Read New Revised Asante Twi Bible Mmebusɛm 12 Bible Online

Mmebusɛm 12 - New Revised Asante Twi Bible bible

Mmebusɛm 12

¹ Deɛ ɔdɔ atenetene dɔ nimdeɛ, na deɛ ɔtane animka di mmoasɛm.

²Onipa pa nya AWURADE anim anisɔ, na onipa busuyɛfoɔ deɛ, ɔbu no fɔ.

³ Onipa remfa abɔnefosɛm so ntim, na ateneneefoɔ nhini rempusu.

⁴ Ɔyepa yɛ ne kunu abotire, na deɛ ɔka aniwusɛm te sɛ nnompe mu porɔ.

⁵ Teneneeni adwene tene, na abɔnefoɔ agyinatuo deɛ ɛyɛ nkontompo.

⁶Abɔnefoɔ nsɛm yɛ mogyatɛ, na teefoɔ ano bɛyi wɔn.

⁷ Wɔbutu abɔnefoɔ, na wɔnni hɔ, na ateneneefoɔ fie deɛ ɛbɛgyina.

⁸Onipa nimdeɛ so na wɔyi no ayɛ, na deɛ wakyea n’akoma no anim bɛgu ase.

⁹Deɛ wɔmmu no nanso ɔwɔ akoa no yɛ sene deɛ ɔhyehyɛ ne ho na n’aduane bɔ no.

¹⁰ Ɔteneneeni bu n’afieboa kra, na abɔnefoɔ ayamyɛ yɛ atirimuɔden.

¹¹ Deɛ ɔdɔ n’asase no didi mee, na deɛ ɔdi nsɛnhunu akyire nni ti.

¹² Ɔbɔnefoɔ pɛ deɛ nnipa bɔne anya, na ateneneefoɔ nhini bɛso aba.

¹³Ano mfomsoɔ yɛ fidie ma ɔbɔnefoɔ, na ɔteneneeni bɛfiri ahohiahia mu.

¹⁴ Onipa anomu aba na ɔde bɛdi papa ameeɛ, na onipa nsa ano adeɛ na wɔbɛdane ama no.

¹⁵Ogyimifoɔ kwan tene n’ani so, na deɛ ɔtie afotuo yɛ onyansafoɔ.

¹⁶Ogyimifoɔ abohuro da adi ntɛm, na ɔbadwemma deɛ, ɔkata aniwuo so.

¹⁷Deɛ ɔka nokorɛ no ka deɛ ɛtene, na ɔdansekurumfoɔ deɛ, ɔtwa nkontompo.

¹⁸ Ɛwɔ deɛ ɔworo kasa sɛ nkrantɛ nwowɔeɛ, na onyansafoɔ tɛkyerɛma sa yadeɛ.

¹⁹Nokorɛ ano tim hɔ daa, na tɛkyerɛma torofoɔ deɛ wɔnkyɛre koraa.

²⁰Nnaadaa wɔ wɔn a wɔdwene bɔne akoma mu, na asomdwoeɛ ho afotufoɔ nya anigyeɛ.

²¹Mmusuo biara rento ɔteneneeni, na amaneɛ bɛhyɛ abɔnefoɔ ma.

²² AWURADE akyiwadeɛ ne atorɔ ano, na wɔn a wɔdi nokorɛ sɔ n’ani.

²³ Onipa niteɛfoɔ kora nimdeɛ, na nkwaseafoɔ akoma pae agyimisɛm mu.

²⁴ Nsiyɛfoɔ nsa bɛdi panin, na aniha nsa bɛyi toɔ.

²⁵ Onipa akoma mu awerɛhoɔ boto no, na asɛmpa ma akoma tɔ yam.

²⁶Ɔteneneeni kyerɛ ne yɔnko kwan, na abɔnefoɔ kwan ma wɔfom.

²⁷ Onihafoɔ nsa nka ne hanam, na nsiyɛfoɔ deɛ ɔnya onipa adeɛ a ne boɔ yɛ den.

²⁸Tenenee kwan so na nkwa wɔ, na kwatikwan deɛ, ɛkɔ owuo mu.