Read New Revised Asante Twi Bible Mmebusɛm 8 Bible Online

Mmebusɛm 8 - New Revised Asante Twi Bible bible

Mmebusɛm 8

¹ Ɛno ɛnyɛ nyansa na ɛteam, na nteaseɛ ma ne nne soɔ?

²Sorɔnsorɔn atifi, ɔkwan so, nkwanta so na ɛgyina,

³na ɔteam aponkɛseɛ ho, kurotia, aboboano sɛ:

⁴Mo, mmarima, na meteam mefrɛ mo, na me nne gyegye ma nnipa mma:

⁵Mo, ntetekwaa, momma mo ani nte, na mo, nkwaseafoɔ, monnya nhunumu akoma.

⁶Montie, na merebɛka nsɛm a emu da hɔ, na m’anomu bue de nsɛm a ɛtene ba;

⁷na nokorɛ firi m’anomu, na m’ano akyiwadeɛ ne abɔnefosɛm;

⁸m’anomu nsɛm nyinaa nam tenenee mu, adeɛ a akyinkyim anaasɛ ɛkyea nni mu;

⁹ne nyinaa mu da hɔ ma nhunumufoɔ, na ɛtene ma wɔn a wɔahunu nimdeɛ.

¹⁰ Momfa m’atenetene, na ɛnyɛ dwetɛ, na momfa nimdeɛ, na monnya sika a wɔayiyi mu.

¹¹Na nyansa yɛ sene mmota, na afɛfɛdeɛ nyinaa, wɔmfa nto ho.

¹²Me, nyansa, me ne aniteɛ na ɛteɛ, na adwempa nimdeɛ na mehunu.

¹³ AWURADE suro ne bɔne tane: Ahokyerɛ, ahantan, ɔkwammɔne ne akontonkyisɛm ano na mekyire.

¹⁴Afotuo ne nyansahunu wɔ me, mene nhunumu, mmaninyɛ wɔ me.

¹⁵ Me so na ahemfo nam di hene, na atitire hyɛ mmara tenenee;

¹⁶me so na mpanimfoɔ nam di panin, ne aberempɔn, ne asase so atemmufoɔ nyinaa.

¹⁷Me deɛ, medɔ wɔn a wɔdɔ me, na wɔn a wɔhwehwɛ me ntɛm hu me.

¹⁸ Ahonyadeɛ ne animuonyam wɔ me hɔ, ahodeɛ a ɛkyɛre ne tenenee.

¹⁹M’aba yɛ sene sika ne sika amapa, na me nnɔbaeɛ sene dwetɛ a wɔayiyi mu.

²⁰Tenenee tempɔn mu na menam, atemmuo akwan so pɛ,

²¹sɛ merema m’adɔfo adi adeɛ, na mahyɛ wɔn adekorabea amaama.

²² AWURADE bɔɔ me de firii n’adwuma ase, ne nnwuma a ɛfiri teteete no mu adikan.

²³Ɔde me sii hɔ firi tete nteredee, firi mfitiaseɛ ansa na asase reba.

²⁴Abunu nni hɔ no, na wɔawo me, nsutire a ɛba nsuo pii nni hɔ no;

²⁵wɔnnya mfaa mmepɔ nsisii hɔ, na nkokoɔ nnya mmaeɛ no, na wɔawo me,

²⁶ɔnnya nyɛɛ asase ne wiram ne wiase mfuturo no.

²⁷ Ɔsiesiee ɔsoro no, na mewɔ hɔ, berɛ a ɔtwaa abunu ani kɔntɔnkrɔn no;

²⁸ɔde mununkum sensɛnee soro pintinn, na ebunu mu nsuo aniwa paee denden,

²⁹ ɔtwaa ɛpo hyeɛ, na nsuo antra, na ɔde asase fapem too hɔ no,

³⁰na mewɔ ne nkyɛn sɛ ne dwumfoɔ panin, na meyɛ n’adɔdeɛ daa daa. Na m’ani gye n’anim berɛ nyinaa mu,

³¹ na m’ani gye ne wiase asase so, na m’ani ka wɔ nnipa mma mu.

³²Na afei, mma, montie me, na nhyira ne wɔn a wɔdi m’akwan soɔ.

³³Montie atenetene na monhunu nyansa, na monnte atua.

³⁴Nhyira ne onipa a ɔtie me na ɔwɛn m’apono ano daa daa, na ɔhwɛ m’aboboano aponnwa soɔ.

³⁵ Na deɛ ɔhu me no hunu nkwa, na ɔnya AWURADE hɔ anisɔ;

³⁶na deɛ ɔfom me no di ne kra aborɔ, wɔn a wɔtane me nyinaa dɔ owuo.