Read New Revised Asante Twi Bible Nnwom 71 Bible Online

Nnwom 71 - New Revised Asante Twi Bible bible

Nnwom 71

¹Wo AWURADE na madwane mabɛtoa woɔ, m’anim rengu ase da biara da.

²Fa wo tenenee yi me, na gye me, yɛ aso ma me, na gye me nkwa.

³ Yɛ sɛ ɔbotan a mɛtena so maba hɔ daa. Woahyɛ sɛ wɔnnye me nkwa, na wone me botan ne me ho fasuo.

⁴Me Nyankopɔn, gye me firi ɔbɔnefoɔ nsam, gye me omumuyɛfoɔ ne otirimuɔdenfoɔ nsam.

⁵Na wo, AWURADE, ne m’anidasoɔ, deɛ mefiri me mmɔfraase mede me ho metoo ne soɔ.

⁶ Wo na mefiri yafunum mede m’akyiri metweree woɔ, woyii me firii me na yam, wo na mɛyi wo ayɛ daa.

⁷ Mayɛ nnipa bebree ani so anwanwadeɛ, na wone me dwanekɔhyɛbea a ɛyɛ den.

⁸W’ayeyie ne w’anidie bɛhyɛ m’anomu ma da mu nyinaa.

⁹ Nto me ntwene nkɔkoraaberɛ, na sɛ m’ahoɔden sa a, nnya me.

¹⁰Na m’atamfoɔ ka me ho asɛm, na wɔn a wɔtɛ me kra bom tu agyina

¹¹ka sɛ: Onyankopɔn apa no; monti no nkye no, na obi nni hɔ a ɔbɛgye no.

¹²Onyankopɔn, mma me ne wo ntam nnware, me Nyankopɔn, yɛ ntɛm bɛboa me.

¹³Me kra ho asɛmpɛfoɔ ani bɛwu na wɔayera, ahohora ne nsopa bɛkata wɔn a wɔpɛ me bɔne so.

¹⁴Na me deɛ, mɛtwɛn ara daa, na mede bi maka w’ayeyie nyinaa ho.

¹⁵ M’ano bɛka wo tenenee, ɛbɛka wo nkwagyeɛ da mu nyinaa a mennim ano.

¹⁶Mede AWURADE Nyankopɔn ahoɔdenneɛ bɛba abɛkae wo tenenee a ɛyɛ wo nkutoo dea no.

¹⁷ Onyankopɔn, wo na wofiri me mmɔfraase kyerɛkyerɛɛ me, na maka w’anwanwadeɛ no mabɛduru sɛsɛɛ.

¹⁸ Onyankopɔn, nkɔkoraaberɛ ne ɛdwono mu nso mpa me, kɔsi sɛ mɛka wo tumi ho asɛm makyerɛ nkyirimma, na maka wo mmaninyɛ makyerɛ wɔn a wɔbɛba nyinaa.

¹⁹ Na, Onyankopɔn, wo tenenee kɔ sorosoro, wo a woayɛ ade akɛseɛ, Onyankopɔn, hwan na ɔte sɛ woɔ?

²⁰ Wo a woma yɛhunu amaneɛ bebree a ɛyɛ ya, wobɛma yɛanya nkwa bio, na woatwe yɛn afiri asase akunu mu asane aba.

²¹Wobɛma me kɛseyɛ adɔ, na woadane w’ani akyekyere me werɛ.

²²Me nso mede bɛnta bɛyi wo ayɛ, me Nyankopɔn, ne wo nokorɛ, mede sankuten bɛto wo, O Israel Hotefoɔ no, dwom.

²³Meto ayeyie dwom ma wo a, m’ano ne me kra a woagye no no ho bɛsane no.

²⁴Mede me tɛkyerɛma nso bɛka wo tenenee ho asɛm daa, ɛfiri sɛ wɔn a wɔpɛ me bɔne no ani awu, na wɔn anim agu ase.