Read New Revised Asante Twi Bible Nnwom 3 Bible Online

Nnwom 3 - New Revised Asante Twi Bible bible

Nnwom 3

¹Dawid dwom a ɔtoeɛ berɛ a ɔdwane firii ne ba Absalom anim. AWURADE, hwɛ sɛdeɛ m’ahohiahiafoɔ si dɔɔso fa! Wɔn a wɔsɔre tia me no yɛ pii.

²Nnipa bebree se me sɛ: Ɔnni nkwagyeɛ Nyankopɔn mu. Sela[1]

³ Na wo, AWURADE, wone me ho kyɛm, m’animuonyam ne me werɛkyekyefoɔ.

⁴Mede me nne mesu mefrɛ AWURADE, na ɔgye me so firi ne bepɔ kronkron so.

⁵ Mekɔdae na medae; manyane, na AWURADE kura me mu.

⁶ Mensuro nkurɔfoɔ mpempem a wɔabɔ me ho nsraban ahyia yi.

⁷ O AWURADE, sɔre ɛ! Me Nyankopɔn, gye me! Na woabobɔ m’atamfoɔ nyinaa abɔgye, woabubu abɔnefoɔ se.

⁸ Na AWURADE na nkwagyeɛ wɔ no; wo man so na ma wo nhyira mmra.