Read New Revised Asante Twi Bible Ɔsɛnkafoɔ 10 Bible Online

Ɔsɛnkafoɔ 10 - New Revised Asante Twi Bible bible

Ɔsɛnkafoɔ 10

¹Nwansena funu ma odufrani aduro bɔn na ɛporɔ, na nkwaseasɛm kakra yɛ duru sene nyansa ne animuonyam.

²Onyansafoɔ akoma wɔ ne nifa mu, na ɔkwasea akoma wɔ ne benkum mu.

³Nanso ɔkwan biara a ɔkwasea fa soɔ no, nteaseɛ bɔ no, na ɔka kyerɛ nnipa nyinaa sɛ ɔyɛ ɔkwasea.

⁴ Sɛ otumfoɔ honhom sɔre tia wo a, nnya w’afa, na ɛdwo brɛ bɔne akɛseɛ ano ase.

⁵Adebɔne bi wɔ hɔ a mehunuu no owia yi aseɛ sɛ mfomsoɔ bi a ɛfiri otumfoɔ anim,

⁶ wɔama nkwaseafoɔ so bebree, na adefoɔ tete fam.

⁷Mahunu nkoa a wɔtete apɔnkɔ soɔ ne adehyeɛ a wɔnenam fam sɛ nkoa.

⁸ Deɛ ɔtu amena no, emu na ɔbɛhweɛ, na deɛ ɔburi ban no, ɔwɔ bɛka no.

⁹Deɛ ɔtu aboɔ no, ɛbɛhyɛ no yea, na deɛ ɔpae nnua no, emu na ɔbɛpira.

¹⁰Sɛ obi dadeɛ ano akum na wanse ano a, ɛnneɛ gye sɛ ɔma ahoɔden dɔɔso, na mfasoɔ a wɔde di yie ne nyansa.

¹¹ Sɛ ɔwɔ ka ansa na wɔakyekyere no nkaberɛ a, na mfasoɔ biara nni hɔ mma nkaberɛkyekyerefoɔ.

¹²Onyansafoɔ anomu asɛm yɛ nyam, na ɔkwasea ano bɛmene no.

¹³N’anomu asɛm mfitiaseɛ yɛ nkwaseasɛm, na ne kasa awieeɛ yɛ adammɔ bɔne.

¹⁴ Ɔkwasea nso ma nsɛm dɔɔso. Onipa nnim deɛ ɛreba, na deɛ ɛbɛba n’akyire no, hwan na ɔbɛkyerɛ no?

¹⁵Nkwaseafoɔ haw hyɛ deɛ ɔnnim kuro mu korɔ brɛ.

¹⁶ Due, wo asase a wo hene yɛ abɔfra, na wo mmapɔmma to pono anɔpa.

¹⁷Nhyira ne wo, O asase a wo hene yɛ adehyeɛ ba, na wo mmapɔmma to pono berɛ a ɛsɛ mu, ahoɔden nti, na ɛnyɛ nsaborɔ nti.

¹⁸ Akwadworɔ nti na mpuna hwinhwan, na aniha ma ɛdan nwunu.

¹⁹ Sereɛ nti na wɔsiesie aduane, na nsa ma ateasefoɔ anigyeɛ, na sika na ɛyɛ adeɛ nyinaa.

²⁰ Nnome ɔhene w’adwene mu mpo, na nnome ɔdefoɔ wo dabekyire, na ewiem nnomaa bi de nne no bɛkɔ, na ntakraboa bi mpo aka asɛm no.