Read New Revised Asante Twi Bible Nnwom 76 Bible Online

Nnwom 76 - New Revised Asante Twi Bible bible

Nnwom 76

¹Wɔde ma dwonkyerɛfoɔ sɛ wɔmfa asankuo nto. Asaf dwom. Yuda mu na wɔahunu Onyankopɔn, ne din so Israel mu.

² Ne sese si Salem, na ne tenabea wɔ Sion.

³ Ɛhɔ na ɔbubuu tadua mu mmɛmma, ɔkyɛm ne nkrantɛ ne ɔsa.

⁴W’anim yɛ nyam, na ɛhran sene asadeɛ mmepɔ no.

⁵Wɔasɛe abrane akokoɔdurufoɔ no, wɔatɔ nko da wɔn nna, na ahoɔdenfoɔ no mu biara anhunu ne nsa.

⁶Yakob Nyankopɔn, w’ateatea nti na nteaseɛnam ne apɔnkɔ nyinaa adeda nnahɔɔ.

⁷Wo na wo ho yɛ hu, na sɛ wo bo refu a, hwan na ɔbɛtumi agyina w’anim?

⁸ Wofiri soro maa wɔtee atemmuo, asase suroe na ɛtɛm dinn,

⁹berɛ a Onyankopɔn sɔre bɛbuu atɛn, sɛ ɔbɛgye wɔn a wɔdwoɔ asase soɔ nyinaa no.

¹⁰Na nnipa abufuhyeɛ dane wo ayeyie, wode abufuhyeɛ a ɛboro soɔ bɔ abɔsoɔ.

¹¹ Monhyɛ AWURADE, mo Nyankopɔn, bɔ, na momfa mma no. Ma wɔn a wɔatwa ne ho ahyia nyinaa mfa ayɛyɛdeɛ mmrɛ deɛ ne ho yɛ hu no.

¹²Ɔhu atumfoɔ home gu, ne ho yɛ asase so ahemfo hu.