Read New Revised Asante Twi Bible Nnwom 73 Bible Online

Nnwom 73 - New Revised Asante Twi Bible bible

Nnwom 73

¹Asaf dwom. Ampa ara, Onyankopɔn yɛ ma Israel, ma wɔn a wɔn akoma mu teɛ.

² Na me deɛ, anka me nan reyɛ amane, m’anammɔn reyɛ awatiri.

³ Na metwee ahokyerɛfoɔ ho ninkunu, ɛfiri sɛ mehunuu abɔnefoɔ yie a wɔdie no.

⁴Wɔnhunu owuo mu aninyanneɛ, na wɔwɔ honam ne ahoɔden.

⁵Ɔdasani haw deɛ, wɔnni bi, nanso wɔnnwane wɔn ho sɛ nnipa binom.

⁶Enti ahantan adi wɔn kɔn ho barehyia, na akakabensɛm asi wɔn aduradeɛ.

⁷ Srade ama wɔn ani apupu, wɔn akoma mu adwene firi bu so.

⁸Wɔsi atwetwe na wɔde adwemmɔne ka amimdie asɛm, wɔka akokurokosɛm.

⁹Wɔma wɔn ano to ɔsoro, na wɔn tɛkyerɛma nenam asase so.

¹⁰Enti wɔn nkurɔfoɔ twe bɛdane wɔn, na wɔnya nsuo kuruwa ma nom.

¹¹ Na wɔse: Ɛbɛyɛ dɛn na Onyankopɔn bɛhunu, nimdeɛ wɔ ɔsorosoroni no tirim anaa?

¹²Hwɛ, yeinom ne abɔnefoɔ, nanso wɔn ho dwo wɔn daa, wɔama wɔn adeɛ adɔɔso.

¹³Ampa ara, mate m’akoma ho kwa, na mahohoro me nsa bemdie mu kwa,

¹⁴nanso wɔaha me da mu nyinaa na wɔatwe m’aso anɔpa biara.

¹⁵Sɛ mese: Mɛka no sɛɛ deɛ a, anka matwa wo mmasantene nkontompo.

¹⁶Na mesusuu ho sɛ mɛhunu adeɛ yi, ɛyɛɛ m’ani so den dodo,

¹⁷kɔsii sɛ mekɔɔ Nyankopɔn kronkron mu hɔ na mekɔhunuu deɛ akyire ɛkɔwiee wɔn.

¹⁸Ampa ara, wode wɔn gyina deɛ ɛhɔ yɛ torɔ, wode wɔn hwe fam bubu wɔn pasaa.

¹⁹Hwɛ sɛ wɔadane sɛ amamfo seesei ara, ehu ama wɔawie sa.

²⁰Sɛ daeɛ a wɔaso anyane, na wo, AWURADE, wokanyane wo ho a, woma ani pa wɔn sunsumban soɔ.

²¹Sɛ ɛyɛ m’akoma awerɛho na me sawa mu wowɔ me a,

²² anka meyɛ ɔkwasea a mennim de, na mayɛ sɛ aboa, w’ani so.

²³Na me deɛ, mɛtena wo nkyɛn daa, woasɔ me nsa nifa mu.

²⁴Wonam w’atirimpɔ so kyerɛkyerɛ me kwan, na akyire yi no, woagye me akɔ animuonyam mu.

²⁵Hwan na mewɔ no ɔsoro? Na sɛ wowɔ me a, menhwehwɛ asase so hwee.

²⁶ Ma me honam ne m’akoma nwie sa, Onyankopɔn ne m’akoma botan ne me kyɛfa daa.

²⁷Na hwɛ, wɔn a wɔfiri wo nkyɛn kɔ akyiri no bɛyera, wobɛsɛe wɔn a wɔfiri wo nkyɛn kɔbɔ adwaman nyinaa.

²⁸Na me deɛ, Nyankopɔn nkyɛn tena yɛ ma me, mede AWURADE Nyankopɔn mayɛ me dwanekɔhyɛbea na maka wo nnwuma nyinaa.