Read New Revised Asante Twi Bible Yesaia 22 Bible Online

Yesaia 22 - New Revised Asante Twi Bible bible

Yesaia 22

¹ Adehunu bonhwa no ho atemmusɛm. Ɛdeɛn na ɛreyɛ woɔ na wo nnipa nyinaa aforo kɔ adan atifi yi?

²Wo a huuyɛ ayɛ wo ma, hooyɛ kuro, ahosɛpɛ kuro, w’atɔfoɔ antotɔ afena ano, na wɔanwuwu ɔko mu.

³Wo mmapɔmma nyinaa abom adwanedwane kɔ; ɛnyɛ tadua na wɔde kyeree wɔn. Wo nnipa a wɔhunuu wɔn no nyinaa, wɔdwane kɔɔ akyirikyiri, nso wɔkyeree wɔn nyinaa:

⁴Enti na mese: Monyi mo ani mfiri me so na mensu su yaya. Monnhyɛ me sɛ mobɛkyekyere me werɛ, me man babaa no sɛeɛ ho.

⁵Na ɛyɛ asafo AWURADE Nyankopɔn, anim hooyɛ ne ntiatiasoɔ ne ahoyera da, adehunu bonhwa no mu, wɔdwiri ɔfasuo no, wɔteam ma no gyegye mmepɔ so.

⁶Na Elam asɔ agyan kotokuo mu de nteaseɛnam ne nnipa ne apɔnkɔsotefoɔ reba, na Kir nso ayi kyɛm adi;

⁷na nteaseɛnam bɛyeyɛ wo mmonhwa a ɛyɛ fɛ no mu amaama, na apɔnkɔsotefoɔ nso agyinagyina kuro pono ano.

⁸ Na wayi Yuda so nkataho no. Na ɛda no, mode mo ani too kwaeɛ fie no mu akodeɛ so,

⁹ na Dawid kuro no mu mpaepaeɛ no, mohunuu sɛ ayɛ bebree, na moboaboaa aseɛ tadeɛ no mu nsuo ano;

¹⁰ na mokan Yerusalem adan, na modwirii adan no, sɛ mode rewowa ɔfasuo no;

¹¹na motwaa ɛkɔ wɔ afasuo mmienu no ntam maa ɔtadeɛ dada no mu nsuo no, nanso moanhwɛ deɛ ɔyɛɛ adeɛ no, na deɛ teteete no ɔhyehyɛeɛ no, moammu no.

¹²Na ɛda no, asafo AWURADE Nyankopɔn frɛɛ nnipa baa esu ne adwotwa ne tikwabɔ ne ayitomafira mu.

¹³ Na hwɛ, ahosɛpɛ ne anigyeɛ, anantwie menetwa ne nnwan kum, ɛnamdie ne nsanom nie: “Momma yɛnnidi na yɛnnom na ɔkyena na yɛawu.”

¹⁴Na asafo AWURADE ayi me asotire sɛ: Wɔremfa amumuyɛ yi nkyɛ mo kɔsi berɛ a mobɛwuwuo! Asafo AWURADE Nyankopɔn na ɔseɛ.

¹⁵ Sɛ asafo AWURADE Nyankopɔn, seɛ nie: Kɔ efie panin Sebna yi a ɔdi efie no soɔ no nkyɛn sɛ:

¹⁶Ɛdeɛn na wowɔ yɛ wɔ ha? Na hwan na wowɔ no ɛha na woretwa ɔboda wɔ ha afa? Ɔretwa ɔboda wɔ deɛ ɛkorɔn, ɔreyɛ ne tenabea wɔ ɔbotan mu!

¹⁷Hwɛ, AWURADE bɛto wo ɔbrane toɔ atwene, na ɔbɛsɔ wo mu denden,

¹⁸na wahwim wo ato wo sɛ bɔɔl atwene asase a ɛtrɛ so, ɛhɔ na wobɛkɔ akɔwuo, na ɛhɔ na w’animuonyam nteaseɛnam bɛkorɔ, wo a woyɛ wo wura fie ahohora.

¹⁹Na mɛsum wo afiri wo sibea, na wɔadwiri wo afiri wo gyinabea.

²⁰ Na ɛbɛba da no sɛ mɛfrɛ m’akoa Hilkia ba Eliakim aba,

²¹na mede wo batakari mahyɛ no, na mede w’abɔsoɔ abɔ no so, na mede wo mpaninnie mahyɛ ne nsa, na wayɛ agya ama Yerusalemfoɔ ne Yuda fie.

²² Na mede Dawid fie safoa mɛma no, na wahini, na obi anto mu, na wato mu, na obi anhini.

²³Na mɛyɛ no sɛ pɛɛwa abɔ deɛ ɛhɔ yɛ den, na wayɛ animuonyam adwa ama n’agya fie;

²⁴na wɔde n’agya fie animuonyam nyinaa bɛma no, n’asefoɔ ne mmanana nyinaa, ɛfiri nyowa so kɔsi nhina nyinaa so.

²⁵Ɛda no, asafo AWURADE na ɔseɛ, pɛɛwa a wɔde abɔ deɛ ɛhɔ yɛ den no bɛhɔn, na wɔabu ahwe fam, na adesoa a ɛsɛne soɔ no asɛe, ɛfiri sɛ AWURADE na waka.