Read New Revised Asante Twi Bible Nnwom 119 Bible Online

Nnwom 119 - New Revised Asante Twi Bible bible

Nnwom 119

¹ Nhyira ne wɔn a wɔn kwan yɛ pɛ, na wɔnam AWURADE mmara soɔ.

²Nhyira ne wɔn a wɔhwɛ n’adansesɛm soɔ, na wɔde wɔn akoma nyinaa di akyire,

³nso wɔnyɛ amumuyɛdeɛ, na wɔnam n’akwan soɔ.

⁴Wo na wode wo nsiesieeɛ ahyɛ yɛn sɛ yɛnni so koraa.

⁵O, sɛ wɔtenetene m’akwan, na medi w’ahyɛdeɛ so ɛ!

⁶Sɛ mehwɛ wo mmara nsɛm nyinaa a, ɛnneɛ anka m’ani renwu.

⁷Mede akoma tee bɛda wo ase sɛ meresua wo tenenee atemmudeɛ no.

⁸Mɛdi w’ahyɛdeɛ so, nnya me korakora.

⁹Ɛdeɛn na aberanteɛ de bɛte ne kwan ho? Ɛne sɛ ɔhwɛ ne ho so sɛdeɛ wo nsɛm seɛ.

¹⁰Mede m’akoma nyinaa mɛdi w’akyi, mma memmfiri wo mmara nsɛm ho mennkyini.

¹¹Mede wo nsɛm makora m’akomam, na manyɛ wo ho bɔne bi.

¹² Nhyira ne wo, AWURADE, kyerɛkyerɛ me w’ahyɛdeɛ.

¹³Mede m’ano maka w’anomu atemmuo nyinaa.

¹⁴W’adansesɛm kwan mu na m’ani gyeɛ, sɛdeɛ ɛgye ahonyadeɛ bi ho.

¹⁵Meredwene wo nsiesieeɛ ho, na merehwɛ w’akwan.

¹⁶ W’ahyɛdeɛ ho na me ho sɛpɛ me, me werɛ remfiri wo nsɛm.

¹⁷Yɛ w’akoa yie, na mennya nkwa, na madi wo nsɛm so.

¹⁸Bue m’ani, na menhwɛ wo mmara mu anwanwadeɛ.

¹⁹ Meyɛ ɔhɔhoɔ asase so, mfa wo mmara nsɛm nhunta me.

²⁰Me kra posa daa nyinaa, w’atemmuo ho anigyina mu.

²¹ Woateatea ahantanfoɔ a wɔadome wɔn a wɔfom firi wo mmara nsɛm ho no.

²²Yi ahohora ne aniwuo firi me so, na madi w’adansesɛm so.

²³Aman mpanin nso tena ase keka me ho nsɛm a, w’akoa bɛdwene w’ahyɛdeɛ ho.

²⁴ W’adansesɛm yɛ m’adɔdeɛ, na ɛyɛ m’agyinatufoɔ.

²⁵Me kra aka fam, ma mennya nkwa sɛdeɛ w’asɛm teɛ.

²⁶Maka m’akwan makyerɛ, na woagye me so, ma mensua w’ahyɛdeɛ.

²⁷Ma menhunu wo nsiesieeɛ kwan mu, na mennwene w’anwanwadeɛ ho.

²⁸Awerɛhoɔ ama me kra anane, ma me so sɛdeɛ w’asɛm teɛ.

²⁹Yi atorɔ kwan firi me ho, na fa wo mmara dom me.

³⁰Mafa nokorɛdie kwan, mede w’atemmudeɛ magu m’anim.

³¹Matim w’adansesɛm mu, AWURADE, mma m’ani nnwu.

³²Metu wo mmara nsɛm kwan so mmirika, na wotrɛ m’akomam.

³³AWURADE, kyerɛ me w’ahyɛdeɛ kwan, na mafa so makɔsi aseɛ.

³⁴Ma menhunu mu, na madi wo mmara so, na mede m’akoma nyinaa bɛdi so.

³⁵ Ma memfa wo mmara nsɛm kwan so, na ɛno na ɛsɔ m’ani.

³⁶Kom m’akoma kɔ w’adansesɛm so, na ɛnyɛ sikanibereɛ so.

³⁷Ma m’ani nsiane adehunu hwɛ ho, ma mennya wo kwan mu nkwa.

³⁸Hyɛ w’asɛm mu den ma w’akoa a ɔde ne ho ama wo suro.

³⁹Ma m’ahohora a ɛyɛ me hu nsiane me ho, na w’atemmudeɛ yɛ.

⁴⁰Hwɛ, mafe wo nsiesieeɛ, ma mennya wo tenenee mu nkwa.

⁴¹AWURADE, ma w’adɔeɛ mmra mma me, ne wo nkwagyeɛ sɛdeɛ w’asɛm teɛ.

⁴²Na manya asɛm bi mabua deɛ ɔbɔ me ahohora, na mede me ho meto w’asɛm so.

⁴³Na nyi nokwasɛm no mfiri m’anomu koraa, na w’atemmudeɛ so na m’ani da.

⁴⁴Na mɛdi wo mmara so ara daa akɔsi daa ne daapem,

⁴⁵na mɛnante tɛtrɛtɛ mu, na medi wo nsiesieeɛ akyi.

⁴⁶ Na mɛka w’adanseɛ ho asɛm ahemfo anim, na m’ani renwu.

⁴⁷ Na me ho bɛsɛpɛ me wo mmara nsɛm ho, na ɛno na madɔ,

⁴⁸na mɛma me nsa so wo mmara nsɛm a madɔ no ho, na madwene w’ahyɛdeɛ ho.

⁴⁹Kae asɛm a woka kyerɛɛ w’akoa no, ɛfiri sɛ womaa mede m’ani metoo so.

⁵⁰ Yei ne m’awerɛkyekyerɛ m’amanehunu mu, ɛfiri sɛ w’asɛm ma menya nkwa.

⁵¹Ahantanfoɔ de me ayɛ fɛdie pii, mennane memfirii wo mmara ho.

⁵²AWURADE, mekae w’atemmuo a ɛfiri teteete no, na mekyekyere me werɛ.

⁵³Abufuhyeɛ hyɛ me so, abɔnefoɔ a wɔgya wo mmara no nti.

⁵⁴W’ahyɛdeɛ adane me nnwom, m’ahɔhoyɛ fie mu.

⁵⁵AWURADE, mekae wo din anadwo, na medi wo mmara so.

⁵⁶Yei ayɛ me adeɛ, sɛ mekura wo nsiesieeɛ mu.

⁵⁷AWURADE, me kyɛfa ne wo, maka sɛ mɛdi wo nsɛm so.

⁵⁸Mede m’akoma nyinaa masrɛ wo: Dom me sɛdeɛ w’asɛm teɛ.

⁵⁹Meda medwene m’akwan ho, na medane me nan mekyerɛ w’adansesɛm.

⁶⁰Meyɛ ntɛm, na mentwentwɛn me nan ase, sɛ mɛdi wo mmara nsɛm soɔ.

⁶¹ Abɔnefoɔ nhoma abebare me ho, me werɛ mfirii wo mmara.

⁶² Mesɔre dasuom meda wo ase, wo tenenee atemmudeɛ ho.

⁶³Meyɛ wɔn a wɔsuro woɔ nyinaa adamfo, ɛne wɔn a wɔdi wo nsiesieeɛ soɔ.

⁶⁴ AWURADE, w’adɔeɛ ahyɛ asase ma, ma mensua w’ahyɛdeɛ.

⁶⁵ Wo ne w’akoa adi no yie, AWURADE, sɛdeɛ w’asɛm teɛ.

⁶⁶Kyerɛkyerɛ me nhunumu pa ne nimdeɛ, na magye wo mmara nsɛm madi.

⁶⁷ Wɔnnya mmrɛɛ me aseɛ no, mefomee, na afei medi w’asɛm so.

⁶⁸ Woyɛ, na woyɛ yie, kyerɛkyerɛ me w’ahyɛdeɛ.

⁶⁹ Ahantanfoɔ atoatoa atorɔ ato me so, me deɛ, mede m’akoma nyinaa mesɔ wo nsiesieeɛ mu.

⁷⁰ Wɔn akoma apirim sɛ sradeɛ, me deɛ, wo mmara ho na me ho sɛpɛ me.

⁷¹ Ɛyɛ ma me sɛ wobrɛɛ me aseɛ, na ama masua w’ahyɛdeɛ.

⁷² W’anomu mmara yɛ ma me sene sika ne dwetɛ mpempem.

⁷³Wo nsa na ɛyɛɛ me na ɛsiesiee me, ma me nteaseɛ, na mensua wo mmara nsɛm.

⁷⁴Wɔn a wɔsuro woɔ bɛhu me na wɔn ani agye, na w’asɛm so na m’ani da.

⁷⁵ AWURADE, mahunu sɛ w’atemmuo yɛ tenenee, na wode nokorɛdie abrɛ me ase.

⁷⁶ Ma w’adɔeɛ nyɛ me awerɛkyekyerɛ ɛ, sɛdeɛ wokaa w’akoa no.

⁷⁷ Ma wo mmɔborɔhunu mmra me so na mennya nkwa, na wo mmara ne m’anika.

⁷⁸ Ma ahantanfoɔ ani nwu sɛ wɔbrɛɛ me ase nkontompo soɔ. Me deɛ, mɛdwene wo nsiesieeɛ ho.

⁷⁹Ma wɔn a wɔsuro woɔ nnane mmra me nkyɛn, ne wɔn a wɔnim w’adansesɛm no.

⁸⁰Ma m’akoma nyɛ pɛ w’ahyɛdeɛ mu, na m’anim angu ase.

⁸¹Me kra tɔ wo nkwagyeɛ ho piti, w’asɛm so na m’ani da.

⁸²W’asɛm nti m’ani ayɛ siamoo. Mese: Da bɛn na wobɛkyekyere me werɛ?

⁸³ Na mayɛ sɛ toa a ɛwɔ wisie mu, nanso me werɛ mfiri w’ahyɛdeɛ.

⁸⁴W’akoa nna si ahe? Da bɛn na wobɛbu wɔn a wɔtaa me atɛn?

⁸⁵ Ahantanfoɔ atutu amena ama me, wɔn a wɔnte sɛdeɛ wo mmara kyerɛ.

⁸⁶Wo mmara nsɛm nyinaa yɛ nokorɛ. Wɔtaa me nkontompo so, boa me!

⁸⁷Aka kumaa na wɔahye me awie asase so, na me deɛ, mennya wo nsiesieeɛ.

⁸⁸ W’adɔeɛ nti ma mennya nkwa, na madi w’anomu adanseɛ so.

⁸⁹ AWURADE, w’asɛm tim hɔ daa wɔ, ɔsoro.

⁹⁰Wo nokorɛdie wɔ hɔ ma awoɔ ntoatoasoɔ nyinaa, woasiesie asase, na ɛgyina hɔ.

⁹¹Ɛgyina hɔ nnɛ sɛdeɛ w’atemmuo teɛ, na nnoɔma nyinaa yɛ w’asomfoɔ.

⁹² Sɛ wo mmara anyɛ m’adɔdeɛ a, anka masɛe m’amaneɛ mu.

⁹³ Me werɛ remfiri wo nsiesieeɛ ara da, na ɛno so na wonam ma menya nkwa.

⁹⁴ Meyɛ wo dea, gye me nkwa, na medi wo nsiesieeɛ akyi.

⁹⁵Abɔnefoɔ retɛ me asɛe me. Me deɛ, m’ani ku w’adansesɛm ho.

⁹⁶Mahunu pɛyɛ nyinaa awieeɛ, wo mmara nsɛm trɛ pii.

⁹⁷ Sɛdeɛ mesi dɔ wo mmara! Ɛno ne m’adwene da mu nyinaa.

⁹⁸ Wo mmara nsɛm ayɛ me onyansafoɔ asene m’atamfoɔ, na ɛwɔ me daa.

⁹⁹Mewɔ nimdeɛ mesene m’akyerɛkyerɛfoɔ nyinaa, na w’adansesɛm ne m’adwene.

¹⁰⁰Mehunu adeɛ mu mesene mpanimfoɔ, na mehwɛ wo nsiesieeɛ medi so.

¹⁰¹Masianka me nan mafiri kwammɔne nyinaa so, na madi w’asɛm so.

¹⁰²Memmane memfirii w’atemmuo ho, na wo na woakyerɛkyerɛ me.

¹⁰³ Sɛdeɛ wo nsɛm si yɛ me dodom dɛ! Ɛsene sɛdeɛ ɛwoɔ yɛ m’anomu.

¹⁰⁴Wo nsiesieeɛ mu na menya nhunumu, enti mekyiri nkontompo kwan nyinaa.

¹⁰⁵ W’asɛm yɛ me nan ase kanea, ne me kwan so hann.

¹⁰⁶Maka ntam, na mɛma no agyina, sɛ mɛdi wo tenenee atemmudeɛ so.

¹⁰⁷ Wɔabrɛ me ase dodo, AWURADE, ma mennya nkwa sɛdeɛ w’asɛm teɛ.

¹⁰⁸ AWURADE, ma w’ani nsɔ m’anomu ayamyie afɔdeɛ ɛ, na ma mensua w’atemmudeɛ.

¹⁰⁹ Me kra da me nsam daa, nanso me werɛ mfiri wo mmara.

¹¹⁰Abɔnefoɔ asum me fidie, nanso memfom wo nsiesieeɛ kwan ho.

¹¹¹Mafa w’adansesɛm mayɛ m’agyapadeɛ daa, na ɛno na ɛma m’akoma ani gyeɛ.

¹¹²Makom m’akoma sɛ mɛyɛ w’ahyɛdeɛ daa makɔsi aseɛ.

¹¹³ Mekyiri adwene ntantafoɔ, na medɔ wo mmara.

¹¹⁴ Me dwanekɔbea ne me kyɛm ne wo, m’ani da w’asɛm so.

¹¹⁵Nnebɔneyɛfoɔ, momfiri me so, na madi me Nyankopɔn mmara nsɛm so.

¹¹⁶Wowa me sɛdeɛ w’asɛm teɛ, na manya nkwa, na mma m’ani nnwu, me kwanhwɛ mu.

¹¹⁷Sɔ me mu, na manya nkwagyeɛ, na mahwɛ w’ahyɛdeɛ no daa.

¹¹⁸Wobu wɔn a wɔfom w’ahyɛdeɛ nyinaa animtia, na nkontompo nko ne wɔn nsisie.

¹¹⁹Woyi asase so abɔnefoɔ nyinaa hɔ sɛ dadebini, enti na medɔ w’adansesɛm.

¹²⁰Wo ho hu ma me honam popo, na mesuro w’atemmudeɛ.

¹²¹Mayɛ atemmuo ne tenenee, nnya me mma wɔn a wɔhyɛ me soɔ.

¹²² Di agyinamu pa ma w’akoa, mma ahantanfoɔ nnni me amim.

¹²³M’ani ayɛ siamoo repɛ wo nkwagyeɛ ne wo tenenee asɛm no.

¹²⁴Wo ne w’akoa nni no sɛdeɛ w’adɔeɛ teɛ, na ma mensua w’ahyɛdeɛ.

¹²⁵W’akoa ne me, ma me nteaseɛ, na menhunu w’adansesɛm.

¹²⁶Berɛ aduru sɛ AWURADE yɛ biribie, ɛfiri sɛ wɔatu wo mmara agu.

¹²⁷ Enti medɔ wo mmara nsɛm sene sika kɔkɔɔ ne amapa.

¹²⁸Enti mebu ade nyinaa mu nsiesieeɛ nyinaa sɛ ɛtene, metane nkontompo kwan nyinaa.

¹²⁹W’adansesɛm yɛ nwanwa, enti na me kra di soɔ.

¹³⁰ Wo nsɛm mu bue ma hann, ɛma nkwaseafoɔ hunu nyansa.

¹³¹Mebue m’anomu haa mepere, ɛfiri sɛ m’ani gyina wo mmara nsɛm.

¹³²Dane w’ani kyerɛ me, na dom me, sɛdeɛ woyɛ wɔn a wɔdɔ wo din no.

¹³³ Ma m’anammɔn ntim w’asɛm mu, na mma amumuyɛ biara nnni me so.

¹³⁴Yi me firi onipa nhyɛsoɔ mu, na menni wo nsiesieeɛ so.

¹³⁵Ma w’anim nhran w’akoa so, na ma mensua w’ahyɛdeɛ.

¹³⁶Asutene sene m’aniwa mu gu, ɛfiri sɛ nnipa nni wo mmara so.

¹³⁷Ɔteneneeni ne wo, AWURADE, na w’atemmudeɛ nso tene.

¹³⁸Woahyɛ w’adansesɛm, tenenee mu ne nokorɛdie kɛseɛ mu.

¹³⁹ Me mmɔdemmɔ redɛre me mu sɛ ogya, ɛfiri sɛ m’ahohiahiafoɔ werɛ afiri wo nsɛm.

¹⁴⁰W’asɛm yɛ gyenegyene pii, na w’akoa dɔ no.

¹⁴¹ Mesua, na memfra, nanso me werɛ mfiri wo nsiesieeɛ.

¹⁴²Wo tenenee yɛ daa tenenee, na wo mmara yɛ nokorɛ.

¹⁴³ Ahohia ne ahoyera ato me, nanso wo mmara nsɛm ne m’adɔdeɛ.

¹⁴⁴W’adansesɛm yɛ tenenee daa, ma me nteaseɛ, na mennya nkwa.

¹⁴⁵Mede m’akoma nyinaa mesu mefrɛ: Gye me so. AWURADE, mɛdi w’ahyɛdeɛ so.

¹⁴⁶Mesu mefrɛ wo: Bɛgye me, na madi w’adansesɛm so.

¹⁴⁷ Metua anɔpahema meteam, m’ani da w’asɛm so.

¹⁴⁸M’ani di adasuo anim sɛ mɛdwene w’asɛm ho.

¹⁴⁹ Tie me sɛdeɛ w’adɔeɛ teɛ. AWURADE, ma mennya nkwa sɛdeɛ w’atemmudeɛ teɛ.

¹⁵⁰Wɔn a wɔdi mmusuo akyire twe bɛn, wɔne wo mmara ntam ware.

¹⁵¹ AWURADE, wo nso wobɛn, na wo mmara nsɛm nyinaa yɛ nokorɛ.

¹⁵²Mehunuu w’adansesɛm mu akyɛ, sɛ woama no atim sɛ ɛnsi hɔ daa.

¹⁵³ Hwɛ m’amanehunu, na yi me, na me werɛ mfiri wo mmara.

¹⁵⁴Di m’asɛm ma me, na gye me, ma mennya nkwa sɛdeɛ w’asɛm teɛ.

¹⁵⁵Abɔnefoɔ ne nkwagyeɛ ntam ware, na wɔnhwehwɛ w’ahyɛdeɛ akyiri kwan.

¹⁵⁶Wo mmɔborɔhunu dɔɔso, AWURADE, ma mennya nkwa sɛdeɛ w’atemmudeɛ teɛ.

¹⁵⁷M’ataafoɔ ne m’ahohiahiafoɔ dɔɔso nanso mentwe memfirii w’adansesɛm ho.

¹⁵⁸Mehunu nnabrabafoɔ nkontompofoɔ a, wɔn ho yɛ me nwunu, sɛ wɔnni w’asɛm soɔ.

¹⁵⁹Hwɛ sɛdeɛ medɔ wo nsiesieeɛ, AWURADE, ma mennya nkwa sɛdeɛ w’adɔeɛ teɛ.

¹⁶⁰ W’asɛm ntoano yɛ nokorɛ, na wo tenenee atemmuo nyinaa wɔ hɔ daa.

¹⁶¹Aman mpanin ti me kwa, nanso w’asɛm nko na mesuro.

¹⁶²M’ani ka w’asɛm ho sɛdeɛ wanya asadeɛ pii.

¹⁶³Metane atorɔ, na mekyi, wo mmara na medɔ.

¹⁶⁴Da koro meyi wo ayɛ mprɛnson, wo tenenee atemmuo ho.

¹⁶⁵Asomdwoeɛ pii wɔ wɔn a wɔdɔ wo mmara, na biribi ntoatoa wɔn.

¹⁶⁶ Mehwɛ wo nkwagyeɛ kwan, AWURADE, na madi wo mmara nsɛm so.

¹⁶⁷Me kra di w’adansesɛm so, na medɔ no kɛse.

¹⁶⁸ Medi wo nsiesieeɛ ne w’adansesɛm so, na m’akwan nyinaa wɔ w’anim.

¹⁶⁹AWURADE, ma me nteamu nnuru w’anim, ma me nteaseɛ sɛdeɛ w’asɛm teɛ.

¹⁷⁰Ma me nkotosrɛ mmra w’anim, gye me sɛdeɛ w’asɛm teɛ.

¹⁷¹M’ano bɛworo w’ayeyie, sɛ wokyerɛkyerɛ me w’ahyɛdeɛ.

¹⁷² Me tɛkyerɛma bɛgye w’asɛm so, na wo mmara nsɛm nyinaa yɛ tenenee.

¹⁷³Ma wo nsa mmɛboa me, na wo nsiesieeɛ na mayie.

¹⁷⁴ Mefe wo nkwagyeɛ, AWURADE, na wo mmara ne m’adɔdeɛ.

¹⁷⁵Ma me kra ntena ase nyi wo ayɛ, na w’atemmuo mmoa me.

¹⁷⁶ Mafom kwan sɛ odwan a wayera, hwehwɛ w’akoa, na me werɛ mfiri wo mmara nsɛm.