Read New Revised Asante Twi Bible Mmebusɛm 1 Bible Online

Mmebusɛm 1 - New Revised Asante Twi Bible bible

Mmebusɛm 1

¹ Israelhene Salomo, Dawid ba no mmebusɛm nie:

²Sɛ nnipa mfa nhunu nyansa ne nkyerɛkyerɛ, sɛ wɔmfa nhunu nhunumu nsɛm mu;

³sɛ wɔmfa nnye nimdeɛ nkyerɛkyerɛ, tenenee, atemmuo ne adeɛ a ɛtene;

⁴sɛ wɔmfa nkyerɛ ntetekwaa aniteɛ, aberanteɛ nso nimdeɛ ne adwempa:

⁵Na onyansafoɔ ntie, na ne nimdeɛ nnɔɔso, na onimdefoɔ mfa nnya atɛmpa:

⁶Sɛ wɔmfa nhunu abebusɛm ne akasabebuo, anyansafoɔ nsɛm ne wɔn mmɛ mu.

⁷ AWURADE suro ne nimdeɛ mfitiaseɛ; agyimifoɔ bu nyansa ne nkyerɛkyerɛ animtia.

⁸ Me ba, tie w’agya akwankyerɛ, na mpo wo na nkyerɛkyerɛ,

⁹ na ɛyɛ wo tiri animuonyam abotire ne wo kɔn mu ntweaban.

¹⁰Me ba, sɛ nnebɔneyɛfoɔ gyegye wo a, mpene!

¹¹Sɛ wɔse: Bra ma yɛnkɔ mogya ho adɛm, ma yɛnkɔtɛ deɛ ɔdi bem kwa;

¹²ma yɛmmemene wɔn anikan sɛ Asamando, ne amudifoɔ sɛ wɔn a wɔsiane kɔ Amena mu;

¹³yɛbɛnya adeɛ a ne boɔ yɛ den nyinaa, yɛde asadeɛ bɛhyɛ yɛn afie ma.

¹⁴Fa wo kyɛfa bɛbɔ yɛn deɛ mu, yɛn nyinaa bɛnya kotokuo baako.

¹⁵Me ba, wo ne wɔn nnnante ɔkwan so. Twe wo nan firi wɔn sa so.

¹⁶Na wɔn nan tu mmirika kɔ bɔne mu, na wɔyɛ ntɛm hwie mogya gu.

¹⁷Na kwa ara na wɔasum fidie ntakraboa nyinaa anim.

¹⁸Nanso wɔn ara wɔn mogya ho na wɔkɔ adɛm, wɔtɛ wɔn ara wɔn kra.

¹⁹Saa na amim mu mfasopɛfoɔ nyinaa akwan teɛ, ɛfa ne wuranom kra kɔ.

²⁰Nyansa team mmorɔno so, ɔma wɔte ne nne mmɔntene so;

²¹ ɔteam adwabirem tire, kuro mu, kuro apono ano, ɔka ne nsɛm sɛ:

²²Da bɛn ara na mo ntetekwaa mobɛpɛ ntetekwaasɛm akɔsie? Na afɛdifoɔ bɛpɛ wɔn afɛdie, na nkwaseafoɔ akyiri nimdeɛ?

²³Monnane mo ho mma me kasakyerɛ. Hwɛ, mɛworo me honhom ama mo, mɛma moahunu me nsɛm.

²⁴ Sɛ mafrɛ, na mokame, matene me nsam, na obi mfa nyɛ hwee,

²⁵na moto m’afotuo nyinaa twene, na me kasakyerɛ no, mompɛ nti,

²⁶ me nso mɛsere mo mo amaneɛ mu, mo ahopopoɔ bɛba no, mɛyi mo ahi.

²⁷Mo ahopopoɔ ba sɛ aprannaa, na mo amaneɛ ba sɛ ahum, ahohiahia ne ahokyere ba mo so a,

²⁸ ɛno na wɔbɛfrɛ me, na merennye so, wɔbɛhwehwɛ me nhema, na wɔrenhu me.

²⁹Ɛsiane sɛ wɔkyiri nimdeɛ, na wɔampɛ AWURADE suro,

³⁰wɔampɛ m’afotuo, na wɔpoo me kasakyerɛ nyinaa,

³¹ enti wɔbɛdi wɔn kwan so aba, na wɔn agyina a wɔtutuiɛ amee wɔn.

³² Na ntetekwaa akyirisan bɛku wɔn, na nkwasea yiedie bɛsɛe wɔn.

³³ Na deɛ ɔtie me no deɛ ɔbɛtena hɔ komm, na ne ho adwo no a ɔnsuro mmusuo.