Read New Revised Asante Twi Bible Nnwom mu dwom 4 Bible Online

Nnwom mu dwom 4 - New Revised Asante Twi Bible bible

Nnwom mu dwom 4

¹ Hwɛ, wo ho yɛ fɛ, me dɔfoɔ, hwɛ, wo ho yɛ fɛ, na w’aniwa yɛ aborɔnoma ani, w’anim nkatanim mu. Wo nwi te sɛ mmirekyikuo a wɔsiane wɔ Gilead bepɔ ho.

² Wo se te sɛ nnwanten bereɛ a wɔatwitwa wɔn nwi a wɔfiri adwareeɛ a wɔn nyinaa awowo ntanta, na deɛ wabu kyene nni wɔn mu.

³ W’anofafa te sɛ koogyan homa, na w’anomu kasa yɛ dɛ. W’asontorɔ mu te sɛ atoaa aba fa, w’anim nkatanimu mu.

⁴ Wo kɔn si so teateawa sɛ Dawid abantenten a akyɛm nketenkete apem sensɛne ho, ne nyinaa yɛ nnɔmmarima akyɛm.

⁵ Wo nufo mmienu te sɛ atweburuwa nta a wɔdidi sukooko mu.

⁶ Mɛkɔ kurobo bepɔ ne ohwamfufuo kokoɔ no so akɔsi sɛ onwunu bɛdwoɔ, na sunsum bɛyera.

⁷ Wo ho nyinaa yɛ fɛ, me dɔfoɔ, na ɛdɛm biara nni wo ho.

⁸M’ayeforɔ, ɛne me mfiri Lebanon, ɛne me mfiri Lebanon nkɔ, na yɛmfiri Amana atifi, Senir ne Hermon atifi, agyata tenabea, asebɔ mmepɔ so, nhwɛ fam.

⁹Woakye m’akoma, me nuabaa, m’ayeforɔ, wode w’aniwa a wode hwɛɛ me no afa m’akoma ne wo kɔn mu ntweaban baako.

¹⁰Sɛdeɛ wo dɔ si yɛ dɛ, me nuabaa, m’ayeforɔ, sɛdeɛ wo dɔ si yɛ dɛ sene nsa, na wo sradehwam hwa sene duhwam biara.

¹¹W’ano sosɔ ɛwomono, m’ayeforɔ, ɛwoɔ ne nufosuo wɔ wo tɛkyerɛma ase, na wo ntadeɛ mu hwa te sɛ Lebanon hwa.

¹²Me nuabaa, m’ayeforɔ yɛ turo a woato ano pono mu, nsuo aniwa a wɔasi ano kwan, ne asubura a wɔasɔ ano.

¹³Wo mman yɛ atoaa aba ne nnuaba a ɛwɔ boɔ turo, ahuahaa ne nnuannua ahodoɔ,

¹⁴nnuannua ne nkuto, bɛwewonua ne pɛprɛ ne ohwamfufuo nnua nyinaa, kurobo ne dupapo ne nnuhwam atitire nyinaa;

¹⁵nturo mu asubura, mmasuo aniwa ne nsuwansuwa a ɛfiri Lebanon so sene.

¹⁶Atifi fam mframa, sɔre, na anafoɔ mframa nso, bra bɛbɔ me turo mu, ma ne nnuhwam nsosɔ. Ma me dɔfoɔ mmra ne turo mu, na ɔnni mu nnuaba a ɛwɔ boɔ no.