Read New Revised Asante Twi Bible Yesaia 13 Bible Online

Yesaia 13 - New Revised Asante Twi Bible bible

Yesaia 13

¹ Babel ho atemmusɛm a Amos ba Yesaia hunuiɛ nie:

² Monsi frankaa bepɔ petee so, momma mo nne so mma wɔn; monhinhim mo nsa, na wɔnhyɛne mmapɔmma apono mu.

³Me, mahyɛ me kronkronfoɔ, mafrɛ me nnɔmmarima nso sɛ wɔnkyerɛ m’abufuo, wɔn a wɔdi me kɛseyɛ ho ahurisie no.

⁴Asafo yuu gyegyeegye wɔ mmepɔ so sɛdeɛ nkurɔfoɔ bebree deɛ teɛ no: Ɛte sɛ amanaman a wɔboaboa wɔn ano, ahennie ahodoɔ huuyɛ gyegyeegye, asafo AWURADE reboaboa dɔm ano ama ɔsa.

⁵Wɔfiri akyirikyiri asase so ne ɔsoro ano reba, AWURADE ne n’abufuhyeɛ akodeɛ no, sɛ ɔrebɛsɛe asase nyinaa.

⁶ Montwa adwo, na AWURADE da no abɛn; ɛreba sɛ ɔsɛeɛ a ɛfiri Otumfoɔ no.

⁷Enti nsa nyinaa mu bɛgo, na ɔdasani biara akoma bɛnane;

⁸na wɔn ho bɛdwiri wɔn, nketenkete ne awerɛhoɔ bɛkuta wɔn, wɔbɛhunu yea sɛ ɔwofoɔ a ɔreko awoɔ. Wɔbɛhwɛ wɔn ho wɔn ho anim haa, wɔn anim bɛyɛ sɛ ogyaframa anim.

⁹Hwɛ, AWURADE da no reba, atirimuɔden ne anibereɛ ne abufuhyeɛ so, sɛ ɔrebɛdane asase afo, na wasɛe ɛso nnebɔneyɛfoɔ afiri so.

¹⁰ Na ɔsoro nsoromma ne emu akunini renhyerɛn, owia bɛduru sum n’adifire mu, na ɔsrane nso renharan.

¹¹Na mɛba mabɛtwe wiase aso wɔ ne bɔne ho, ne abɔnefoɔ aso wɔ wɔn amumuyɛ ho, na mama ahantanfoɔ ahomasoɔ no to atwa, na ahokyerɛfoɔ ahokyerɛ abrɛ ase;

¹² mɛma ɔdasani ho ayɛ na asene sika amapa, na onipa asene Ofir sika kɔkɔɔ.

¹³Enti mɛma ɔsoro awoso, na asase ahinhim afiri ne sibea, asafo AWURADE abufuferɛ no ano ne n’abufuhyeɛ da no nti.

¹⁴Na wɔbɛdanedane wɔn ho akɔ wɔn nkurɔfoɔ nkyɛn na wɔadwanedwane akɔ wɔn nsase so sɛ ɔwansane a wɔatutu no, ne nnwan a obi mmoa wɔn ano.

¹⁵Obiara a wɔbɛhu no no, wɔbɛhwire ne mu, na obiara a wɔbɛkye no no, bɛtɔ nkrantɛ ano;

¹⁶ na wɔbɛposa wɔn mmotafowa, wɔ wɔn anim, wɔbɛfomfom wɔn afie afa, na wɔabobɔ wɔn yerenom adapaa.

¹⁷Hwɛ, merehwanyan Mediafoɔ atia wɔn, nnipa a wɔmmu dwetɛ, na sika nso, wɔnhwehwɛ;

¹⁸ wɔn agyan bɛbobɔ mmeranteɛ, wɔn yam nhyehye wɔn ɔyafunum mma mpo ho, na wɔn ani nhunu mmɔfra mmɔbɔ.

¹⁹ Na Babel a ɛyɛ ahennie mu kunini, ne Kaldeafoɔ kɛseyɛ animuonyam no, ɛbɛyɛ sɛ Sodom ne Gomora butuo a Onyankopɔn butuu wɔn no.

²⁰Obi rentena mu da biara da, na obi renkɔtena hɔ, awoɔ ntoatoasoɔ a ɛdidi soɔ mu, na Arab atutenani biara rensi ne ntomadan wɔ hɔ, na nnwanhwɛfoɔ nso remma wɔn mmoa mmutu hɔ;

²¹na ɛserɛ so mmoa na wɔbɛda hɔ, na mpatuo bɛyɛ wɔn adan amaama, na nsohori nso bɛtena hɔ, na nsasabonsam asa hɔnom;

²² na nkuntumpaa bɛsu n’aban mu, na ɛserɛ so kraman nso anigyeɛ aban no mu. Na ne berɛ abɛn a ɛreyɛ aba, na ne nna renkyɛre bio.