Read New Revised Asante Twi Bible Mmebusɛm 3 Bible Online

Mmebusɛm 3 - New Revised Asante Twi Bible bible

Mmebusɛm 3

¹Me ba, mma wo werɛ mmfiri me mmara, na ma w’akoma nni me mmara nsɛm so;

² ɛfiri sɛ onyinkyerɛ, nkwa mfeɛ ne asomdwoeɛ na ɛde bɛka wo ho.

³ Mma adɔeɛ ne nokorɛ nnnyaa wo; fa kyekyere wo kɔn, twerɛ no w’akoma pono so.

⁴ Ɛnna wobɛnya adom ne nimdeɛ pa, Nyankopɔn ne nnipa anim.

⁵Fa w’akoma nyinaa bata AWURADE ho, na mfa wo ho ntwere w’ankasa wo nteaseɛ.

⁶Fa w’akwan nyinaa hyɛ ne nsa, na ɔno na ɔbɛtene w’akwan.

⁷ Nyɛ w’ani so onyansafoɔ, suro AWURADE, na dane firi bɔne ho.

⁸ Ɛbɛyɛ ahoɔden ama wo honam, ne nkwahosan ama wo nnompe.

⁹ Fa w’ahonyadeɛ hyɛ AWURADE animuonyam, ne wo nnɔbaeɛ mu adikan nyinaa;

¹⁰ɛnna adedodoɔ bɛyɛ w’asan amaama, na wo nsa-kyi-amena mu nsa foforɔ bɛbu soɔ.

¹¹ Me ba, mpo AWURADE nkyerɛkyerɛ, na mma n’animka mmfono wo;

¹² na deɛ AWURADE dɔ no na ɔka n’anim, sɛdeɛ agya yɛ ne ba a ɔdɔ no no.

¹³ Nhyira ne onipa a ɔhunu nyansa, ne onipa a ɔnya nteaseɛ.

¹⁴ Na emu adenya yɛ sene dwetɛ deɛ, na ne mfasoɔ sene sika amapa.

¹⁵ Ne boɔ yɛ den sene mmota, na afɛfɛdeɛ nyinaa, wɔmfa nto ho.

¹⁶ Onyinkyerɛ wɔ ne nifa mu, ne benkum kura adeɛ ne animuonyam.

¹⁷N’akwan yɛ akwan a ɛyɛ fɛ, na n’asa nyinaa yɛ asomdwoeɛ.

¹⁸Ɛyɛ nkwa dua ma wɔn a wɔsɔ ne mu, na nhyira ne deɛ ɔkura mu.

¹⁹ AWURADE de nyansa na ɛhyɛɛ asase aseɛ, ɔde nteaseɛ de ɔsoro tim hɔ;

²⁰ne nimdeɛ so na abunu mu nsuo paeeɛ, na mununkum sosɔ obosuo.

²¹Me ba, fa nyansa mapa ne adwempa sie, mma no nnnane mfiri w’ani so,

²² na ayɛ nkwa ama wo kra ne animuonyam ama wo kɔn.

²³Ɛno na wobɛnante wo kwan so dwoodwoo, na wo nan ansunti.

²⁴ Sɛ wokɔda a, woremmɔ binim, na woda a, wo nna bɛyɛ dɛ.

²⁵Nsuro mpofirim huyie ne abɔnefoɔ sɛeɛ a ɛbɛba.

²⁶ Na AWURADE bɛyɛ w’ahodasodeɛ, na ɔbɛkora wo nan afiri ɛkyerɛ mu.

²⁷Mfa yieyɛ nkame deɛ ɛsɛ no, berɛ a ɛwɔ wo tumi mu sɛ wobɛyɛ no.

²⁸Nka nkyerɛ wo yɔnko sɛ: Kɔ na bra! ne: Ɔkyena mede bɛma, berɛ a ɛwɔ wo hɔ.

²⁹Mpam wo yɔnko ho apammɔne, berɛ a ɔne wo te hɔ dwoodwoo no.

³⁰Ɛne obi nnni ntɔkwasɛm kwa, berɛ a ɔnyɛɛ wo bɔne biara no.

³¹Ntwe otirimuɔdenfoɔ ho ninkunu, nanso nyi n’akwan mu biara.

³² Na ɔkɔnkɔnsani yɛ AWURADE akyiwadeɛ, na teefoɔ na ɔne wɔn ka atirimusɛm.

³³AWURADE nnome wɔ ɔbɔnefoɔ fie, na ɔhyira ateneneefoɔ tenabea.

³⁴ Aane, ɔdi afɛdifoɔ ho fɛw, na ɔdom ahobrɛasefoɔ.

³⁵Anyansafoɔ bɛnya animuonyam adi, na nkwaseafoɔ deɛ wɔbɛsoa ahohora.