Read New Revised Asante Twi Bible Nnwom 22 Bible Online

Nnwom 22 - New Revised Asante Twi Bible bible

Nnwom 22

¹Wɔde ma dwonkyerɛfoɔ sɛ wɔnto no “Adekyeeɛ foroteɛ” sankuo nne so. Dawid dwom. Me Nyankopɔn, me Nyankopɔn, deɛn nti na woagya me? Me su a mesu mefrɛ woɔ ne me nkwagyeɛ ntam ware.

²Me Nyankopɔn, meteam mefrɛ wo awia, na wommua me, ne anadwo, nso mennya ɔhome.

³Na woyɛ kronkron, wote w’ahennwa so, na wo na Israel ayeyie nyinaa wɔ woɔ.

⁴Wo so na yɛn agyanom de wɔn ho toeɛ, wɔde wɔn ho too wo so, na wogyee wɔn.

⁵ Wo na wɔteaa mu frɛɛ woɔ, na wɔnyaa nkwagyeɛ, wɔde wɔn ho too wo so, na wɔn ani anwu.

⁶ Na me deɛ, meyɛ aboa, na menyɛ onipa, meyɛ nnipa ahohoradeɛ ne ɔman akyiwadeɛ.

⁷ Wɔn a wɔhu me nyinaa di me ho fɛw trɛ wɔn anomu woso wɔn tiri ka sɛ:

⁸Dane to AWURADE so, ma no nnye no, sɛ ɔpɛ no a, ma no nyi no!

⁹ Na wo na woyii me firii me na yam, metua me na nufoɔ ano no, na womaa me anidasoɔ.

¹⁰Mefiri yafunum ara na wɔde me too wo soɔ, wone me Nyankopɔn firi me na yam.

¹¹Mma me ne wo ntam nnware, na ahohia abɛn a ɔboafoɔ bi nni hɔ.

¹²Anantwinini bebree atwa me ho ahyia, Basan anantwie akɛseɛ abɔ me ho kɔntɔnkrɔn.

¹³Wɔtrɛ wɔn anomu kyerɛ me sɛ gyata a ɔteteɛ na ɔbobom.

¹⁴ Wɔahwie me agu sɛ nsuo, na me nnompe nyinaa ahwinhwan n’akwaa so. M’akoma ayɛ sɛ akraa, anane wɔ me yam.

¹⁵ M’ahoɔden mu awe sɛ kyɛmferɛ, na me tɛkyerɛma afam me dodom, na wode me ato owuo mfuturo mu.

¹⁶ Nnipa bɔne te sɛ akraman atwa me ho ahyia, na wɔbom ba me so, wɔahwire me nsa ne me nan mu.

¹⁷Metumi mekan me nnompe nyinaa, wɔn deɛ, wɔhwɛ me de gye wɔn ani.

¹⁸ Wɔkyɛ me ntoma mu fa, na m’atadeɛ so na wɔbɔ ntonto.

¹⁹Na wo, AWURADE, ntena akyiri. M’ahoɔden, yɛ ntɛm bɛboa me.

²⁰ Hwim me kra firi nkrantɛ ano, m’ade koro no firi akraman nsam.

²¹Gye me firi gyata anomu, na ɛkoɔ mmɛn mu na wotie me.

²² Mɛbɔ wo din makyerɛ me nuanom, mɛkamfo wo asafo mu.

²³Mo a mosuro AWURADE, monyi no ayɛ. Yakob asefoɔ nyinaa, monhyɛ no animuonyam, na Israel asefoɔ nyinaa, momfɛre no.

²⁴ Na wansere na wankyiri ɔmanehunufoɔ amaneɛ, na wanyi n’anim anhunta no, na mmom ɔsu frɛɛ no no, ɔtiee.

²⁵ Wo na woma meyi wo ayɛ asafo kɛseɛ mu, mɛma m’aboadeɛ wɔ, wɔn a wɔsuro no no anim.

²⁶ Ahobrɛasefoɔ bɛdidi na wɔamee, wɔn a wɔpɛ AWURADE akyiri kwan bɛyi no ayɛ. Mo akoma nnya nkwa daa.

²⁷Asase ano ano sofoɔ nyinaa bɛkae adane aba AWURADE nkyɛn, na amanaman mmusuakuo nyinaa abɛkoto n’anim.

²⁸Na ahennie wɔ AWURADE, na ɔdi amanaman so.

²⁹ Asase so abrane nyinaa bɛdidi na wɔakoto no, wɔn a wɔsiane kɔ mfuturo mu nyinaa, ne deɛ anka ne kra nni nkwa no bɛkoto no.

³⁰ Nkyirimma bɛsom no, wɔbɛka AWURADE ho asɛm, awoɔ ntoatoasoɔ a ɛdidi soɔ mu.

³¹ Wɔbɛba abɛka ne tenenee akyerɛ ɔman a wɔbɛwo wɔn no, sɛ ɔno na wayɛ.