Read New Revised Asante Twi Bible Nnwom mu dwom 5 Bible Online

Nnwom mu dwom 5 - New Revised Asante Twi Bible bible

Nnwom mu dwom 5

¹ Maba me turo mu, me nua, m’ayeforɔ, meretete me kurobo ne m’aduhwam, meredi me woɔkyɛm ne me woɔ, merenom me nsa ne me nufosuo. Nnamfonom, monnidi, adɔfonom, monnom na mommee.

² Me deɛ, medae, nanso na m’akoma anyane. Tie! me dɔfoɔ na ɔrebom sɛ: Hini me, me nuabaa, me dɔfoɔ, m’aburuburo a wodi mu; na obosuo ayɛ m’atifi ma, anadwo nsosɔeɛ ayɛ me mpɛsɛmpɛsɛ ma.

³Mayi m’atadeɛ, mɛyɛ dɛn mahyɛ? Mahohoro me nan ho, mɛyɛ dɛn mayɛ no fi?

⁴Me dɔfoɔ de ne nsa kaa pono no, na m’akoma dii ahurisie wɔ me mu.

⁵Ɛnna mesɔree sɛ merekɔhini me dɔfoɔ no, kurobo sosɔɔ me nsa ho, na kurobo a ɛnene sosɔɔ me nsateaa so, apratwom nsɔmu so.

⁶ Mehinii me dɔfoɔ, nanso na me dɔfoɔ adane ne ho asane kɔ. Ɔrekasa no, m’akoma tui. Mehwehwɛɛ no, na manhu no, mefrɛɛ no, na wannye me so.

⁷Awɛmfoɔ a wɔkyini kuro mu no bɛtoo me, wɔbobɔɔ me, wɔpiraa me, afasuo so awɛmfoɔ gyee me nkatanimu.

⁸ Meka mo ntam, Yerusalem mmammaa, sɛ mohunu me dɔfoɔ a, monka nkyerɛ no sɛ ɔdɔ ayare me.

⁹Ɛdeɛn na wo dɔfoɔ de sene ɔdɔfoɔ bie, O mmaa mu ɔhoɔfɛni? Ɛdeɛn na wo dɔfoɔ de sene ɔdɔfo bie, sɛ woka ntam gu yɛn so seyie?

¹⁰Me dɔfoɔ hoa na ɔbere, ɔda nso nnipa mpemdu mu.

¹¹Ne tiri yɛ sika amapa pa, ne mpɛsɛmpɛsɛ yɛ kuhaa, ɛbiri sɛ anene.

¹² N’aniwa te sɛ asutene ho mmuruburo a wɔdware nufosuo, sisi ne mayɛ soɔ.

¹³ N’afono te sɛ aduhwam akofie a nnuhwam yɛ so yie; n’anofafa te sɛ sukooko fɛfɛ a ɛsosɔ kurobo a ɛnene.

¹⁴Ne nsa yɛ sika nnwinneɛ a wɔde sikabereɛboɔ asisi mu, ne nipadua yɛ asonse adwinneɛ a wɔde hoaboɔ adura soɔ.

¹⁵Ne nan yɛ abofufuo adum a ɛsisi amapa nnyinasoɔ soɔ, ne suban te sɛ Lebanon, wɔayi no sɛ tweneduro nnua.

¹⁶N’anomu wɔ adɔkɔdɔkɔwadeɛ, na ne ho nyinaa yɛ akɔnɔdeɛ ara nko. Me dɔfoɔ nie, na m’adamfo nie, O Yerusalem mmammaa.