Read New Revised Asante Twi Bible Ɔsɛnkafoɔ 7 Bible Online

Ɔsɛnkafoɔ 7 - New Revised Asante Twi Bible bible

Ɔsɛnkafoɔ 7

¹ Din pa yɛ sene ngo a ne boɔ yɛ den, na owuda yɛ sene awoda.

²Efie a ayie wɔ mu korɔ yɛ sene efie a apontoɔ wɔ mu korɔ, ɛfiri sɛ ɛno yɛ nnipa nyinaa awieeɛ, na ɔteasefoɔ de hyɛ n’akomam.

³Awerɛhoɔ yɛ sene sereɛ, na anim mmɔbɔmmɔbɔyɛ mu na akoma nam nya suahunu.

⁴Anyansafoɔ akoma wɔ abooboodie fie, na nkwaseafoɔ akoma wɔ ahuhu fie.

⁵Onyansafoɔ animka tie yɛ sene sɛ obi tie nkwaseafoɔ dwontoɔ.

⁶Na sɛdeɛ nkasɛɛ turituri ɛsɛn aseɛ no, sɛ ɔkwasea sereɛ teɛ ne no; yei nso yɛ ahuhudeɛ.

⁷Aane, nhyɛsoɔ bɔ onyansafoɔ dam, na ayɛyɛdeɛ sɛe akoma.

⁸Asɛm awieeɛ yɛ sene ne mfitiaseɛ, ntoboaseɛ honhom yɛ sene ahomasoɔ honhom.

⁹ Mma wo honhom mmpere abohuro ho, na nkwaseafoɔ kokom na abufuo teɛ.

¹⁰Nka sɛ: Adɛn na na akane nna no yɛ sene yeinom yi? Na ɛnyɛ nyansa so na wobisa yei aseɛ.

¹¹Nyansa yɛ sɛ awunnyadeɛ, na ɛyɛ mfasoɔ ma wɔn a wɔhunu owia no.

¹² Na nyansa nwunu ase tena te sɛ sika nwunu ase tena, na nimdeɛ yɛ mfasoɔ, na nyansa gye ne wura nkwa.

¹³ Hwɛ deɛ Onyankopɔn ayɛ. Na hwan na ɔbɛtumi atene deɛ ɔno akyea no?

¹⁴Da pa mu, ma w’ani nnye, na da bɔne mu, dwene ho; Onyankopɔn ayɛ yei nso aka ɛno ho, deɛ ɛbɛyɛ na onipa anhunu n’akyiri biribiara.

¹⁵ Mahunu adeɛ nyinaa m’abrabɔ hunu nna mu: Ɔteneneeni bi wɔ hɔ a, ne tenenee nyinaa mu no, ɔyera firi hɔ, na ɔbɔnefoɔ bi nso wɔ hɔ a, ne bɔne nyinaa akyiri no, ɔtena ase kyɛre.

¹⁶Nyɛ wo ho ɔteneneeni bebrebe, na nyɛ onyansafoɔ ntra so: Adɛn nti na wosɛe wo ho?

¹⁷Mma abɔnefosɛm nnɔɔso na nyɛ ɔkwasea nso. Adɛn nti na wobɛbu wo berɛ mu awuo?

¹⁸Ɛyɛ sɛ wosɔ yei mu, na yei nso wonyi wo nsa mfiri ho. Na deɛ ɔsuro Onyankopɔn bɛfiri ne nyinaa mu.

¹⁹Nyansa hyɛ onyansafoɔ den sene atumfoɔ du a wɔwɔ kuro mu.

²⁰ Ampa ara, onipa tenenee biara nni asase so a ɔyɛ papa na ɔnyɛ bɔne.

²¹Nso mfa w’akoma nsi nsɛm a wɔka nyinaa so, na woante sɛ w’akoa redome wo.

²²Na w’akoma nim mprɛ bebree a wo nso wodomee ebinom.

²³Mede nyansa masɔ yei nyinaa mahwɛ; mekaa sɛ: Mɛhunu nyansa; nso ɛne me ntam ware.

²⁴Deɛ ɛwɔ hɔ wɔ akyirikyiri na ɛyɛ donkodonko, hwan na ɔbɛhunu?

²⁵Mede m’akoma nso mekyinii sɛ mɛhunu na mapeepee mu na mahwehwɛ nyansa ne adwempa, na mahunu abɔnefosɛm sɛ ɔkwaseayɛ, ne nkwaseasɛm sɛ adammɔ.

²⁶ Na mahunu deɛ ɛyɛ nwono sene owuo: Ɔbaa a n’akomam wɔ fidie ne asau na ne nsa yɛ nhoma. Deɛ ɔsɔ Nyankopɔn ani bɛfiri ne ho afi, na ɔdebɔneyɛni deɛ, ɔbɛkye no.

²⁷Hwɛ, yei na mahunu, Ɔsɛnkafoɔ no na ɔseɛ, mefaa no mmaako mmaako, na manya ho mmuaeɛ.

²⁸Deɛ me kra hwehwɛ bio nanso menhunuiɛ nie: Ɔbarima baako na mahu no apem mu, na ɔbaa deɛ, menhunuu bi, yeinom nyinaa mu.

²⁹ Hwɛ, yei nko na mehunuu sɛ: Onyankopɔn yɛɛ onipa tee, na wɔn ara na wɔhwehwɛ tirim adwene bebree.