Read New Revised Asante Twi Bible Yesaia 26 Bible Online

Yesaia 26 - New Revised Asante Twi Bible bible

Yesaia 26

¹ Ɛda no na wɔbɛto dwom yi Yuda asase soɔ sɛ: Kuro a ɛyɛ den wɔ yɛn, ɔde nkwagyeɛ ayɛ afasuo ne epie.

² Monhini apono no na tenenee man a wɔkora gyidie no nhyɛne mu.

³Deɛ n’adwene tim wo soɔ na wobɛkora no asomdwoeɛ a ɛdi mu mu, ɛfiri sɛ wo so na ɔde ne ho toɔ.

⁴ Momfa mo ho nto AWURADE so daa daa, ɛfiri sɛ AWURADE Nyankopɔn ne daa botan.

⁵Na ɔde wɔn a wɔtete soro ahwe fam, kuro a ɛkorɔn no, wabrɛ no ase; wabrɛ no ase ama no aduru fam, wama no aka fam mfuturo;

⁶wɔde nan tiatia so, mmɔborɔfoɔ nan, ahiafoɔ anammɔn no.

⁷Ɔteneneeni kwan yɛ tee, wo na wototo ɔteneneeni tempɔn.

⁸ Nso w’atemmuo kwan so na yɛhwɛ wo AWURADE kwan, yɛn kra ani gyina wo din ne wo nkaeɛ.

⁹Me kra ani gyina wo anadwo, aane, me mu honhom nso, mede mefe wo, na sɛ w’atemmuo ka asase a, wiasefoɔ sua tenenee.

¹⁰Sɛ wɔdom ɔbɔnefoɔ a, ɔnsua tenenee; nsɛntenenee asase so na ɔdi amumuyɛsɛm, na ɔnhunu AWURADE kɛseyɛ.

¹¹O AWURADE, womaa wo nsa so, nanso wɔnhunu; ma wɔnhu wo man anem, na wɔn ani nwu; ma w’atamfoɔ ho nimkuntwe nhye wɔn sɛ ogya.

¹²AWURADE, wobɛhyehyɛ asomdwoeɛ ama yɛn, na yɛn nneyɛɛ nyinaa nso, woawie ama yɛn.

¹³O AWURADE, yɛn Nyankopɔn, awuranom a ɛnyɛ woɔ abɛdi yɛn so, nanso wo nko ara na yɛkamfo wo din.

¹⁴Wɔawuwu na wɔrentena ase; nsamanfoɔ ne wɔn, wɔrensɔre bio; ɛno nti na wobɛtwee wɔn aso sɛee wɔn na womaa wɔn ho nkaeɛ nyinaa yeraeɛ.

¹⁵O AWURADE, woama ɔman no adɔre, woama ɔman no adɔre, w’anim aba nyam, woatrɛ asase no ahyeɛ nyinaa mu.

¹⁶ O AWURADE, ahohia mu wɔhwehwɛɛ wo, wɔbɔɔ mpaeɛ berɛ a woreka wɔn anim no.

¹⁷ Sɛdeɛ onyinsɛnfoɔ a ɔbɛn awoɔ kyem na ɔtea mu ne yea mu no, sɛdeɛ yɛteɛ, wo, AWURADE, anim ne no;

¹⁸ yɛnyinsɛnee, yɛkyemee; ɛte sɛdeɛ yɛawo mframa. Yɛntumi nnyee asase nkwa, na wiasefoɔ nyinaa ahwehwe ase.

¹⁹ W’awufoɔ bɛnya nkwa, wɔn afunu bɛsɔre; monnyane nto ahurisie dwom, mo a mote mfuturo mu! Na wo bosuo yɛ hann bosuo, na asase bɛyi nsamanfoɔ agu.

²⁰ Me man, kɔ na kɔhyɛne wo mpia mu, na toto w’akyiri apono mu; fa wo ho hunta kakraa bi kɔsi sɛ abufuo no bɛtwam akorɔ.

²¹Na hwɛ, AWURADE refiri n’afa akɔtwe asase sofoɔ aso, wɔn amumuyɛ nti. Na asase bɛyi ne mogya adi, na ɛrenkata wɔn a wɔaku wɔn ɛsoɔ no so bio.