Read New Revised Asante Twi Bible Ɔsɛnkafoɔ 11 Bible Online

Ɔsɛnkafoɔ 11 - New Revised Asante Twi Bible bible

Ɔsɛnkafoɔ 11

¹ To wo paanoo gu nsuo ani, na daakye bi wo nsa bɛka.

²Kyɛ mu ma nnipa baason anaasɛ baawɔtwe mpo, na wonnim bɔne ko a ɛbɛba asase soɔ.

³Sɛ osuo yɛ mununkum ma a, ɛtɔ gu asase so; na sɛ dua kɔhwe anafoɔ fam anaa atifi fam a, faako a dua no hweɛ no, ɛhɔ na ɛbɛda.

⁴Deɛ ɔhwɛ mframa no rengu aba, na deɛ ɔhwɛ mununkum no rentwa.

⁵ Sɛdeɛ wonnim mframa kwan ne sɛdeɛ nnompe nyini onyinsɛnfoɔ yam no, saa ara na wonnim Nyankopɔn a ɔyɛ ade nyinaa no nneyɛɛ.

⁶Gu w’aba anɔpa, na anwummerɛ nso nyi wo nsa mfiri ho; na wonnim deɛ ɛbɛyɛ yie, yei anaa yei, anaasɛ ne mmienu nyinaa bɛbom ayɛ yie.

⁷Nso hann yɛ dɛ, na ɛyɛ aniwa fɛ sɛ ɛhunu owia.

⁸Na sɛ onipa di mfeɛ pii a, ɔmma n’ani nnye ne nyinaa mu, na ɔnkae esum nna no, sɛ ɛbɛdɔɔso; deɛ ɛbɛba nyinaa yɛ ahuhudeɛ.

⁹ Aberanteɛ, ma w’ani nnye wo mmɔfraase, na nya akoma pa wo mmeranteberɛ mu, na fa w’akoma akwan so ne deɛ w’ani hunu mu, nso hunu sɛ yeinom nyinaa nti na Onyankopɔn de wo bɛkɔ atemmuo mu.

¹⁰Na yi awerɛhoɔ firi w’akoma mu, na ma adebɔne mpare wo honam, na mmɔfraase ne mmeranteberɛ yɛ ahuhudeɛ.