Read New Revised Asante Twi Bible Nnwom 140 Bible Online

Nnwom 140 - New Revised Asante Twi Bible bible

Nnwom 140

¹Wɔde ma dwonkyerɛfoɔ. Dawid dwom. AWURADE, yi me firi onipa bɔne nsam, bɔ me ho ban, ɔbarima ɔboɔdurufoɔ ho.

²Wɔn na wɔdwene akoma mu bɔne, daa nyinaa wɔka ɔko.

³ Wɔse wɔn tɛkyerɛma ano sɛ ɔwɔ, ahuritia borɔ wɔ wɔn se ano.

⁴AWURADE, hwɛ me so firi ɔbɔnefoɔ nsam, bɔ me ho ban ɔbarima ɔboɔdurufoɔ ho, na wɔabɔ wɔn tirim pɔ sɛ wɔbɛsum m’anammɔn atwene.

⁵Ahantanfoɔ de fidie ne nhoma ato hɔ ama me, wɔasum me nsɛmma kwankyɛn, wɔasum me apa.

⁶ Mesee AWURADE sɛ: Wone me Nyankopɔn; AWURADE, yɛ aso ma me nkotosrɛ nne.

⁷Ao, AWURADE, me Wura, me nkwagyeɛ ahoɔden, wokataa me tiri so wɔ ɔko da mu.

⁸AWURADE, mma ɔbɔnefoɔ deɛ ɔpɛ, mma n’agyina no nnkɔ so, na wɔamma wɔn ho so.

⁹ Wɔn a wɔtwa me ho hyia no deɛ, ma wɔn anomu mmusuo mmua wɔn atifi.

¹⁰Ma nsramma ngu wɔn so, ma wɔmfa wɔn ngu ogya mu, aku donkodonko mu a wɔrensɔre bio.

¹¹Mma ɔtɛkyerɛmafoɔ nntintim asase so, ɔboɔdurufoɔ, ma bɔne nti no yerɛdɛdɛ.

¹²Menim sɛ AWURADE bɛdi ɔmanehunufoɔ asɛm, ɔbɛbu atɛn ama ahiafoɔ.

¹³Ampa, teneneefoɔ bɛda wo din ase, teefoɔ bɛtena w’anim.