Read New Revised Asante Twi Bible Mmebusɛm 21 Bible Online

Mmebusɛm 21 - New Revised Asante Twi Bible bible

Mmebusɛm 21

¹ Ɔhene akoma te sɛ asutene AWURADE nsam, baabiara a ɔpɛ no na ɔdane korɔ.

² Onipa kwan biara tene n’ani so, nanso akoma karifoɔ ne AWURADE.

³ Asɛnteneneedie ne atɛntenenee sɔ AWURADE ani sene afɔrebɔ.

⁴ Ani a ɛtra ntɔn ne akoma a ɛhoran, mekyerɛ, abɔnefoɔ kwan no deɛ, ɛyɛ bɔne.

⁵ Nsiyɛfoɔ adwene de adedodoɔ ara na ɛba, na obiara a ɔpere ho no, ɛde kɔ ohia nko mu.

⁶ Ademudeɛ a wɔde atorɔ tɛkyerɛma anya yɛ ahuhuo a ahu korɔ; wɔn a wɔhwehwɛ no hwehwɛ owuo.

⁷Abɔnefoɔ akakabensɛm de wɔn kɔ, ɛfiri sɛ wɔpo atemmuo.

⁸Ɔbarima a ɛso da ne soɔ kwan kyea, na deɛ ne ho teɛ adwuma yɛ tee.

⁹ Ɛdan atifi kokoam tena yɛ sene sɛ wo ne ɔbaa tɔkwapɛfoɔ bɛtena ɛdan mu.

¹⁰Ɔbɔnefoɔ kra kɔn dɔ bɔne, ne yɔnko anim nyɛ nyam n’ani so.

¹¹ Sɛ wɔtea fɛdifoɔ a, atetekwaa hunu nyansa, na onyansafoɔ yiedie mu na ɔnya nimdeɛ.

¹²Ɔteneneeni gyene n’ani hwɛ abɔnefoɔ fie, sɛdeɛ wɔka abɔnefoɔ guo sɛe wɔn.

¹³Deɛ ɔsi n’aso firi mmɔborɔfoɔ su ho no, ɔno nso bɛsu afrɛ, na wɔrennye no so.

¹⁴ Kokoam adekyɛ pata abufuo, na kokom adanmudeɛ dwodwo abufuhyeɛ.

¹⁵Ɛyɛ ɔteneneeni anigyeɛ sɛ ɔbɛdi asɛntenenee, na ɛyɛ hu ma amumuyɛfoɔ.

¹⁶Onipa a ɔfom firi nimdeɛ kwan soɔ no bɛtena nsamanfoɔ asafo mu.

¹⁷ Deɛ ɔdɔ anigyeɛ bɛdi hia, deɛ ɔdɔ nsa ne ngo rennya adeɛ.

¹⁸ Ɔbɔnefoɔ bɛyɛ ɔteneneeni agyedeɛ, na nkontomponi bɛsi teefoɔ ananmu.

¹⁹ Anwea pradada asase so tena yɛ sene ɛyerɛ nwiinwiifoɔ a ne bo nnwo no nkyɛn tena.

²⁰Ademudeɛ a ɛsom boɔ ne ngo wɔ onyansafoɔ tenabea, na ɔkwasea deɛ, ɔsɛe no.

²¹Deɛ ɔdi tenenee ne adɔeɛ akyire no, ɔbɛnya nkwa, tenenee ne animuonyam.

²² Onyansafoɔ foro nnɔmmarima kuro, na ɔsum ahoɔden a wɔde wɔn ho too soɔ no twene.

²³ Deɛ ɔkora n’ano ne ne tɛkyerɛma no, ɔkora ne kra firi ahohia mu.

²⁴Ɔhantanni a wahuhuro, ne din de ɔfɛdifoɔ, ɔdi n’asɛm ahantan ntrasoɔ mu.

²⁵ Ɔkwadwofoɔ akɔnnɔ ku no, ɛfiri sɛ ne nsa nsɔ adeɛ mu.

²⁶Obi wɔ hɔ a n’ani bere adeɛ kɔkɔɔkɔ daa nyinaa, na ɔteneneeni deɛ, ɔma na ɔnnodo ho.

²⁷ Abɔnefoɔ afɔrebɔ yɛ akyiwadeɛ, na nkantom sɛ ɔde bɛfa adwemmɔne mu aba.

²⁸ Adansefoɔ atorofoɔ bɛyera, na onipa a ɔtie asɛm, ɔkasa daa.

²⁹Onipa bɔnefoɔ kum n’anim, na ɔteefoɔ deɛ, ɔtaataa n’akwan.

³⁰ Nyansa ne nhunumu ne afotuo biara nni hɔ a ɛne AWURADE bɛdi asie.

³¹ Wɔsiesie ɔpɔnkɔ ma ko da, na nkonimdie deɛ, ɛwɔ AWURADE nsam.