Read New Revised Asante Twi Bible Nnwom 141 Bible Online

Nnwom 141 - New Revised Asante Twi Bible bible

Nnwom 141

¹Dawid dwom. AWURADE, mesu mefrɛ wo, yɛ ntɛm ma me; sɛ mesu mefrɛ wo a, yɛ aso ma me.

² Ma me mpaebɔ mmɛsi w’anim sɛ ohwam, me nsa soma sɛ anwummerɛ ayɛyɛdeɛ.

³ AWURADE, fa ɔwɛn bɛwɛn m’ano, na hwɛ m’anofafa pono ano.

⁴ Nkom m’akoma nkɔ nsɛmmɔne ho, sɛ me ne nnipa amumuyɛfoɔ bɛdi nsɛmmɔne, na mma mennka wɔn nnɔkɔnnɔkɔwadeɛ bi mennhwɛ.

⁵ Ma ɔteneneeni mmɔ me na ɔnka m’anim adɔeɛ so, ɛyɛ tire so ngo a me tiri rempoɔ, nanso amumuyɛfoɔ ngo deɛ, mma no ngu me tiri so, na me mpaebɔ ara na ɛda so tia wɔn nsɛmmɔne.

⁶Wɔsum wɔn atemmufoɔ hwe ɔbotan so, na wɔte me nsɛm sɛ ɛyɛ dɛ.

⁷Sɛdeɛ obi dwiri asase funtum soɔ no, saa ara na wɔama yɛn nnompe apete Damena ano.

⁸Na wo, AWURADE, so na m’ani da, wo na medwane bɛtoa wo, nto me kra ntwene.

⁹Kora me firi apa a wɔasum me ne amumuyɛfoɔ mfidie ho.

¹⁰ Ma abɔnefoɔ nhwe wɔn ankasa nsɛmma mu, na me deɛ, ma mensiane ho menkɔ prɛko.