Read New Revised Asante Twi Bible Nnwom 144 Bible Online

Nnwom 144 - New Revised Asante Twi Bible bible

Nnwom 144

¹Dawid deɛ. Nhyira ne AWURADE, me botan a ɔkyerɛkyerɛ me nsa ɔsa ne me nsateaa akodie.

² M’adɔeɛ ne m’abankɛseɛ, m’abantenten ne me gyefoɔ, me kyɛm ne deɛ medwane mekɔtoa no a ɔbrɛ me man ase hyɛ m’aseɛ.

³ AWURADE, onipa ne hwan a wohu no, ɔdasani ba ne hwan a wodwene ne ho?

⁴ Onipa te sɛ ahuhuo, ne nna te sɛ sunsum a ɛretwam.

⁵ AWURADE, kuntunu wo soro, na si fam, keka mmepɔ, na ɛmfiri wisie.

⁶Pa anyinam, na pansam wɔn, toto wo mmɛmma, na sɛe wɔn.

⁷Tene wo nsa firi soro nohoa, hwam me, na yi me firi nsuo akɛseɛ mu, firi ananafoɔ mma nsam.

⁸ Wɔn na wɔn ano ka nsɛnhuhuo, na wɔn nifa yɛ atorɔ nifa.

⁹ Onyankopɔn, mɛto dwom foforɔ mama wo, mede sankuo a ɛso han du bɛto dwom mama wo,

¹⁰sɛ wo na wode nkwagyeɛ ma ahemfo, na wogyee w’akoa Dawid firii afena a ɛnyɛ ano.

¹¹Gye me na yi me firi ananafoɔ mma a wɔn ano ka nsɛnhunu nsam. Wɔn na wɔn nifa yɛ atorɔ nifa.

¹² Na yɛn mmabanin ayɛ sɛ tɛ nnua a anyini yie, wɔn mmeranteberɛ mu, na yɛn mmammaa ayɛ sɛ twea so adum a wɔasene no sɛ ahemfie deɛ.

¹³Na yɛn asan ayɛ ma a wɔyi mu nnoɔma ahodoɔ nyinaa, na yɛn nnwan awo mpempem ayɛ mpem du du yɛn nsase so.

¹⁴Na yɛn anantwie ho atua wɔn ho a ɔsɛeɛ ne ɔyera mma wɔn mu, na abooboo amma yɛn mmɔntene so.

¹⁵ Nhyira ne ɔman a wɔte sɛɛ, nhyira ne ɔman a AWURADE ne wɔn Nyankopɔn.