Read New Revised Asante Twi Bible Yesaia 21 Bible Online

Yesaia 21 - New Revised Asante Twi Bible bible

Yesaia 21

¹ Mpoano serɛ ho atemmusɛm nie: Sɛdeɛ ahum tutu firi Negeb ba no, saa ara na ɛfiri serɛ soɔ, ɛfiri asase a ɛso yɛ hu so ba.

²Anisoadehunu a ɛyɛ den na wɔayi akyerɛ me: Ɔfomfafoɔ refom fa, ɔsɛefoɔ resɛesɛe. O Elam, foro bra! O Media, bɛka no hyɛ mu! Mɛma n’apinisie nyinaa to atwa.

³Enti m’asene mu ka me dwɛɛdwɛɛ, ɛkyem aka me sɛ ɔwofoɔ kyem; yea a ɛyɛ me nti, mente asɛm, me ho a ɛyera me nti, menhunu adeɛ,

⁴m’akoma ka paripari, ehu ama mayɛ titiritii, ama anwummerɛ hann a mehwehwɛeɛ no adane me ahopopoɔ.

⁵Wɔto pono no, wɔsesɛ kuntu akɛtɛ, wɔdidi na wɔnom. O Asafohene, monsɔre! Monsra akyɛm ho ngo.

⁶Na deɛ AWURADE ka kyerɛɛ me nie: Kɔ, fa ɔwɛmfoɔ kɔgyina hɔ, deɛ ɔbɛhunu no, ma ɔnka.

⁷Sɛ ɔhunu nteaseɛnam, apɔnkɔsotefoɔ baanu baanu, mfunumu-so-tenafoɔ ne nyoma-so-tenafoɔ; na ɔwɛn n’aso wɛn pa ara.

⁸ Na ɔteaa mu sɛ gyata sɛ: O AWURADE, megyina awɛneeɛ ha ara adekyeeɛ daa, na megyina m’ahwɛeɛ ara anadwo nyinaa,

⁹ na hwɛ, nteaseɛnam ne nnipa, apɔnkɔsotefoɔ baanu baanu na wɔreba yi. Na ɔgyee so sɛ: Ahweaseɛ oo! Babel ahwe ase! Na n’anyame ahoni nyinaa, wɔabubu agu fam.

¹⁰M’adeɛ a wɔaporeɛ ne m’ayuporeeɛ ase ba! Deɛ mate no asafo AWURADE, Israel Nyankopɔn, anomu no, na maka makyerɛ woɔ yi.

¹¹ Duma ho atemmusɛm nie: Obi bɔn me firi Seir sɛ: Ɔwɛmfoɔ, anadwo mu dasuo bɛn nie? Ɔwɛmfoɔ, anadwo mu dasuo bɛn nie?

¹²Ɔwɛmfoɔ no se: Adeɛ rekye, na adesaeɛ nso reba; sɛ mobɛbisa a, mommisa, monsane mmra.

¹³Arabia ho atemmusɛm nie: Dedanim akwantemfoɔ asafo, Arabia kwaeɛ mu na mobɛsoɛ.

¹⁴Momfa nsuo mmɛhyia wɔn a sukɔm de wɔn, Tema asase sofoɔ, momfa paanoo mmɛhyia adwanefoɔ;

¹⁵ɛfiri sɛ mfena ano na wɔredwane, afena a wɔatwe ne tadua a wɔapono ne ɔko denden ano.

¹⁶ Na deɛ AWURADE ka kyerɛɛ me nie: Ɛha afe sɛ ɔpaani mfeɛ[7] teɛ no, na Kedar animuonyam nyinaa asa koraa,

¹⁷na Kedar mma mu nnɔmmarima tadua dodoɔ nkaeɛ no bɛsua, ɛfiri sɛ Israel Nyankopɔn na aka.