Read New Revised Asante Twi Bible Nnwom 136 Bible Online

Nnwom 136 - New Revised Asante Twi Bible bible

Nnwom 136

¹ Monna AWURADE ase, na ɔyɛ, na n’adɔeɛ wɔ hɔ daa.

²Monna anyame mu Nyankopɔn ase, na n’adɔeɛ wɔ hɔ daa.

³Monna awuranom mu AWURADE no ase, na n’adɔeɛ wɔ hɔ daa.

⁴Deɛ ɔno nko ara yɛ anwanwadeɛ akɛseɛ, na n’adɔeɛ wɔ hɔ daa.

⁵Deɛ ɔde nteaseɛ yɛɛ ɔsoro no, na n’adɔeɛ wɔ hɔ daa.

⁶Deɛ ɔde asase trɛɛ nsuo soɔ no, na n’adɔeɛ wɔ hɔ daa.

⁷ Deɛ ɔyɛɛ akanea akɛseɛ, na n’adɔeɛ wɔ hɔ daa.

⁸Owia, sɛ ɛnni adekyeeɛ so, na n’adɔeɛ wɔ hɔ daa.

⁹Ɔsrane ne nsoromma, sɛ ɛnni anadwo so, na n’adɔeɛ wɔ hɔ daa.

¹⁰ Deɛ ɔbobɔɔ Misraimfoɔ wɔn mmakan mu, na n’adɔeɛ wɔ hɔ daa.

¹¹Na ɔyii Israel firii wɔn mu no, na n’adɔeɛ wɔ hɔ daa.

¹²Ɔde nsa a ɛyɛ den ne basa a watene mu na ɛyii wɔn, na n’adɔeɛ wɔ hɔ daa.

¹³Deɛ ɔtwitwaa Mmɛwa Po mu asinasini, na n’adɔeɛ wɔ hɔ daa.

¹⁴Na ɔde Israel faa mu, na n’adɔeɛ wɔ hɔ daa.

¹⁵Na ɔkaa Farao ne ne dɔm guu Mmɛwa Po mu, na n’adɔeɛ wɔ hɔ daa.

¹⁶Deɛ ɔgyaa ne man faa ɛserɛ soɔ, na n’adɔeɛ wɔ hɔ daa.

¹⁷Deɛ ɔbobɔɔ ahemfo akɛseɛ, na n’adɔeɛ wɔ hɔ daa.

¹⁸Na ɔkunkumm ahemfo animuonyamfoɔ, na n’adɔeɛ wɔ hɔ daa.

¹⁹Amorifoɔ hene Sihon, na n’adɔeɛ wɔ hɔ daa.

²⁰Na Basan hene Og, na n’adɔeɛ wɔ hɔ daa.

²¹Na ɔde wɔn asase maa sɛ apɛgyadeɛ, na n’adɔeɛ wɔ hɔ daa.

²²Ɔde yɛɛ n’akoa Israel apɛgyadeɛ, na n’adɔeɛ wɔ hɔ daa.

²³Deɛ ɔkaee yɛn yɛn ahobrɛaseɛ mu, na n’adɔeɛ wɔ hɔ daa.

²⁴Na ɔgyee yɛn firii yɛn ahohiahiafoɔ nsam, na n’adɔeɛ wɔ hɔ daa.

²⁵ Ɔma honam nyinaa aduane, na n’adɔeɛ wɔ hɔ daa.

²⁶Monna ɔsoro Nyankopɔn ase, na n’adɔeɛ wɔ hɔ daa.