Read New Revised Asante Twi Bible Mmebusɛm 20 Bible Online

Mmebusɛm 20 - New Revised Asante Twi Bible bible

Mmebusɛm 20

¹ Nsa yɛ ɔfɛdifoɔ, nsaden yɛ ntɔkwapɛni, na obiara a ɔtɔ mu ntintan no nnim nyansa.

² Ɔhene ho hu te sɛ gyata mmobom, deɛ ɔyi no abufuo no yɛ ne kra bɔne.

³Ɛyɛ ɔbarima animuonyam sɛ ɔtwe ne ho firi ɔham mu, na agyimifoɔ deɛ, wɔpɛ ntɔkwa.

⁴ Awɔ nti ɔkwadwofoɔ mfuntum, twaberɛ mu ɔbɛhwehwɛ biribi, nanso ɔrennya hwee.

⁵ Ɔbarima akoma mu agyinatuo te sɛ nsuo a emu dɔ, nso deɛ ɔwɔ nhunumu bɛsa.

⁶Nnipa bebree ka wɔn ara adɔeɛyɛ, na ɔbarima nokwafoɔ deɛ, hwan na ɔbɛhu no?

⁷ Ɔteneneeni a ɔnam ne pɛyɛ mu, wɔbɛhyira ne mma wɔ n’akyi.

⁸ Ɔhene a ɔte asennie adwa soɔ de n’aniwa huhu bɔne nyinaa so.

⁹ Hwan na ɔbɛka sɛ: Mate no m’akoma mu, me ho afi afiri me bɔne ho?

¹⁰ Abrammoɔ ahodoɔ, susukodoɔ ahodoɔ, ne mmienu nyinaa yɛ AWURADE akyiwadeɛ.

¹¹ Abɔfra mpo, wɔde ne nneyɛɛ na ɛhu no, sɛ n’adeyɛ bɛyɛ yie na atene.

¹²Aso a ɛteɛ ne aniwa a ɛhunu, AWURADE na ɔyɛɛ ne mmienu nyinaa.

¹³ Mpɛ nna, na woanni hia; bue w’ani, na aduane bɛmee wo.

¹⁴Ɛnyɛ, ɛnyɛ! Sɛ ɔdetɔfoɔ seɛ ne no, na ɔdane ne ho kɔ a, na ɔrehoahoa ne ho.

¹⁵Sika wɔ hɔ, na nhwene pa pii wɔ hɔ, na kasa a nimdeɛ wɔ mu no te sɛ adwinneɛ a ne boɔ yɛ den.

¹⁶ Deɛ ɔdi ɔhɔhoɔ agyinamu no, fa ne ntoma, na deɛ ɔdi ɔnanani akagyinamu no, gye no awowa.

¹⁷ Aduane a wɔnam nnaadaa so nya yɛ obi dɛ, nanso akyire yi no, mmoseaa yɛ n’anomu ma.

¹⁸ Wɔde agyinatuo na ɛma tirimbɔ gyina, na fa atɛmpa kyekyere ɔsa.

¹⁹Deɛ ɔkyini di nsekuro no yi ahuntasɛm adi, enti mfa wo ho mmɔ deɛ ɔtrɛ n’anomu.

²⁰ Deɛ ɔdome n’agya ne ne na no, ne kanea bɛdum esum kabii mu.

²¹Agyapadeɛ a wɔde ntɛmpɛ nya no mfitiaseɛ no, akyire renwie nhyira.

²² Nka sɛ: Mɛhyɛ bɔne ananmu. Twɛn AWURADE, na ɔbɛboa wo.

²³ AWURADE akyiwadeɛ ne abrammoɔ ahodoɔ, na nsisie nsania nso nyɛ.

²⁴Onipa anammɔntutuo firi AWURADE, na ɛbɛyɛ dɛn na ɔbɛhunu n’akwan mu?

²⁵Ɛyɛ fidie ma onipa sɛ ɔbɛpɛ ntɛm aka sɛ: Ɛyɛ ade kronkron, na ɔbɛhyɛ bɔ ansa na wabisabisa mu.

²⁶ Ɔhene nyansafoɔ hu abɔnefoɔ so, na ɔde teaseɛnam nan fa wɔn so.

²⁷ AWURADE kanea ne onipa ahome, ɛhwehwɛ yam mpia mu hwɛ.

²⁸ Adɔeɛ ne nokorɛ hwɛ ɔhene so, na adɔeɛ so na n’adwa tim.

²⁹ Mmeranteɛ animuonyam ne wɔn ahoɔden, na nkɔkoraa ahoɔfɛ ne ɛdwono.

³⁰Mmaa a ɛpira twi ɔbɔne ho, na ɛhweɛ hyɛne yam mpia mu.