Read New Revised Asante Twi Bible Nnwom 35 Bible Online

Nnwom 35 - New Revised Asante Twi Bible bible

Nnwom 35

¹Dawid deɛ. AWURADE, wo ne wɔn a wɔne me ham no nham, wo ne wɔn a wɔne me ko no nko!

² Sɔ ɛkyɛm ne nkatanim mu, na sɔre bɛboa me.

³Twe pea na si wɔn a wɔtaa me no kwan, ka kyerɛ me kra sɛ: W’agyenkwa ne me!

⁴ Ma wɔn a wɔhwehwɛ me wuo no anim ngu ase na wɔn ani nwu, ma wɔn a wɔpɛ me bɔne no mfa ahohora nsane wɔn akyi!

⁵Ma wɔnyɛ sɛ ntɛtɛ, mframa anim, na ma AWURADE bɔfoɔ nsum wɔn ngu!

⁶Ma wɔn akwan mu nnuru sum na ɛnyɛ torotorotoro, na AWURADE bɔfoɔ ntaa wɔn!

⁷ Na wɔasum me fidie wɔn amena mu kwa, na wɔatu me kra amena kwa.

⁸ Ma ɔsɛeɛ mmɛfiri no awora, na ma ne fidie a wasum ahunta no nyi no, ma ɔmfa bubububu nhwe mu!

⁹Na me kra bɛdi ahurisie AWURADE mu, na ne ho asane no, ne nkwagyeɛ mu.

¹⁰Me nnompe nyinaa bɛka sɛ: AWURADE, hwan na ɔte sɛ wo a wogye ɔmanehunufoɔ deɛ ɔyɛ den sene no no nsam ne ɔmanehunufoɔ ne ohiani firi ne dwotwafoɔ no nsam.

¹¹Adansefoɔ nkontompofoɔ sɔre; adeɛ a mennim na wɔbisa me.

¹² Wɔde bɔne tua me papa ka, me kra adi basugya.

¹³ Na me deɛ, wɔyare a, mefira ayitoma, mede mmuada mebrɛɛ me kra ase, na mebɔɔ mpaeɛ maa no sane bɛguu me kokom.

¹⁴Meyɛɛ sɛdeɛ ɔyɛ m’adamfo ne me nua, mesii me tiri ase twann sɛ obi a ɔregyam ne na.

¹⁵Na ɛnam sɛ merekɔhwe aseɛ nti, wɔn ani gye na wɔbɔ kyenku, nkwahumafoɔ ne nnipa a mennim wɔn bɔ me so kyenku, wɔya ara na wɔnnyae.

¹⁶ Sɛ asansanfoɔ pɛ nkyewankyewa ho tena di fɛw no, wɔtwɛree wɔn se guu me so.

¹⁷ AWURADE, wobɛhwɛ ara akɔsi da bɛn? Gye me kra firi wɔn sɛeɛ mu, m’ade korɔ firi agyata nsam!

¹⁸ Mɛda wo ase edwa kɛseɛ mu, mɛyi wo ayɛ ɔman dodoɔ mu.

¹⁹ Mma m’atamfoɔ atorofoɔ no ani nnnye me ho, mma wɔn a wɔtane me kwa no mmmu me anikyeɛ!

²⁰Na wɔnka asomdwoeɛ nsɛm, na wɔdwene nkontomposɛm tia wɔn a wɔdwo, asase so.

²¹ Na wɔtrɛ wɔn anomu bayaa wɔ me so, wɔse: Wiɛ, wiɛ, yɛn ani ahunu!

²²AWURADE, woahunu, mmua w’ano, AWURADE, mfiri me nkyɛn nkɔ akyiri!

²³ Nyane, na sɔre bɛbu me atɛn, me Nyankopɔn ne m’AWURADE, bɛdi m’asɛm!

²⁴AWURADE, me Nyankopɔn, fa wo tenenee so bɛbu me atɛn, na mma wɔn ani nnnye me ho!

²⁵Mma wɔnnka no wɔn akoma mu sɛ: Wiɛ, deɛ yɛpɛ ni! Mma wɔnnka sɛ: Yɛamene no.

²⁶ Wɔn a wɔn ani gye m’amanehunu ho nyinaa, ma wɔn ani nwu na wɔn anim ngu ase. Wɔn a wɔdi me so akokurokosɛm no, ma aniwuo ne ahohora nsi wɔn aduradeɛ!

²⁷ Wɔn a me tenenee sɔ wɔn ani no, ma wɔnni ahurisie na wɔn ani nnye; ma wɔnka daa sɛ: Wɔnkamfo AWURADE kɛseyɛ, sɛ n’akoa yiedie sɔ n’ani.

²⁸Na me tɛkyerɛma bɛka wo tenenee ne w’ayeyie daa nyinaa.