Read New Revised Asante Twi Bible Nnwom 45 Bible Online

Nnwom 45 - New Revised Asante Twi Bible bible

Nnwom 45

¹Wɔde ma dwonkyerɛfoɔ sɛ wɔnto no “Sosannim” sankuo nne so. Kora mma nnweneho, adɔdeɛ dwom. Asɛm pa ayɛ m’akoma ma abu so. Meka adeɛ a mayɛ a ɛfa ɔhene ho, me tɛkyerɛma yɛ ɔtwerɛfoɔ a ne nsa yɛ hare atwerɛdua.

² Wo ho yɛ fɛ sene nnipa mma, wɔde adom ahyɛ w’anomu ma. Enti na Onyankopɔn ahyira wo daa.

³Otumfoɔ, fa w’afena bɔ w’asene, fa w’animuonyam ne w’ahensɛm bɔ abɔsoɔ.

⁴ Na fa w’ahensɛm no te mu kɔ w’anim ma nokorɛ ne tenenee a wɔabrɛ no aseɛ, na wo nifa nkyerɛkyerɛ w’adeɛ a ɛyɛ hu.

⁵W’agyan ano yɛ nnam, aman bɛhwehwe ase w’anim, ɛwɔ ɔhene atamfoɔ akoma mu.

⁶ Onyankopɔn, w’ahennwa wɔ hɔ daa daa, w’ahennie poma yɛ tenenee poma.

⁷Wodɔ tenenee, na wotane abɔnefosɛm, enti na Onyankopɔn, wo Nyankopɔn, de anigyeɛ ngo asra woɔ sene wo mfɛfoɔ.

⁸ Kurobo ne pɛprɛ ne bɛwewonua yi hwa wo ntadeɛ nyinaa mu, sankuo a wɔbɔ no asommɛn aban mu ma w’ani gye.

⁹Ahemfo mmammaa wɔ wo mmaa animuonyamfoɔ mu, wo dɔyerɛ abɛgyina wo nifa, Ofir sika mu.

¹⁰ Ɔbabaa, tie, na hwɛ, na yɛ aso, na ma wo werɛ mfiri wo man ne w’agya fie.

¹¹Na ɔhene ani asɔ w’ahoɔfɛ, na ɔne wo wura, na sɔre no.

¹²Na Tiro babaa de ayɛyɛdeɛ ba, na ɔman mu adefoɔ bɛdɛfɛdɛfɛ wo.

¹³Ɔhene babaa wɔ animuonyam kɛseɛm ɔdan mu, wɔde sikatam abu n’aduradeɛ.

¹⁴Ɔhyɛ mmobɔmu atadeɛ, na wɔde no brɛ ɔhene, wɔde mmaabunu a wɔyɛ ne mfɛfoɔ di n’akyi bɛbrɛ wo.

¹⁵Wɔde anigyeɛ ne ahosan na ɛde wɔn reba, wɔkɔhyɛne ɔhene aban mu.

¹⁶Wo mma bɛsi w’agyanom ananmu, wode wɔn bɛsisi asase nyinaa so ahene.

¹⁷Mɛma wɔakae wo din, awoɔ ntoatoasoɔ nyinaa mu, enti na aman bɛyi wo ayɛ daa daa.