sene sɛ wɔde wɔn ho bɛto nnipa soɔ.

⁹ Ɛyɛ sɛ wɔtwere AWURADE sene sɛ wɔde wɔn ho bɛto ahemfo soɔ.

¹⁰Amanaman nyinaa atwa me ho ahyia, AWURADE din mu ara na mɛtwitwa wɔn maguo.

¹¹Wɔatwa me ho ahyia awie koraa mpo, nanso AWURADE din mu ara na mɛtwitwa wɔn maguo.

¹² Wɔatwa me ho ahyia sɛ nwowa, wɔbɛdum sɛ nkasɛɛ mu gya, AWURADE din mu ara na mɛtwitwa wɔn maguo.

¹³Wɔwɔɔ me nkonsia sɛ anka menhwe ase, nanso AWURADE aboa me.

¹⁴ M’ahoɔden ne m’ayeyie dwom ne AWURADE, na wayɛ me nkwagyeɛ.

¹⁵Osebɔ ne nim gyegye ateneneefoɔ ntomadan mu, AWURADE nifa di mmaninsɛm.

¹⁶Wɔama AWURADE nifa so, AWURADE nifa di mmaninsɛm.

¹⁷Merenwu, na mmom mɛnya nkwa, na maka AWURADE nneyɛɛ makyerɛ.

¹⁸ Aso na AWURADE atwe me, na owuo deɛ, wamfa me amma no.

¹⁹Monhini tenenee aponkɛseɛ mma me, na menhyɛne mu menna AWURADE ase.

²⁰AWURADE ponkɛseɛ nie, ateneneefoɔ bɛhyɛne mu.

²¹ Meda wo ase sɛ woagye me soɔ, na woayɛ me nkwagyeɛ.

²² Ɔboɔ a abantofoɔ apa no abɛyɛ tweaso boɔ titire.

²³AWURADE na ɔmaa yei yɛeɛ, ɛyɛ nwanwa yɛn ani so.

²⁴Yei ne da a AWURADE ayɛ, momma yɛnni ahurisie, na yɛn ani nnye wɔ mu.

²⁵O AWURADE, gye nkwa ɛ, O AWURADE, ma no nsi yie!

²⁶ Nhyira ne deɛ ɔnam AWURADE din mu reba no, yɛfiri AWURADE fie rehyira mo.

²⁷AWURADE ne Onyankopɔn, wama hann ahyerɛn ama yɛn. Momfa dua mman ntwa afahyɛ asefoɔ no ho nhyia nkɔduru afɔrebukyia no mmɛn ho.

²⁸Me Nyankopɔn ne wo, na mɛda wo ase, me Nyankopɔn ne wo, mɛma wo so.

²⁹Monna AWURADE ase, na ɔyɛ, na n’adɔeɛ wɔ hɔ daa.