Read New Revised Asante Twi Bible Nnwom 5 Bible Online

Nnwom 5 - New Revised Asante Twi Bible bible

Nnwom 5

¹Wɔde ma dwonkyerɛfoɔ sɛ wɔmfa atɛntɛbɛn nto. Dawid dwom. AWURADE, yɛ aso ma me nsɛm, na hwɛ me nsusuiɛ a mekura mu.

² Tie me nteamu, me hene ne me Nyankopɔn, na wo na mɛbɔ wo mpaeɛ.

³AWURADE, tie me nne anɔpa, anɔpa na masiesie mama woɔ, na mɛhwɛ wo kwan.

⁴Na wonyɛ Onyankopɔn a wopɛ adebɔne, ɔbɔnefoɔ ne wo rentena.

⁵Agyimifoɔ rennyina w’anim, wotane amumuyɛfoɔ nyinaa.

⁶Wosɛe wɔn a wɔka atorosɛm. AWURADE kyiri mogyapɛfoɔ ne asisifoɔ.

⁷ Na me deɛ, menam w’adom bebree so mɛba wo fie, na wo ho suro mu na mɛkoto masɔre makyerɛ w’asɔrefie kronkron no.

⁸AWURADE, fa wo tenenee kyerɛ me kwan, wɔn a wɔtɛ me nti, tene wo kwan wɔ m’anim.

⁹ Na wɔn anomu nni nokwasɛm bi, wɔn yam wɔ mmusuo, wɔn menewa yɛ ɛda a abue, na wɔde wɔn tɛkyerɛma dɛfɛdɛfɛ.

¹⁰Onyankopɔn, bu wɔn fɔ, ma wɔmpɔn mfiri wɔn agyinatuo ho. Wɔn mmarato bebrebe nti sum wɔn gu, na wɔasɔre atia wo.

¹¹ Na ma wɔn a wɔdwane bɛtoa woɔ nyinaa ani nnye, na wɔmfa ahosan nhuro daa, ɛfiri sɛ woakata wɔn so, na ma wɔn a wɔdɔ wo din no ani nka wo ho.

¹² Na wo, AWURADE, wohyira ɔteneneeni, wode anisɔ twa ne ho hyia sɛ ɛkyɛm.